新明珠美食之家 (已結業)

澳門同事話去食水佬榮 (其實我想糾正一下, 間舖名應該叫做"新明珠之家", 但佢舖頭出面會寫住由水佬榮主理, 係個人名黎架!), 一定要去呢間, 近關閘呢間先好味!!今次去澳門玩, 第1晚既晚餐就去左呢間~其實今次係第2次黎架咋, 上次令我同事帶我黎, 食過番尋味, 所以自己去澳門都要帶埋朋友一齊去! 可能夏天既關係, 都冇乜人, 幾好!2個人竟然食左咁多野!首先當然叫左個花甲蟹辣煲(少辣), 2個人咁少, 所以叫左佢揀隻最細既蟹啦! 因為肉蟹$144/斤, 糕蟹$176/斤, 一隻都成1斤幾, 所以好貴架! 我地叫左肉蟹, 鮮味d, 1斤9兩, 好貴!果然, 隻蟹真係好鮮味~ 勁多勁多花甲, 可能因為得2個人食啦~ 我上次食就一大班人, 所以覺得唔係幾夠喉, 但今次真係勁多, 食黎食去都仲有, 其實真係食一個煲都夠, 但我地又為食, 所以仲叫左肥牛、手打墨魚丸同埋生菜。勁飽! 肥牛普通啦, 因為唔係靚野, 可以不叫。手打墨魚丸都算係佢地既招牌之一, 可以一試, 係幾彈牙架呢間野未必好多遊客識, 但係澳門人實識, 同埋花甲蟹煲香港好似冇乜得食, 都幾特別架!