百福麵家

營業中

休息中

為咗自己嘅健康，我決定逐步減少我嘅食量。第一步就係每日嘅午飯或晚飯食粥或者食麵。是日食晏我就決定食麵，嚟咗澳門咁耐，都未食過認真好味嘅麵，無論係名氣大嘅(如黃枝記)，又或者係名不經傳嘅，冇一間可以令我留下深刻嘅印象。有陣時要食好嘢都要講吓緣份，好食嘅嘢可遇而不可求。今次嚟到呢間「百福」，唔知有冇食神呢？行到去門口，發覺玻璃窗上貼滿多種信用卡招紙，心諗「食麵啫，唔駛碌卡咁大陣像啩」，好彩坐低打開餐牌之後，見到部份菜色啲價錢都唔係話太貴。思前想後，我嗌咗個雲吞搭牛腩筋湯麵。雲吞方面，用嘅係鮮蝦，蝦嘅鮮味唔係太豐富，但肉質都算爽滑；牛腩筋比我想像中炆得腍，就算係肌肉部分都可以一咬就開，但不知為何牛味冇一般咁濃，唔通用咗梳打粉整鬆啲牛腩？麵條都係同「黃枝記」一樣，唔夠扎實，唔彈牙，一咬就散晒。如夾硬要海軍鬥水兵，我覺得「百福」稍為好少少。 呢碗麵一啲都唔平，要成廿七蚊一碗。以咁樣嘅價錢，我梗係唔敢推薦俾大家啦！