台灣帝鈞碳烤胡椒餅 (已結業)

呢排阿K可以話冇乜食神，到澳門喪食，一嚟我所知嘅好多好食舖頭閂咗門，二嚟兩站嘅結果都唔係太好。好彩可以响「新葡京」同埋「永利」攞番啲錢走，否則此行真係有少少冤枉。假日之後，我決定要「揪出」美食為阿K「報仇」。 是日經過呢間舖頭，見佢用碳爐烘嘢，好似都幾得意，所以行埋去八卦吓。原來呢個餅嘅名堂叫做「胡椒餅」，係由台灣傳入嘅小食。據講話餅入面嘅肉係用前腿豬肉，配合胡椒醃製而成。餅皮係酥皮，望落十分吸引。唔知點解，感覺上用碳爐燒嘅嘢特別好味，可能係用碳爐烘，受熱會比較平均，更能夠鎖住味道。 我買咗一個試吓，新鮮滾熱辣，先食個酥皮，幾鬆化香口。再咬多一啖，嘩，唔得掂，餡入面嘅肉汁太豐富，傾瀉而出，爭啲攪到成身都係。肉質頗軟熟，加上胡椒嘅辣味，食落十分醒胃，唔怪得每次經過舖頭門前都有股陣陣香氣傳出。一塊胡椒餅只係十蚊而已，行過不妨買番件嚟食。