譚家魚翅

營業中

休息中

係澳門嗰度食魚翅其實都幾出名下，特別係幾間較出名嘅魚翅店，特別多人提起。而我比較鍾意食嘅就係呢一間譚家魚翅，鍾意佢個湯底嘅味道，甚至多過佢嘅魚翅。佢個湯底嘅味道有啲酒香，但係飲落去唔會有種好嗆喉嘅感覺，鮮鮮甜甜咁樣，真係唔知點樣整到。而魚翅其實我嘅知識唔多，亦都唔係特別鍾意食，所以每一次嚟到呢度就係食最平嘅＄55嘅石鍋魚翅就已經好滿足。一碗55元，佢就買會有二兩嘅魚翅，大概有1.5塊左右，食落去魚翅已經整到好淋，真係好有翅嘅味道，但又冇腥味，另外仲會有芽菜同埋莞茜一齊配上，唔會甘齋。今日就比平時叫多咗一個套餐，佢個套餐有一個魚翅，一個包汁時菜，一隻10頭嘅鮑魚，一件冬菇，一碗白飯，仲有個椰汁燉官燕。整個套餐係＄198一個人份量。講真呢個一個人份量其實都幾足夠，特別要提一提嘅就係佢嗰個包汁，其實無論係時菜或者鮑魚佢都係同嗰個汁，好有鮑魚嘅鮮味，蠔油嘅香，再加上花膠嘅㾾口，應該係一啲炆咗好耐嘅陳年包汁，所以啲乜嘢都咁好食。不過我都係最鍾意食＄55嘅魚翅，呢個價錢來講一個人如果可以食到兩個都係＄110，係最抵食。但係最唔中意就係唔知幾時開始，一定會比啲杏仁餅同埋一包紙巾你，咁當然係要收錢啊。