香茗茶行
Photos by 胖大叔 台灣手搖飲品店愈開愈多，一啲類似香茗茶行嘅傳統茶莊，都開始轉型賣凍茶飲，甚至仲有茶味雪糕，可見佢與時並進嘅決心。茶行本身配茶同煮茶實力雄厚，所以茶飲品質比起一般飲品店要好。香茗嘅鮮奶茶紅茶味較淡，鮮奶味較多，茶冇咗平時嘅苦澀，整體口感柔和。除咗招牌鮮奶茶外，仲有烏龍鮮奶茶都別有風味，烏龍茶味濃，加上鮮奶後，兩種飲品層次交錯，相當特別。
老江紅茶牛奶
Photos by Milly貪吃鬼紅茶江有60年歷史，宜家已經由第三代接手，但客人都係絡繹不絕，就知佢實力幾咁雄厚。綠豆沙牛奶同紅茶牛奶係呢度兩大經典招牌，綠豆沙牛奶入面嘅綠豆打得相當細緻，質地濃滑。而紅茶牛奶就係用台灣紅茶茶葉，配上一整瓶嘅高雄「高牧鮮奶」，但飲起嚟就有陣咖啡香，令食家都大呼神奇！
葳林爵閣
Photos by Milly貪吃鬼係Tiffany blue啊！相信港女們未見嘢飲，見到隻顏色就已經想衝入去。呢度老闆相當盞鬼，因為好鍾意飲嘢，所以英文名叫Drinker，而佢女朋友又叫Winnie，所以鋪頭名就叫做「葳林爵閣」，普通話又有「為妳解渴」嘅意思。飲品方面，首推午後奶茶同午後紅茶，由老闆獨家特調，味道仲同日本大熱「午後の紅茶」一模一樣，紅茶香味和奶味都好濃，非常順口。
雙妃奶茶
Photos by 小城故事不多一間裝潢古舊嘅茶飲店，奶茶用嘅奶係味全純鮮乳，所以奶味較濃，但店家調製時會調得較甜，所以記得要同佢講少甜。Menu上大多飲品都係以茶為主，好似梅子綠茶、烏梅普洱呢啲配搭都相當特別。
樺達奶茶
Photos by 芮妮一間高雄人都識嘅茶飲店，亦都係觀光客必去老店之一。為咗保持茶飲嘅品質，樺達奶茶有三大堅持：唔用封膜、唔加冰、唔加糖。單係呢份執著，已經值得到此一訪。奶茶方面，鮮奶同紅茶調和嘅比例啱啱好，飲落去首先試到甜味，之後紅茶香緩緩飄然而出，最後就係淡淡嘅牛奶味，茶香一直到飲到最後一啖都存在。
隨時接收最新資訊
讚好OpenRice專頁！