十八座狗仔粉

Open Now

Now Closed

午餐叫左一碗狗仔粉加莞茜，size係小食既份量，入面當然無肉得粉同菜甫個d配菜，味道我覺得同出面d油渣麵差不多。佢個勁辣菜甫原來係coat左勁多辣椒粉既菜甫，有d嗆喉，係辣椒仔個隻辣而唔係用汁煮入味個隻香辣，有d out of my expectation。堂食又無筷子提供，得兩條竹籤，食到好狼狽。再加埋個炸燒賣，原本想辣汁另上但姐姐話唔可以另上⋯咁唯有走辣汁加千味醬。千味醬我食到係甜醬撈麻醬個類野⋯d燒賣炸到好乾，枱面又無放豉油辣油比人落，成件事好乾爭爭唔好食。我覺得只係小食店食物，一個人埋單都要60幾，又不是特別好食，唔值

十八座狗仔粉嘅鴨肉翅超好食. 超級好食. 最高紀錄一次食四碗. 有時堂食. 有時外賣. 唔使食其他嘢可以當正餐.我都食過狗仔粉. 老實講麻麻哋. 唔係好夠熱. 又唔係好夠味. 另外食過四寶. 又係麻麻地. 我唔係咁鍾意嗰醬汁.不過唔緊要. 有鴨肉翅就夠了.佢唔係普通嘅碗仔翅. 佢有鴨肉味. 你可以話佢係一碗好結嘅鴨肉羹. 加埋招牌嘅辣蘿蔔仲精彩. 辣蘿蔔除咗本身嘅辣味. 仲將成碗翅嘅鴨肉味提升.係我心目中呢間舖頭叫做十八座鴨肉翅.

約咗朋友食飯又未夠鐘，肚仔有啲餓，經過呢一間主打香港地道小食，仲諗住篤返串魚蛋頂一頂先，自己本身冇問價錢淨係話想要一份魚蛋，結果係 $16/杯。雖然有少少驚訝，但係因為係自己部門嘅關係當然就乖乖地俾錢啦。呢一杯價值$16嘅魚蛋，大概有七至八粒，佢哋用嘅係陳皮魚蛋，即係偏細粒嘅魚蛋。醬汁都幾辣嘅關係，其實都唔係好食到陳皮味，而且佢哋嘅醬汁係死咸死辣。我只可以話佢唔係我想食嘅口味，所以我淨係食咗兩粒就放棄咗啦。

尖東行去紅磡搭車，經過十八座忍唔住入去食件小食～已經有兩年冇食，原來已經進化到用手機落單😂😂😂😂😂叫咗碟魚肉燒賣，大大粒但⋯可惜唔係我鐘意嘅口感⋯太淋了～～～～～～但佢地嘅牛雜大大件，加上獨家醬汁，非常野味好食！一啖接一啖食唔夠～～～～非常適合有時唔想食太多太飽嘅我。

天氣開始凍就會想食辣同埋暖粒粒嘅嘢。咁啱唱完K就想掃下街。叫咗碗招牌火鴨翅佢話係用四隻燒鴨煲足4小時秘製。 呢碗嘢都足料嘅， 每一羹都食到好多鴨肉絲，同佢好傑身，唔會話係淡茂茂亦唔會過鹹。仲有麻辣魚蛋 魚蛋普普通通，有8粒，係啲細粒偏硬身嘅魚蛋。原來呢個唔係好食辣嘅人都只係覺得啲魚蛋少少辣。如果真係想食麻辣嘅朋友，佢係完全滿足唔到。 試左佢嘅自家製菜圃，原味個個又真係幾好食嘅,好爽口，酸甜度啱啱好。麻辣菜圃辣到痴線，佢係有啲辣椒粉鋪喺菜譜嘅面上面， 唔食得辣嘅我冇咩事我唔會食。

行行下街有啲肚餓就過左黎食個狗仔粉，份到去啲位係有啲逼既，坐得唔太舒服🤔... 叫左個粉撈翅，食落去都唔錯既，加埋啲菜脯，不過唔夠熱... 同埋好想趕你快啲走咗🤣🤣

      次次行過十八街狗仔粉，睇落好似都幾OK啲樣，今日出去同客戶開會，開完都幾肚餓，就來試試這家十八街狗仔粉啦！入到去鋪頭都不算大，竟然都有最低消費，每位最少要消費20港紙。其實他家都不算特別平，求其揀幾樣都會達到最低消費啦。今次就揀咗招牌火鴨翅和魚蛋。碗仔翅就食得多，火鴨翅就沒試過。火鴨翅原來是用燒鴨每天煲製的，一碗裡面火鴨絲份量都幾充足，仲加咗佢地自製的菜莆，好味。魚蛋就略顯普通，可能同出面魚蛋分別不大，但是可以食得出魚蛋都不是平價貨，都幾Q彈，唔錯。

平時成日幫襯開18座狗仔粉，今日去左尖沙咀分店，一黎到就叫我自己揾位，我本來想順便落單，但呢間分店侍應要求我一定要自己寫單落order叫食物，我一心山長水遠去食鴨翅，已經同佢地講左我想食咩，但佢地店員要求一定自己寫，佢地唔會幫手寫幫手落單，態度已經好一般，結果我自己寫單，但我寫錯左，落左魚肉翅，我想問下可否轉番鴨翅，佢地答我係你寫錯就無得改，你自己問題。個魚肉翅無問過黎就落好多胡椒粉，本身我食唔到辣，一路食一路咳，仲要d魚肉翅係好難食，又辣，唔夠香

食完晚飯仲覺得有啲餓，經過呢間就去食啲小食啦😆餐廳入面有超多外國明星嘅打卡相，深受遊客歡迎，不過疫情影響，餐廳客人都唔多呢🙈🔸 馳名狗仔粉（HK$31）最出名當然係粉仔，菜脯份量都多，湯汁味道濃。粉仔略粉感，今次覺得略硬咗啲🤨🔸 魚蓉燒賣（HK$12）出名手製新鮮，燒賣大大粒，魚肉質感都唔錯🤪加埋蔥花仲可以額外加辣呢🔸黑白炸丸（HK$19）分別有貢丸同墨丸，仲可以揀淨一款。大大粒好有口感，不過食到後來就有啲油膩熱氣嘅感覺啦🤣

只要去尖沙咀脫毛或者按摩，我都會順便食18座狗仔粉或者糖水，18座狗仔粉其實普普通通，碳水化合物成本低、係精緻澱粉，純粹為個湯底，空間太窄，坐得唔舒服，$31都係食其他下午茶罷啦！狗仔粉粉感太重了！

我在晚上9點時間諗住好開心去食狗仔粉，入面食客只有2位，然後我同女朋友打算叫外賣，由於見到佢收緊錢忙緊定點，我就打算等佢忙完先叫，個疑似女老闆娘眼尾望到我就叫我等陣先，咁我就繼續等。等左5分鐘然後有人打尖落單佢又照落order,然後我就問，我可唔可以嗌嘢食啊？個疑似女老闆娘話唔可以？然後仲好似我得罪佢咁，再啤我？香港人咁燥底咁就唔好開門做生意拉，疫情大家已經夠慘，我都唔堂食，外賣自取都比人得罪，真心覺得第一次受委屈然後我同女朋友就氣沖沖走了

凌晨3點肚餓 唔知食咩好 見呢間仲開 就試下去食😽😽叫咗魚皮餃燒賣 馳名狗仔粉 同鴨翅魚皮餃同燒賣加咗自家醬汁 勁正😍😍😍😍狗仔粉 聽講有辣好味d 所以叫少辣 湯底清甜 超好味👍👍👍😋😋至於鴨翅 鴨味夠濃 多鴨肉 足料👍👍高質小店 一定會再食😍😍😍😍😍

咁岩經過呢度，撞正附近寫字樓嘅人放lunch，間間爆滿，因為我血糖低，好想搵個位近低，食啲野，順利食下藥。是但唔理係咪💛💙，最緊要唔洗等位，直入坐底。後來是但叫左一碗馳名狗仔粉頂住下。嚟到，雖則唔舒服，但都不禁碌大對眼，乜咁多黑色一點點嘅⋯⋯不斷再搞下搞下，嘩⋯⋯唔對路喎，乜愈來愈多嘅。問阿姐，阿姐話「不嬲都係咁。無野架～」以我一年前食過呢間嘅粉仔。唔係不嬲都要有鑊撈架喎呢啲唔係調味喎大佬，同我講「不嬲」兩個字。咁不如改名為「馳名鑊撈狗仔粉」啦

每次黎到尖沙咀行街嘅時候經過呢間十八座狗仔粉都忍唔住要入去食返碗呢間晏晝唔算太多人 都坐得幾鬆動-呢碗狗仔粉最吸引我嘅一定係佢個秘製辣菜脯無辣不歡嘅我都覺得呢個辣菜脯真係幾辣唔可以落得太多之後再配埋蔥花同蝦米成碗都好足料好夠味不過就咁食一碗會有啲唔太夠飽要嗌埋啲小食-最後嗌咗燒賣同炸牛丸燒賣就一般般 個粉有啲厚 出面嘅燒賣會更好食而炸牛丸就有驚喜炸得好脆-整體嚟講 價錢唔貴 去到尖沙咀都可以一試整體評分：4/5

嗰日天氣不似預期，6點幾去到尖東新文華附近，見到個天陰陰，似乎係風雨欲來嘅徵兆。啱啱又有啲肚餓，於是就走咗入去18座狗仔粉堂食啦。果不其然，當我點咗餐之後，天上就落出滂沱大雨，像極了瀑布。我一邊享受這碗美味嘅招牌火鴨翅，一邊聆聽著雨聲，感覺很安心。火鴨翅係每日用上四隻燒鴨用四個鐘頭熬製，份量十足，每一啖都有火鴨絲，仲可以加佢地秘製嘅菜莆，有辣有唔辣，任君選擇。埋單時，店員仲會友善地提醒食客記得攞遮添。有機會經過新文華會再嚟幫襯食碗火鴨翅的！