喜聚坊

Open Now

Now Closed

成個月無幫襯喜聚坊了，剛剛病好，又到湯水調理時間，今次飲嘢老火湯係「赤小豆粉葛豬骨湯」，去骨火一流，正！仲食咗「初吻骨」，味道好難形容，只可說係初吻的味道哈哈哈！賣相味道都一流仲有煙薰乳鴿，連d骨都入曬味，贊呀！今晚仲要見到明星「郭峰先生」，真人比上鏡靚仔，當晚應該係佢生日，在吃富貴夜明珠，成枱人都好有禮貌，仲見到郭峰先生同大廚寶哥影相，親切和藹，好有明星風範！真是一個愉快的晚上，食物正，服務好，連遇上的明星都好好，開心

有好一段時間無去喜聚坊了，最近同事提起有間餐廳的銀牙肉絲炒麵好好食，原來係喜聚坊，有好一些日子無去，原來這餐廳巳上了好幾次電視, 要提早訂位了，好彩最後都食到失傳嘢，今次仲要係新嘢，「金瑤古法海參條」(有圖有真相，真心唔錯），因為太肚餓，沒有每個菜式都遂一拍照，其實我仲食咗「炒時蔬」、「黃金蝦球」、「夜明珠」同「杏汁白肺湯」，味道保持一貫的高水準，因為太肚餓，眼闊肚窄，本來仲想叫多幾個餸，好彩老闆㩒住我，叫我唔好叫咁多，會食唔曬

老豆牛一生日飯，就揀左喜聚坊呢間私房菜，偷佢夠就腳兼平時午飯食過又有水準，就揀左中間價$480位嘅海鮮套餐。有原盅菜膽雞燉翅，可以用「君子之交」黎形容。海鮮方面有炸蝦釀合桃「合蒲珠還」，有清蒸南非「鮮」鮑（大嫂話係鯹鮑），有蒸銀絲大元貝，扇貝大粒爽口彈牙確抵讚！仲有清蒸游水龍躉斑，條魚夠滑可惜中間魚肉唔離骨，火候控制得唔好蒸唔熟，失敗也！仲有黑白胡椒焗肉蟹，惹味有餘鮮味不足，失望也！如果用上膏蟹效果會好得多！而且半圍都係一隻蟹，一人食得一隻蟹腳乎？最後係加左$150升級全隻樟茶鴨，據老闆娘話係靜係風乾都用上一個禮拜，每次只做七隻，賣曬先再做。呢隻樟茶鴨算有水準，冇鴨騷味，皮脆肉香下酒一流，為呢餐飯挽回些分數。最後陪埋老豆砌餅，呢餐飯就在我們的生日歌聲中完結。

昨晚公司同事生日飯，預早訂成個星期，叫食店寫菜10個人$2300左右 7：00。1. 傳奇國寶京酥鴨 2. 失傳秘製醬雞煲3. 麻婆豆腐海鮮煲4. 天天煲靚湯（加 $200轉左杏汁豬肺）5. 椒鹽鮮魷6. 燒帶子粒炒茄子7. 同撈同煲 (十隻鮑魚)8. 金銀蛋肉碎浸時蔬9. 私房特式炆陽春麵10.私房特式炒飯11.富貴夜明珠除左京酥鴨好好味外，其他味道一般一般，份量仲係例牌分量，同樓面理論左幾次話寫明10隻鮑魚但個煲得4-5隻，先話落錯單，同撈同煲應該多D分量，補番多一個例牌，但鮑魚得手指甲咁細！！！食到9：00，樓面忽然走來話有客人等位，富貴夜明珠要取消order, 頂咁永遠有客等位，咁咪永遠都食唔到，.富貴夜明珠做乜要頂檯呀！我地食生日飯喎，同佢地又要理論一番，唉..... 終於，肯整番我地😠😠😠跟住，大家同事一路吹水到打烊，前後叫左唔夠20枝藍妹，埋單竟然叫 $4350，當時冇發現， 醉醉地比左錢又冇比單我地!!!今早晨早打去， 夠膽話揼哂所有單，問佢幾錢一枝藍妹，唔答搶錢搶得 太離譜！！！

呢排天氣忽冷忽熱,，終於病倒了，剛剛病好諗住飲d湯水，清一清d西藥，所以又想起這餐廳的老火湯（對比其他餐廳，呢間老火湯的CP值最高），今次叫咗「蓮子粟米螺片煲翅羣」，又清又甜又多骨膠原，因為剛病好，所以食唔多，只要咗兩個小菜，「金瑤功夫翡翠豆」，呢個菜我係第一次食，純手工菜（有圖有真相，一段翡翠豆竟然可開邊好似煎禳三寶咁禳，勁啊！）好惹味但完全不油膩，跟住係一個清清哋的豆苗，豆苗好新鮮，今餐好健康好滿足

有好一段時間book唔到枱, 無嚟開餐了, 呢幾日天氣突然轉冷, 個人好乾燥, 好想飲住家湯, 特別掛住無味精的杏汁白肺湯, 於是今日嚟咗晚飯, 杏汁白肺菜乾湯仍然好贊, 飲完滿口鮮甜, 杏仁磨得極幼細, 全溶在湯內, 非常滋潤, 連d湯渣金銀菜（係仲有味㗎)我都食曬, 跟住試咗個新菜式, 「火舞流星蟹」, 嘩! 個汁d味我從來未食過, 好正（但完全估佢唔到用咩材料先調到呢隻味道）, 我結果要咗個白飯撈曬d汁, 仲有鹹魚豆腐煲, 送飯一流, 豆笛好好味, 仲有d金華火腿絲, 更能吊起豆笛的甜, 主食係炒飯, 保持一貫水準, 好吃! 好吃的餐廳希望同多d人分享, 但人太多我又book唔到枱, 心情好矛盾啊

噚晚喺「東張西望」睇到一個介紹麵嘅特輯，睇睇下發現原來喺喜聚坊嘅寶哥上咗電視，介紹嘅菜式係「肉絲炒麵」，但我從來未喺喜聚坊食過呢個菜式，所以，忍唔住去試，先上我必飲的無味精老火湯，今日係青紅蘿蔔煲豬骨，好清甜但好夠味，又下火，正！跟住係滑蛋炒蝦仁，d蝦勁大隻，好彈牙好新鮮，仲叫咗涼瓜（因為我熱氣），第一次試用蝦醬炒，味道又唔錯bor，然後上招版菜之一咕嚕肉，味道唔洗多講，正正正！最後係主角，上電視嘅肉絲炒麵，麵香脆但唔會好硬完全唔會𠝹口，個汁亦唔係一般果d「糊pad pad」汁，銀芽亦去咗頭尾，好有誠意之作，唯一可以挑掦嘅係可能人太多，個presentation無電視咁靚（供圖對照），但味道係不用置疑的，一餐無味精的經濟實惠小菜，真係無得輸！

除了高檔食材，平價小菜也是值得推介。比一般小館來得還要住家口味，老闆娘介紹所有菜式不含味精，但太太覺得無味精下菜式有點濃味，我估計係老師傅一般習慣。唯所有預定菜式不是一叫就有，如當晚得你一枱客食指定菜式，他們可能預備不了，這是小店能理解。另有一優點是，老闆娘全程可用whatsapp溝通菜式，方便不炒。

經電視介紹下，得知專做懷舊菜，反正住在附近，便作一試。兩餐中分別試平價小炒及中價懷舊菜，說實未至於「嘩」一聲，但味道確實很回味，環境算坐得舒服，亦可自帶酒水，吾多講，去圖。

今晚又去喜聚坊晚飯，重點推介係重殼🦀  ...  罕見！仲有，鹽燒海魚，襯以可以食嘅裝飾! 「手工製嘅花」，係用車厘茄整的，手工精美，很有驚喜！另外仲有雞油炒菜心，食到菜味，又有鮮味！讚

中秋節家人提議去喜聚坊做節，果晚叫咗滑蛋蝦仁、秘製雞、雞煲同避風塘炒飯，d蝦大隻又彈牙，秘製雞係用走地雞，所以特別好食，雞煲香味四溢，炒飯粒粒分明又唔油，非常唔錯

今日襯住糧尾「紥炮」特登出大角咀試返間親民的地盤佬餐廳，貪佢價廉物美抵食夾大碟。我挑選了老干媽干炒牛河來試試，河粉起用比較幼身的金邊粉，因此較淋身，個人較喜歡粗身的沙河粉。呢度炒粉麵鑊氣十足值得一讚，為左令幼身河粉唔會變成一pat，落左好多油去炒，令成個河粉略嫌油份太多，唔夠健康。牛肉方面很大塊，食不出有鬆肉粉味，抵讚！整體合格。其餘各人試的均各具特色，例如東東點的薑葱牛腩撈麵，用粗生麵經已令人眼前一亮，味道拍得住街邊麵檔水準，加上牛腩分量多，全腩走筋，真係會食唔曬。同事的楊州炒飯加入左欖菜，同樣大大碟食得開心冇投訴！紮實的廚藝加上重量級的真材實料成為佢長期咁旺場的原因！題外話呢度逢星期三冇炒野食，有心試佢地炒粉麵飯記得留意！

今日同老公去食晏，發現咗一間又平又好味的餐廳，我叫咗加料皮蛋芫茜魚片湯米，好好食又下火，老公叫咗蒸肉餅，每人送無味精例湯，雪耳冬瓜湯，去濕最啱！仲有餐飲，per head 唔洗$60，真係「平、靚、正」！因爲太出色，於是夜晚又去，叫咗花鵰蛋白蒸蟹，蟹羔非常甘香，海蟹d肉特別鮮甜，蛋白有蟹鮮味又有花鵰香味，陳皮蒸深海泥鯭，魚肉非常鮮味，又叫咗煙薰雞，係我食過最好食的煙薰雞，d皮微微地甜有雞味，仲叫咗油鹽水花甲浸筧菜，d汁鮮到可以當湯飲，總括來說，係一間非常出色的餐廳，一定會再幫襯

又是和朋友喜聚慶祝生日，首選大角嘴喜聚坊。 跟隨大廚寶哥十多年，現在只説有幾多位客人，菜單就交給寶哥發辦，從未試過令我失望。今天我們的菜式：豉油皇大蝦。用新鮮大蝦，彈牙。超水準。當天寶哥幫我們留了一條大的手釣黑腳䲞，魚味濃生炸大蟹鉗，啖啖肉，新鮮又好味煎焗黑毛豬，正乾炒牛河，用幼身河粉去炒，牛肉新鮮入味，絕冇梳打粉𢲡過，碟底一滴油都冇，好功夫生日當然要預備富貴夜明珠，當生日蛋糕祝朋友生日快樂，身體健康

呢2日又去咗喜聚坊晚膳, 一晚見到張兆輝從包廂走出來, 另一晚就見到有食客捉住黃宗澤影相, 但本人對食物的興趣大過對人類😅, 所以, 我只抬頭望了一眼就繼續食😋。 我發現食完好嘢好難返轉頭, 已去唔返奧海城d鏈鎖食店晚膳了, 希望喜聚坊能賺到錢之餘, 以後仲訂到位啦😰。呢兩晚d小菜仍然繼續好出色, 我個人最喜歡「番茄炒蛋」, 咁家常嘅餸竟然可以煮到咁出神入化, 真係不得不寫個「服」字!👍🏻 (忽發奇想: 如果個廚師係女人, 應該可以用個胃留住好多男人?!😂)