四爺車仔麵專門店 (Closed)

之前一兩年都有食過好幾次，間鋪越做越麻麻D食物質素下降同初初冇得比。而今次個外賣的酸辣金湯真系要分享下....  菜心變了霉菜   面同湯系有分開，但菜浸兩浸就變到咁既樣⋯⋯大家叫外賣就最好吾好叫酸辣金湯再加菜

第二次食這間，平時這舖都幾多人食，午飯時間門口都會有人排隊，但宜家疫情關係，少了人堂食，今日好想再食佢個皮蛋芫茜湯底車仔麵，於是去了食，叫了柱侯牛筋腩、瑞士雞翼、日本無公害糖心蛋及菠菜麵，個餐好快上枱，個芫茜湯真係好正，清得嚟唔會淡，粗身的菠菜麵幾有咬口，個牛筋腩就唔夠淋，但都入味，瑞士雞翼我覺得個味濃咗D，糖心蛋好入味，雖然$15隻幾貴下，但係幾好味的，總體而言，價錢比較貴，但個湯底我好鍾意，不過佢俾客用的匙羹就唔多得，崩哂口也俾人用，這點扣少少分，不過服務態度幾好，幾有禮貌的.

六月二十六日星期五中午，灣仔。第一篇唔識用書面語打既食評。湯28蚊，最低消費3餸，全部選最平都30蚊，見到張單，100蚊，覺得成件事好癲，唔緊要，好食的話就抵畀。黎到，好似食韓國菜咁，選左唔要另上，都另上畀我，職員道歉，話咁樣方便D，唔緊要。食左舊魷魚覺得唔對路，再食舊牛柏葉，原來全部野都係就咁煮熟再淋汁，完全無味既，另上都食唔到味，放落湯可想而知會幾咁災難級；豬皮texture好怪好似泥膠，柱侯牛肚竟然係酸既，食多啖麵飲埋杯野走人。食韓國野咁食車仔麵已經搞笑，唔緊要，100蚊碗下欄野，都唔緊要，但係你地畀D咁既垃圾我？第一次食野食到咁嬲，憑咩要人最低叫三餸呀！黃大晒呀？有人話日日lunch time排隊排到好誇張，係咪黃就可以Hi冧咁去因為係咪都有人排隊啊！上面呢段野已經完整同餐廳反映左，已經blacklisted，今日質素係去到執左佢既地步，本業都做唔好，幾黃都無用，你都可以選擇唔做我地生意，we don’t owe u anything，搞清楚大家既關係，我係唔會咁智障同自己味蕾同銀包過唔去。

估唔到灣仔都有一間高質素嘅車仔麵，呢度主打 靚湯，當然就要試下佢啦。.佢有多款湯底揀，但係最出名都應該係呢個芫茜皮蛋湯。而麵底都有好多種，今次我就揀咗讚岐烏冬。至於餸方面就要起碼揀三個。.🍵 芫茜皮蛋湯 $27.呢個湯真係冇花冇假， 湯底鮮甜加上非常濃烈嘅芫茜味，鍾意食芫茜嘅朋友一定要試。 而且佢仲有小小皮蛋添，當多個餸😂，真係食到連湯都飲埋㗎。.🍜 讚岐烏冬.麵質唔差，唔會煮到好淋好散， 食落彈牙都算ok啦。.🍢 韭菜豬紅$13+瑞士雞翼$13+古法鹵水豬大腸$15+清甜蘿白$10.呢度嘅豬紅會連埋韭菜一齊上，都算少有。至於瑞士雞翼煮得非常入味同埋好淋，咬落去骨同肉都會一咬就散，唔會黐住喺啲骨度，食落甜甜地啖啖都係肉。 鹵水大腸亦一啲都唔韌，入口鬆化之餘，鹵水味亦都好重。 最後，蘿蔔食落清甜，不過就有少少渣。.🍹凍美祿 跟餐加5蚊.鍾意飲美祿多奶，純粹個人喜好。😆.呢度可以揀餸同湯麵分開上，唔好比d汁影響湯個味道，算係諗得比較周到。不過一分錢一分貨，價錢上算係偏貴，咁一滴湯都唔好哂啦，飲哂佢！勁！

價錢反映味道既車仔麵雖然真係有啲貴，但值得！同埋份量都幾多💛麵底竟然有菠菜麵、銀針粉揀，依家真係買少見少餸就最少要揀三個。⭐️皇牌豬腩仔真係非常邪惡同出色😈😈五花腩入味而且肥而不膩😋。⭐️炸魚皮係酥脆，真係可以浸完湯汁都仲脆卜卜🤤。⭐️滷水汁豆腐無咩特別，正常發揮分碟上係幾貼心既安排💛叫左四餸加杯檸蜜，盛惠$86不過灣仔呢個地段，呢個價錢明既

真心劣評：同朋友買完野天氣熱，搵地方食晚飯,行過依間野見貌似正常，諗住好好醜醜求其食一餐，坐低叫左個麵同牛根腩飯等等，食左一陣發現碗皮蛋芫荽湯混有^一隻^黑色無線藍牙耳機😰，睇上去同皮蛋差唔多，當場無哂食慾兼嚇呆左😨，最慘已經飲左幾啖。即刻同女侍應反映，女侍應猛話唔好意思仲話換過個湯，心諗你隻藍牙都唔知幾時跌咗落去d湯到，話唔定一早已經係煲湯個時已經跌咗落去，即刻同佢講唔使🙅🏻‍♂️，最慘係同枱朋友，佢睇住我由碗湯打撈左隻藍牙上黎，佢已經無哂胃口🤢，之後個班侍應仲好似無事發生過咁，最後我同朋友真係食唔到落去頂唔順就埋單走，依家諗起 d湯溝左唔知邊個人嘅耳屎，就真係反胃🤮最後悔無即刻影低果碗湯，如果唔係我實post上網。真心問點解可以垃圾都咁😡，點解衞生可以咁差🥵，已經唔想再講d野好唔好食。咁辛苦打咁長因為唔想再有人中招。各位有膽量可以一試，好自為之。

Lee 間車仔麵湯底有芫茜皮蛋湯可以下下火，又清清底冇咁口渴同埋有好多款餸選擇，我揀咗滷水豆腐、蟹柳、炸魚皮同包埋一杯飲品我就揀咗熱菜蜜滷水豆腐佢整得好入味，所以我每次都叫，好味。上次叫過雞翼，佢既滷水汁都一樣好味。我碗車仔麵實在太清，lee 間店舖會用D碟仔裝唔同食物，唔會影響到車仔麵既湯底，值得一讚

同朋友去山頂行完山搭車落到黎灣仔，大家都唔想食太多野所以就搵咗呢間食車仔麵嘅黃店食晚餐我哋每人叫咗一個車仔麵，三個餸，包一杯飲品都係$65! 話平又唔係真係好平，但勝在佢地用料同湯底都好新鮮同好用心食到我地舔舔脷！值得一題係佢哋嘅侍應都好有禮貌同埋好用心服務，見到我哋坐耐左會主動遞上熱水傳統牛骨湯底，沙嗲汁，銀針粉，通菜，白菜豬肉餃，柱候牛筋腩 $65 (7.5/10) w/熱菜蜜🤤湯底係新鮮熬製而成，唔會覺得有味精🤤白菜餃啲料好足🤤牛筋腩炆得好淋，柱候汁亦都好香口，仲要係額外一碗另上！傳統牛骨湯底，牛腩汁，波菜麵，白蘿蔔，韭菜餃，咖喱牛筋腩 (7.5/10) w/ 熱鴛鴦🤤牛筋腩一樣炆得好淋！咖喱汁會額外增加風味，鍾意少少辣嘅朋友都可以試吓🤤波菜麵好咬口！建議可以試吓🤤白蘿蔔非常清甜！總結: 雖然唔係話好平但係好好食，係一間好有誠意嘅黃店🥳

又係時候啦!今次想食啲有港式風味嘅嘢，所以就揀咗去灣仔食車仔麵去到餐廳嘅時候，在場所見都幾多人，不過店員都安排咗我哋坐卡位我哋唔客氣啦，拎起張店餐紙花多眼亂，作為吃貨真係唔知點揀好！首先係要揀湯底先嘅，見餐廳出名係秘製芫荽皮蛋湯...不過，個晚唔feel like 皮蛋所以我哋order咗一個傳統牛骨湯同金牌麻辣湯加腩汁~兩個都係波菜麵湯底好入味!!牛骨湯完全唔會淡金牌麻辣湯真係又麻又辣,唔會好似坊間啲餐廳咁欺騙人感情我哋叫咗皇牌豬腩仔,本身滿心期待，話明皇牌應該會好驚艷，點知比想像中有啲硬不過都算入味嘅!經典南乳豬手夠冧，可以試下瑞士雞翼係最有驚喜，唔貴，非常入味，食到我哋lamlam脷!!其他餸都正常,不過原來咁樣叫下叫下都$70幾蚊個人,好彩包杯嘢飲，如果唔係，就唔係話咁抵

去美食展前係灣仔搵野食先，途經呢間車仔麵坐位都幾闊落，所以就入去試試😝！/第一樣係揀湯先，呢到都幾多選擇特別啲就有秘製芫荽皮蛋湯、秘製麻辣湯、傳統牛骨湯甚至乎車仔撈麵或者車仔飯都有😬！想養生d重有燉湯選擇因爲要留肚所以我就冇叫到啦，揀完湯就可以揀埋要咩醬汁配料同麵類～/我就選左牛骨湯加麻辣汁，湯底估唔到勁濃郁，係一上枱已經聞到個陣麻香味🤭，麵類除左一般車仔麵店有油麵米粉之外，特別少少有菠菜麵同銀針粉或者讚岐烏冬，叫左菠菜麵講真食落冇菠菜味但麵條質地係我喜歡唔會煮得太𣺉，而且份量都幾大碗應該有兩個麵😂，配料方面我就選左麻辣豬大腸🐽、咖哩魷魚🦑、柱候牛筋腩🐮，都係第一次食車仔麵配料係會分開上，但好處係唔會左溝右溝餸菜汁更可以食到個款餸既味道重點方便同朋友開心share😝！/牛腩炆得夠晒入味但略微唔夠𣺉，咖哩魷魚夠香濃唔算太辣，麻辣大腸夠曬邪惡麻辣味恰到好處！一碗車仔麵6x蚊嚟講都算貴，但以灣仔區同質素我覺得還可以接受，味道的覺唔算差😳，下次會試埋個燉湯先～

今日約左朋友去灣仔食lunch由于唔係好熟路就叫朋友推介一下佢話聽同事講有間唔錯的車仔麵門面都幾靚 lunch時間都幾多人 要等15-20 mins入面裝修都幾新式幾舒服酸辣湯配柱侯牛肚 魚腐 生菜牛肚分開上 超。好。味呀。！平時唔太食內臟都覺得要再來食朋友食的豬骨湯油麵有咖哩牛柏葉 五花肉 魚皮餃  重點的五花肉竟然影唔到 但真係10 個好味 d肉好林好入味朋友話魚皮餃都好好味我都忍唔住係咁偷食佢D牛柏葉  D 咖哩汁好好食超高質車仔麵  雖然係唔平但絕對值得!!

今日尼左四爺食lunch，雖然人好多，不過間鋪好大仲有上層，所以都唔洗點等就有得入。湯底有出面比較少見嘅皮蛋芫茜湯，依個湯不得了，個湯底好甜仲好有芫茜味，中意茜嘅一定要叫。有好多餸可以選，最後選咗瑞士雞翼($13)、麻辣牛肚($15)、韮菜豬紅($13)。個雞翼勁入味，絶對唔係得皮有味/色個啲。牛肚個汁好野味，都幾辣，中意食辣嘅人會好中意。比較下豬紅就普通啲啲啦。朋友話佢嘅咖哩魷魚同豬腩仔都好好味，下次再試！

每一個餸都有水準，尤其是近期推出個酸辣湯底超好味，酸辣平衡得好好，又有點麼，又唔油。麻辣牛肚更係絕不能錯過。我每星期都食一次！ 地方又乾淨，以前仲成日播步步驚心主題曲，有無人話我知同四爺有咩關係㗎??!!

一間性價比超級高噶車仔面店，平時四爺哩間店就超多人排隊，今日都不例外，一如既往甘多人，不過我地排得比較前，所以很快就有位置坐低食啦，我中意牛骨湯底噶，因為夠鮮甜，而且加噶菜噶選擇都幾多噶，樣樣都甘好味，幾好噶！

一間性價比超級高噶車仔麵店，平時四爺哩間店就超多人排隊，今日都不例外，一如既往甘多人，不過我地排得比較前，所以很快就有位置坐低食啦，我中意牛骨湯底噶，因為夠鮮甜，而且加噶菜噶選擇都幾多噶，樣樣都甘好味，幾好噶！