新記車仔麵 (Closed)

昨日咁啱下晏係銅鑼灣所以就好寄待咁來呢到食車仔麵。我叫咗米粉、雞翼尖、牛栢葉，魷魚，魚皮餃同一杯凍柠茶，共28蚊。湯底都好濃，當然落咗好多味精，因為食完之後成日都好口乾。雞翼尖好"林"同入味，啲骨差唔多可以食埋落肚牛栢葉-無乜突別魷魚- 水魷魚，唔知點解佢地剪到好細魚皮餃- 一般啦，都係平時係百佳買到既貨仔總括來講，佢既湯底好正，好濃好深色，雞翼尖都好出色。不過每樣餸五蚊，而且份類唔多，就覺得有啲貴。尤於都幾方面我，又唔使等位，所以都會再來，但係如果你諗住突登來就唔使啦。

第一碗：貴花餃，蘿蔔，豬腸，豬頸肉，魚旦同粉絲，點知佢黎左幼麵，照食，算。湯底幾好，有骨味，但始終有味精。辣汁唔夠辣，但香咖哩味。貴花餃其實幾似順德魚餃，細細隻，有馬蹄幾爽幾夾。蘿蔔有渣，但好甜，算高質素。豬腸無乜膏，魯得入味，唔臭，幾好。豬頸肉淡淡魯味，但太肥，都幾入味，唔錯。魚旦幾彈牙亦好香咖哩味，入晒味。幼麵唔係鹼水麵。第二碗，唔想諗，叫左雜麵，要粉絲，多辣。牛肚，蘿蔔，牛腩，魚旦，豬腸，尤魚，好似係咁上下啦，今次無黎錯，係粉絲。乜都得一至兩舊，牛腩ｕｎ，唔好食，牛肚林啦，入味，正。但好多蒼蠅係門口附近幾張枱飛，有點dirty。

黎呢度食野, 唔可以唔試呢度既辣汁!　辣得黎有鮮甜味, 唔係一味得個辣字. 另外呢度既牛筋腩腍得黎好入味, 蘿蔔冇渣又腍甜, 豬大腸洗得幾乾淨, 食落口冇咩怪味, 可以試下架次次黎親呢度都會叫豆漿, $5一大杯, 幾抵架

佢d車仔麵賣相一流,而且好好味,但我覺得佢d辣汁真係勁辣,酷辣者必試.

呢間車仔麵成日都食, 先前見openrice 仲未有, 依家終於都有喇講番車仔麵, 呢到d麵底好多都ok,最好食就係米線同油麵,兩樣都係水準. "送"o既話就一定要食豬大腸,呢到d豬大腸洗得好乾淨,冇乜肥膏,可以放心食,佢用d鹵水汁o黎浸,好入味.其次豬頸肉都係必選,夠味同唔肥,都有十片八片(細塊).再加埋個雞翼,簡直可以係平民化得o黎又好食o既一餐.我同d 朋友研究過,如果碗車仔麵既combination o係豬大腸+豬頸肉+雞翼+(可加蘿蔔)+清湯,咁個湯會好飲d,初時以為係因為d雞翼o既鹵水汁,不過之後試過幾次,如果唔係呢個組合,出o黎既味就梗係差d, 或者大家可以試下係未~~~呢到o既飲品絕對係敗筆,因為無論係奶茶好定檸水好,總之要沖o既就唔係好得,所以每次都係叫可樂. 係呀,呢到o既汽水,罐裝同枝裝都係$5蚊,如果個日口渴o既,就叫罐裝經濟d 啦.

今日同女友下午黎食lunch.我叫左油麵，辣湯底，蘿蔔，咖喱魚蛋，豬頸肉，凍奶茶。女友就幼麵，辣湯底，蘿蔔，咖喱魚蛋，通菜，凍奶茶。湯底好正呀，甘哂辣，仲有少少麻添，有甜味。蘿蔔清甜又夠淋，無乜渣。咖喱魚蛋係我鐘意食個種，彈牙，硬身少少，好有咖喱味，正! 豬頸肉無乜特別，但係都唔錯。而主角之一既油麵就有少許失望，好似淋左d，唔夠爽口彈牙。值得一讚既係份量真係好夠，睇落好似好細碗，但係食完真係幾飽。會再encore! 另外唯一要彈既係杯野飲，凍奶茶超甜，好似糖水甘>0< .....

朋友推介呢間車仔麵比我...琴日就走左去食...見佢寫住一碗最低消費要$20....三"送"麵要剛好$20...就要左油麵+蘿蔔+貴花餃+生菜....個蘿蔔超甜..冇渣...仲有4舊咁多...貴花餃內有大粒馬蹄增加口感...味道唔錯...另外食左咖喱魚旦...睇佢唔出原來都幾辣架喎...不過略嫌硬左D...可以不試...但係蘿蔔真係好好味...下次有機會等我叫番個蘿蔔蘿蔔蘿蔔麵先...P.S. 有個亞姐黑口黑面勁串....可以的話服務態度我想比個0分佢.....

食物完全是機器製成品，湯底得辣字欠特色,點可以接受咁都要排隊買?

今晚又俾人拍左膊頭做義工，臨赴會前食少少野。上堂的地點在時代廣場，醒起要試這裡，就來食一下。八點鐘，人不多。面對各式菜色，聞陣味就知唔錯。叫左個蘿蔔雞翼油麵，要大辣。碗麵湯底確係幾香，直覺係豬油香。湯底深色，好似幾鹹，但渴落又唔算鹹，幾好味添，辣辣地配合油麵是吃過清光。一下喉第一個感覺是有味精。但事實證明，吃完後也不能說全無味精，但卻沒有多大脫水的現象，係有水準；蘿蔔是一片片的，非一舊舊，吃落腍身，清甜，算靚，但不算無渣，起碼在外皮的部份是有點渣。如果可以恨心一點，在刨皮是刨深一點，就可能會效果更好。單計蘿蔔，這裡的比榮記好，但比車品品略遜，雖然輸的只是點數。有人話不知蘿蔔可以有幾差，坦白講就是車仔麵的蘿蔔，也不是間間都好的，還望說出此等說話的朋友，去吃多一點才說吧；雞翼好深色，聞落好香，花椒八角等鹵水香料落到足。雖然是腍身，但也算不錯。22蚊，雖然比起十蚊粉麵店係貴D，但算有水準，值得一試。

之前見Saltimbanco 兄說這裡的車仔麵出色，未知能否跟車品品相比。既然試過車品品，冇理由唔去試下，所以今日下晝五點幾就同太座殺出銅鑼灣試試。叫了兩個車仔麵，我的是辣豬紅、蘿蔔加貴花餃配油麵清湯底；另太座的是魚蛋、雞翼尖、雪菜配油麵辣汁底。蘿蔔煮得非常腍而冇渣，見得在挑選過程中下過功夫。但沒有車品品的那種甜味，相信是大家在煮蘿蔔的過程中有所不同，這裡沒有那種甜味，又剛好能給突出湯底味道，反而如果有甜味才怪呢。貴花餃可算是這裡的特色，非試不可，用魚皮包著以魚肉、豬肉及馬蒂混合而成的餃，彈牙及爽脆非常，用上馬蒂將餃肉的爽口感帶出，真是一絕。可惜，個心未弄得熱透，這裡扣點分數。因太座在給我雪菜時，她把原來屬於佢個湯的辣汁都一同給我，搞到我個清湯鬼死咁辣，而佢的辣味湯底反而變得唔辣，激死！因為成個口已經辣晒，所以吃辣豬紅時，都感覺唔到豬紅本身的辣味了。但那豬紅本身都唔錯，每件size 幾大而食落爽口，色澤黑中帶紅而沒有瘀色。要一提的是那秘製辣汁，辣味非常，聽說當中用上不同秘方配料製成，食過後那股辣氣在口中散發，不食辣的朋友小心喇！雞尖經過滷水汁深入煮過，那略帶甜味的滷水汁完全滲透雞翼尖，

朋友推介登龍街有間好正既車仔麵, 昨日自己一個人經過果頭就專登去試一試, 街仔短短但有兩間車仔麵舖, 行完兩間睇過唔知邊間先係, 但一間無人, 一間坐滿人咁滯, 唔駛問都知去食邊間喇。食車仔麵, 一定食車仔麵三寶:「豬紅, 豬腸, 蘿蔔」加油麵, 再黎支支裝忌廉。麵一送到黎, 湯底已經好特別, 一般湯底係深啡色, 但呢到既湯底係深黑色(好似老抽咁黑), 即刻飲啖試下, 冶味中帶少少甜同辣, 正喎; 試豬大腸, 大腸用鹵水醃到好入味, 爽口唔韌, 乾淨, 好正既大腸! 豬紅又係好正, 脆滑得黎又唔會一夾即散; 蘿蔔清甜, 有蘿蔔味, 無渣, 揀手貨; 連油麵都好正, 軟韌程度剛好, 唔似好多其他地方D油麵發到淋哂。好耐未好過咁好味既車仔麵喇, 食完真係好滿足!可惜仲未去過車品品, 未能一評高低。試過車品品既食家, 不防試下新記比較一下。