林記點心

Open Now

Now Closed

兩星期前慕名食過一次這裏的排骨飯和點心後, 上了癮, 前幾日來吃過…打算過幾日又去吃個夠.排骨的肉汁浸入飯中, 軟硬適中, 不吃排骨, 只用一點點甜豉油撈飯已經好好味. 如果飯的份量多了, 便不能每一粒飯都沾上肉汁. 我想就是這個原因, 它比平常的蒸飯小很多…吃過之後, 才知道其他地方的蒸飯裏面的飯沒有味道, 它們應該叫作”豉汁排骨白飯”呀, “鳯爪排骨白飯”. 山竹牛肉, 春蛋燒賣, 鮮竹卷都好好味, 7元一客, 還可以有甚麼要求??大埔人真幸福

好味、抵食的排骨飯～11蚊一碗呢個真係由細食到大，老闆娘都認得我了～好多都好喜歡：排骨飯：有時排骨會少左（會唔開心）但係d飯真係超級好味A 而且重要的是：佢味道依然，才珍貴、更難得！甜豉油一絕，兩個係絕配！！牛肉飯：呢個都好好味架～細個成日都要爭扎：要牛肉還是要排骨呢？不太喜豬肉的朋友可以一試，記得加豉油喔！山竹牛肉：呢個我覺得比以前遜色左少少，可能係供應多左d 問題－－以前山竹牛肉，十一點就冇架啦！！宜家供應多左好多～（人性，多左就唔識珍惜了T_T）呢個要加喼汁～燒賣：喜歡食豬肉的朋友可以試一下雞球大包：呢個變得可遇不可求了，但係我個肚冇咁多位呀～～～蝦蛟：唔～皮有d硬，蝦係ok 的，但係我喜歡吃的是沾了蝦味的澄麵皮～所以唔會常點了多人幫襯得滯，人手不夠；但係，幾十蚊貨仔，得如此美食，呢d可以唔計啦下嘛？

呢檔排骨飯，我由細路女到食到而家都出黎做夥成廿幾年，呢度排骨飯都係咁好味，水準仍然是一樣，連d飯碗個款都無變最喜歡呢度排骨飯，係呢到既排骨沒有太多肥肉，甜豉油味剛剛好，飯仲要蒸得剛剛好，不會太硬又不會太，真係如味! 食完都唔覺有味精咁!由以前仲係舊大排檔都搬到新街市，係咁多個熟食檔當中，呢個都算係少數仍然可以保持水準質素之一。

由細路女到讀完書到出黎做夥成廿幾年，呢度排骨飯仍然是我的最愛,沒有太多肥肉排骨, 呢度好鬼好味甜豉油，仲要係剛剛好軟熟既飯，真係令人回味!由以前舊大排檔到而家搬左去新式街市，呢到既排骨飯係少數仍然可以保持如果穩定水準。

有日星期六下午兩點幾嚟呢度食嘢，見到d價錢都幾平，不過一去問個服務員，佢態度都幾唔掂(四眼少肥動作慢的男人)，只係識得講個'冇'字，噏多兩句都唔得。(不過又見佢厨房不斷有點心出，真係激死。最後個朋友食都排骨飯...我係其他檔叫嘢食算！

文迪收工後, 又過來飲茶. 始終來這裡近近地, 經濟抵食, 係沒有甚麼理由不喜歡的. 來到超過兩點, 點心剩下的不太多, 只要了以下的:排骨飯: 9分, 又有乜抵食過叫碗排骨飯? 排骨沒有太多肥肉, 肉質也幾靚, 起碼唔係實實的. 撈小小甜豉油已經好入味, 加上蒸得剛好的飯, 沒有挑剔的地方了.蝦餃: 8分, 蝦肉新鮮, 價位係人家的三分之一, 還有甚麼話說?雞球大包: 8分, 之前幾次吃也吃不到, 是日見有大包係個籠到, 大喜, 馬上要一個. 包的面積係比碗飯仲大, 真係配得大包的稱號. 配料相當之多, 包也夠鬆化, 吃著吃著, 想起小時候祖母帶我吃大包的經過. 那時候, 真係一個大包就質得飽我. 而家?!因為沒有甚麼點心了, 唯有再要一碗排骨飯.食物依舊有水準的, 好抵食的.

一貫舊區現象,老人家的聚腳地,大部份茶客都是上了年紀的人士,時間彷彿停下來,大家訴說當年趣聞逸事,置身其中,偶爾插嘴一兩句,倒也有趣.此店蒸飯並非平常看到的用上金屬器皿,而是一個個藍白碗,份量對於個人而言是少了一點,不過水準多年來保持得不俗,至少粒粿分明,軟硬適中,水份足又不過火,單叫白飯配其他點心者,大有人在,排骨由以往舖滿碗到今天少了一兩成左右罷?但考慮到近年通漲那麼厲害,也不能怪他.春蛋燒賣雖沒什麼特別,更是超高膽固醇,但坊間可食到地方真的不多,試試又何妨?

食完洪記。响大排檔周圍兜了一圈，先再坐低飲啖茶，食個包...招牌排骨飯梗冇走雞。見有雞球大包，更係必叫，再飽都可以塞多個...排骨一點也不肥，新鮮貨；飯一食就知係"原碗蒸熟"，粒粒分明，硬軟度剛好，淋上微甜嘅豉油，的確名不虛傳。個人覺得比土記明珍更好，堪稱全港數一數二嘅排骨飯...大包size比龍城嘅更大，樣樣配料(火腿粒、雞翼、猪肉)皆齊，偏偏就冇咗鵪春蛋，大為失色...但單係一味排骨飯，已可匹敵...

星期六的下午, 來了這裡午餐. 當然係要快, 因為兩點到就開始無乜食物剩了. 始於人家係一早已經營業的.排骨飯: 9分, 來得這裡, 當然係繼續要食個蒸飯. 文迪先將排骨拿開, 撈豉油,再將排骨放回原位還原. 不要小看這動作, 碗飯係更加入味的. 排骨有肥有瘦, 也幾靚. 便宜但美味.燒賣: 8分, 小弟平日不太愛吃燒賣, 但這裡的燒賣大大粒豬肉, 也不其然地連吃兩件.魚翅餃: 8分, 相對燒賣, 魚翅餃係小弟的心頭好之一. 這裡便宜的魚翅餃, 熱辣辣, 足料, 加上起摺的皮, 也好吸引.雞扎: 8分, 兩大件雞扎, 剛好一人一件, 竟然係不太肥, 都滿意.經濟抵食, 食物有水準, 只要不介意沒有靚裝, 係好好的飲茶選擇.

還未天亮就爬起來半朦半朧的跑到大尾督來個的一年一度分齡兩項鐵人賽，秋風煞煞加上冷雨橫來，還未開始已經掛念等陣間比賽完的熱辣早餐。衝過終點後除了回味剛才比賽的過程之餘，就想到這裡熱熱辣辣的排骨飯及新鮮蒸制的山竹牛肉；睇完李致和單車轉跑步起跑後，就到大埔墟林記，繼續這個老饕的下場賽事。星期天的新街市熟食層光顧的人客多得很，好在可插針不入似的在林記插科打班，安頓下來。先灌半壺夠熱普洱後，見師傅從廚房搬出剛蒸好大蒸籠，是時候跟阿姐落單排骨飯及山竹牛肉了。排骨飯仍是一貫的美味，不添加醬油亦吃得出鮮味，保持飯位爽淨亦是這裡非常之處，配上燙咀的山竹牛肉，與剛才比賽中的享受，一種是心靈的，一種是口腹的，兩個極端但一樣的感覺。掛電話回家報平安之餘順道落單，打包外賣了排骨飯、魚翅餃、雞札、糯米雞回家給太太及小朋友享用，抽著兩袋外賣膠袋，揚長而去。後記：又開始計劃十二月UNICEF的半馬，但迪士尼就沒有讓人想念的排骨飯了…

小弟係九龍人，小入新界，今日有機會，就黎試下好多人話平靚正既林記點心，11點幾黎到，點知坐到爆晒，直頭係想搭台都無得搭果隻，反而隔離一兩間都大把位，睇黎呢度真係有佢過人之處，排隊買外賣既人都唔小，咁既然無位我都買外賣，要o左燒賣加魚翅餃加山竹牛肉，加埋都只不過係19蚊，而且三樣野質素都好好，呢度同長沙灣某兩間賣點心既比，平又平過佢地，好味又好味過佢地，服務就更加唔駛講，某一間根本係垃圾。最可惜既要入黎呢度食既話都要幾多時間，如果我附近有間咁既野唔好話會成日黎，但都會經常幫襯。

老豆諗住去迎囍,但係都係慳d去呢度飲啦!食左牛肉,奶皇包,鴨腳扎.....都唔錯~~最緊要係平同飽~~不過就熱左d d!茶芥兩蚊位~

由細食到大11蛟, 一食就知係生米蒸蝦餃9蛟而家上左新街市又(因為有冷氣)坐得舒服左值得我為左食排骨飯而老遠由九龍返入黎

今早諗住食隻糯米雞後去大澳，食食下發覺有隻小曱甴，阿媽叫我拎返去話會換比我。我托住隻曱甴糯米雞返去，有個黑面嘅阿嬸見到我咁，咩都冇講一手搶左隻曱甴糯米雞掉左佢，之後拎十蚊比我，由始至終冇講過一句唔好意思或對唔住，真係不知所謂，以後都唔會再幫趁！大家如果去食嘅話，要小心啲！

假日，朋友約我們到大埔食午飯，見很久也沒有去這樣遠了，就決定去。我們還是選擇了這間做落腳站，之後再到其它食店買其它想食的食物。而在這裡，我們叫了排骨飯、蝦餃、魚翅餃和春蛋燒賣。排骨飯- 好失敗，今次好明顯差了很多，排骨唔夠入味，飯就非常硬，好在豉油味還幾好，但已令我們很失望了。蝦餃- 皮薄，蝦肉新鮮，價錢又平，值得一試。魚翅餃- 好像保持得最好的一味，細細粒很好味。春蛋燒賣- 已很少在其它食店見到的了，來這裡當然要食食啦，味道保持得幾好，雖然沒有什麼話特別好味，但作為懷舊點心，實在不可不試。食物感覺上比之前差了點，但價錢超平，就已經感覺值回票價了。