潮牛館

Open Now

Now Closed

到本區的街坊小店，今日再食牛肚河，湯好清夠甜又唔係咁鹹，我比較鍾意呢種清湯。牛肚指定要淋啲，店舖應我的要求牛肚夠淋又入味，好好食。$38一碗現時來說是好抵食了。

晏晝收工口淡淡，諗住食啲湯麵，附近最近就有呢間，於是去咗。坐低就嗌牛腩河同埋一個腐乳通菜，夾埋$55。牛腩河好快就上枱，湯頭好濃牛腩，牛腩爽口又腍身，唔會黐牙，河粉都爽彈牙。不過腐乳通菜個腐乳就有啲偏鹹。

作為藍田街坊，我經過潮牛館好多次，今日先第一次食，即興叫左牛筋腩飯，飲凍檸茶小冰少甜。牛筋腩飯嘅牛腩係長條形爽口的，每件都有肥有瘦，有牛味，但個人都係鐘意食平時冧身嘅牛腩比較適我口味。牛筋同牛腩明顯分開煮，因為牛筋比較深色同埋咸，而且有黑色短毛，望到會有少少唔開胃。凍檸茶過得去，有少少紅茶香，檸檬新鮮，合格！價錢$63 包嘢飲。考慮價錢理境同食物質素，我唔會刻意再嚟，但下次可以試埋粉面比多次機會佢。

今晚又再食潮牛館，叫咗個牛什走肺剩食，牛什麵走肺，凍咖啡少冰，泰式炸鮮蝦韮菜餃外賣，所有食物水準都無變，仍然係新鮮又好食。本身好鍾意食牛什，呢間響藍田嚟講算好好食，我間唔中就會幫襯一次，雖然我一般買外賣多，好少響堂食，不過就算係堂食，環境響牛什麵店嚟講，亦算係乾淨衛生，所以堂食都會推介，希望佢可以繼續Keep住所有食物水準，我會一直幫襯佢。啱啱更新咗21年價目表，因為呢間啲牛什確係幾好食，值得推介！

最近去左藍田做野，食晏真係諗到頭爆，始終藍田都個住宅區，來來去去都係連鎖餐廳。呢間潮牛館見到好評都幾多，一於今日試試佢！咁多牛雜入面我就淨係中意食牛肺，佢整得都幾好食，份量都好多，食完一碗都夠我捱埋成個下晝，價錢都算平，32蚊，要飲品就另外加幾蚊，價錢公道，都見到好多街坊幫襯。其實我就唔係好食得辣既，但同事話佢辣椒油好好味，所以就落左少少試下，真係好香。結果落多左一路食一路流鼻水，唔食得辣既朋友要小心啲唔好落太多啊！呢間潮牛館可以Encore

藍田黎講，做牛什粉麵小弟我基本都食過，今日襯得閒，T小姐又忙，我就自己去左食呢間開左半年左右既潮牛館未有呢間野之前，本來我就覺得啓田明德係全藍田最好食既牛什粉麵，今日一試潮牛館，佢都拍得住明德，牛腩肥瘦適中，入味又淋仲要平幾蚊，牛腩河加紫菜加凍奶茶，都係42蚊睇黎之後都經常黎，下次要試牛什

這一間店舖相信開業不足半年，但係我每次經過都成日有好多客人坐喺入邊，不分早午晚，所以我覺得應該唔錯，有一日我選擇入去一試！這間店好比我嘅感覺好清潔同埋衛生，我入到去坐低嘅時候見到一班老街坊成日幫襯，同店主有講有笑，我感到小店嘅魅力，就是人情味！坐低見到餐牌，我心諗這間店舖不是為了賺錢，因為每一個牛部位應該都係唔同價錢，但係店主就每樣都計係＄30！我叫了一碗牛雜河粉及一碗牛肚麵，我覺得佢嘅牛雜同埋牛肚比起出面類似的店舖為多，我食落去嘅牛肚好有彈性，牛雜十分之新鮮，尤其是牛腸洗得好乾淨，沒有臭味！湯底鮮甜，另外值得一讚嘅就係佢哋用荔枝醋，比起紅醋嘅單一味道好，睇得出係好有心做嘅，另外我加左佢枱面提供嘅魚露，個湯底更加鮮味！如果大家經過要試吓啦，最緊要落去嘅潮州辣椒醬，超級香，又唔會太辣！我希望呢個食評可以比到一啲鼓勵佢哋，繼續用心做下去！

夜麻麻，想係屋村區域搵一間好食既餐廳唔容易，而且價錢公道，份量足，加上湯及牛腩都唔會過份的鹹，仲要有人情味。很讚了!!牛腩河: 足料，牛腩夠淋，推介!!牛筋河: 牛筋同牛腩一樣沐當然仲要，仲要彈牙，先岩既，想宵夜又唔想咁飽就岩啦。

路經這小店試下牛腩麵同埋牛肚河，牛腩係切腩黎，炆得淋味道唔算濃，啱我口味因爲我唔鍾意好重香料味，牛肚爽口，湯亦唔係咁鹹，仲叫左碟生菜好爽口好食，$30一碗粉扺食。

天氣凍，落街買個熱辣辣嘅早餐，第一次幫襯就試下佢嘅墨丸米同牛腩撈粗先墨丸彈牙好味，入面有馬蒂好爽口，米粉份量夠食牛腩撈粗無乜亮點，但亦在水平之上因為早餐時段飲品係跟餐，我試左杯咖啡，就無乜特別

平田商場新開粉麵店，今日終於一試！ 牛腩河份量足，牛腩夠入味，而且每舊肥瘦適中，算係非常不錯！30大元一碗，在藍田區來說算係適中。小小店面，可以一眼睇埋個廚房都尚算乾淨，可以食得放心，希望可以一直保持水準，方便山上嘅居民，唔使下下都要落地鐵站先有粉麵食啦！