金明苑酒家

Open Now

Now Closed

由於很多間酒樓都沒有位置，於是訂了這間金明苑，今天分了兩輪入座。可能過來幾天就是中秋節，所以有很多人食飯很熱鬧。之前曾經食過一般般，今日估唔到質量又好返少少。首先酒樓清潔度就一般般，服務還可以。今日就係叫咗個套餐： 首先嚟概係🐽乳豬皮好香脆，肉質都好滑嘅又肥嘟嘟。之後就係🦞龍蝦伊麵，龍蝦都可以都算幾新鮮，伊麵就吸晒啲汁，汁調得還算可以。🐔炸雞，皮都有少少脆 ，幾香口都OK帶子蚌炒芹菜，正常味道。鴛鴦炒飯，味道都唔錯。蒸魚，大大條蒸到剛剛好，肉質滑滑地，唔會太嚡。翅羹 ，呢個就真係一般般。整體嚟講今餐算唔錯，俾我之前喺呢度食嘅好味咗啲。

餐廳採用了典型的港式酒樓裝修風格,營造出一種熟悉的用餐氛圍。整體的就餐環境還算舒適,有大廳座位以及獨立包廂,能滿足不同客人的用餐需求。雖然整潔度不高標準,但對此也沒有太高要求的客人來說,仍然可以接受。服務人員態度尚可,能夠照應客人的基本需求。菜品方面,既有一些家常傳統菜式,也有一些創新嘗試,口味平實無華,算是中檔水平。像是鮑魚冬菇這樣的家常菜,味道尚算不錯,適合一家人聚會用餐。總的來說,金明苑算是一家典型的港式酒樓,環境和服務尚稱得上舒適,菜品口味也算平實可口,適合不太講究整潔度的客人。對殘疾人士來說，最好的便是有殘廁在附近，而且都相當整潔

大堂唔夠冷氣，一開始仲要我地坐間冇冷氣既房，得部風扇，堅持唔入要再等先有位，樓面西面又態度差，出點心姐姐問佢攞辣椒醬仲要比佢小，都唔知咩事，d伙記咁差，野幾好食都冇用

由於比較遲先至book枱，心水嘅酒樓已經full咗，唯有退而求其次揀呢間。一嚟到嘅時候發現人頭湧湧，好明顯我哋張枱係額外逼出嚟嘅，同隔離張枱背擦背，一啲空間都冇，不過世界難撈，都明白佢哋點解要夾硬逼呢張枱出嚟；雖然係咁啫，但係佢哋嘅誠意真係欠奉，所有碗碟都油淋淋，或者有一份好耐冇洗過嘅感覺，雖然開餐前洗碗碟都成為香港人嘅習慣，但係都唔使好似奉旨咁！ 由於今次係生日飯，都係酒樓一般套餐，只可以話係不過不失，冇咩特別驚喜。

母親節食飯一肚氣，平時都有係度食家庭聚餐，所以母親節都約返一齊黎食。特登電話分別打左兩次，兩次都係同一個女人（現場見係灰色短頭髮近膊頭），一次係落booking ，第二次係訂定乳鴿，兩次啲態度都係衰到爆。訂乳鴿先奇怪，明明平時我都有正價訂定乳鴿，但今次佢堅持話無仲要話不嬲都無。佢話黎到一定有唔洗留。結果😉去到賣曬。經理話點會唔留得呀，可以！可能果位同事個腦轉唔切。好啦都照食，食物出品都係一直好好。食到咁上下，有職員過嚟問甜品蒸得未，我哋都問咦有呀？好呀之後隔左半個鐘有位灰髮超短髮，係呀又係銀髮族。話埋左張單先，埋完，佢返黎比返張卡我哋，我就問請問甜品得未？可以幫我問下嗎？佢話邊有甜品呀你哋，一早賣曬啦，你哋邊有得食，無嫁無嫁，走啦講真咁小嘅節日你地都做唔掂，新年聖誕點算你哋溝通做得唔好，搞到我哋等咁耐，仲要比人趕😓😓😓母親節呀，我哋食左90分鐘內炸。希望改善下女員工態度啦，男員工就好好，好有耐性的

有人食群記豬手麵經過見到做緊乳鴿特價，今日收工柴娃娃專登去食，嗌咗兩隻乳鴿，一碟蒜蓉蒸扇貝，同埋一個菜。乳鴿上菜嘅時候，熱辣辣，一定係新鮮整起！食落去一啲都唔乾，有汁，都好香乳鴿味！真心有驚喜喎！酒樓姐姐服務態度唔錯，反而經理就麻麻哋。。。不過總括而言 佢嘅乳鴿一流！仲要價錢只係24個幾一隻！食到一半先記得影相～～～～其餘兩個餸菜都好食，一定會再嚟幫襯，嗌多啲小菜

最經典嘅早茶點心佢都整得唔錯小籠包、奶黃包、叉燒腸係我每次必點仲有馬拉糕、紅棗糕、豉汁鳳爪、咸水餃、金錢肚都幾好味！🥳我個人最鍾意之一係炸春捲長長一條、外皮十分酥脆每次都炸得好香！！金錢肚都幾好味軟糯有嚼勁 下面嘅芋頭吸飽湯汁口感粉粉地 個人很喜歡🙌🏻菜苗餃蝦餃份量比其他酒樓大啲👍都抵食不過我佢的燒賣同蛋散一般有時候品控唔穩定會好厚重油膩🤥·不過服務就一般啲staff成日唔理人 脾氣差😅間嘢雖然味道唔錯 但去得就唔好expect好好服務啦·好在嘢食價錢合理公道～下午茶時間 最平16個半可以食到一份點心大中小點都係小點價錢👍👍👍如果仲有肚 可以食埋乳鴿！皮蛋瘦肉粥都係十幾塊 兩人份量個人認為味道出品都算幾好

約倒一班朋友(一行七人)前晚一齊去金明苑聚餐。📍位置：輕鐵大興南站落車，往大興巴士站方向直行，金明苑在保良局莊啓程小學對面。📍環境：寬敞舒適，不過衞生間清潔可改善一點。📍服務：見他們忙過不停📍點餐(推介菜式)：1 乳鴿5隻$19.8一隻(好抵食，我地叫左五隻已可做一味餸)2 清蒸沙巴仔$78(肉質鲜美)3 北菇鴨掌$48(好多時食鴨掌也嫌不夠軟腍，第一次食到入味軟腍的鴨掌，令人垂涎三尺)4 紅酒牛尾煲$80(大件肉厚，紅酒很入味)晚市優惠都好抵食

建议来，粉领地铁站十多分钟就到了，晚饭送糖水！我和三个朋友一起来，点了四个菜就够了，好味道！晚上人很多，早点来，晚上六点开始营业🈺️烧鹅推荐 土豆牛肉推荐 花菜推荐！

諗住同屋企人近近地食附近酒樓，開頭都冇事。但洗碗就出事。借問聲每隻碗都有漬，摸上滑脫脫誰人頂得順？雖然都知出去食飯會比唔起屋企乾淨，但會唔會過份左啲？洗完一隻碗水已經有層油浮面，摸上手+肉眼都見到有油+污漬🤮之後就尋求協助啦，第一姐姐聽完扮冇野走開左。第二個叫搵經理+叫我地用茶洗會好啲。但完全冇話換過。經理黎到都見到好污糟。但都冇換過set新嘅出黎。係味咁大間酒樓連碗都冇貨？用洗潔精洗都咁難？🥴每枱走完沖沖水再用？開始懷疑人生，咁基本嘅要求都咁難？就算大排檔都唔會咁吧😵‍💫附近街坊食前都留意下，始終都擺落肚🤮

年初二早上與家人飲早茶，覺得收費合理，於是初八晚再與其他家人前往用膳。一到步，見門口姿客染到五顏六色嘅頭髮，觀感上已經不太妥當，不過都無所謂，我嚟食飯姐⋯點菜時，見炒/上湯浸時菜，就點了個蒜子上湯浸豆苗，因為只見西蘭花要加十元，豆苗一欄並沒有標明要加錢。最後食完埋單，見單上蒜子上湯浸豆苗竟要$138，詢問 收銀阿姐，佢用非常無禮貌嘅語氣回答：「豆苗係要收138喎！」（可惜當時無影低張單）講真，大時大節同老人家外出用膳，唔會計較幾十蚊，但係張菜單上真係無寫到豆苗要加錢或者係另外一個價錢喎⋯⋯再者，全晚枱應該坐滿，無人等位嘅情況下，上菜要等好耐不在話下，叫左差不多一個鐘嘅炒班球，追問下先拎嚟，上枱時碟餸嘅溫度唔熱囉⋯估計應該係唔先左張單唔知邊枱客要，放到涼左等客追問至拎嚟😪全間酒樓都好難搵到個有禮貌嘅員工，唯一一個係比較低層嘅一位嬸嬸，見我哋食得七七八八就問我地：「食左糖水未呀？」真係臨走都要搵返佢比封利是🧧仔過佢。

與家人預定了1:30食午飯，我們比原定早了30分鐘到達，獲告知暫未有枱，於是與家人等待等到預定時間，仍未有枱，我們眼見門外負責安排的女職員不斷安排即時派票的人入，沒有安排預先預約的客人進入直至等到了比原定時間過了15分鐘仍未有安排進入，我們才詢問門外負責職員，職員不負責任地指她只是剛剛轉來安排，亦未想過幫忙解決問題，態度惡劣，不斷推卸責任於是我們向另一穿西裝較高大的經理查詢，他更面容輕佻不斷地說新年快樂，完全沒有打算跟進直至再過了約5分鐘，門外負責女職員說有枱走緊，叫我們再等多一會，會安排給我們，怎料轉頭又安排了給突然出現說預約了12:30的客人進入，當時已經是1:45，完全不理解為何遲到了足足1小時的人可以先進入最後，另一位身型較矮的經理來，向我們了解問題，最後因為裏面酒席開始離開，所以可以即安排我們進入，當時已經2:00整件事件問題：1。酒樓安排極差，明知有酒席，又安排客人預約，但不停只叫預約的客人等候，完全沒有記下那一組客人先到達，再作合適安排2。職員態度極度惡劣，只會推卸責任，不斷說不關她事，該高大西裝經理更加惡劣，面口差，態度是完全不想協助總結，此酒樓極度差，不會再去，大家再

預早與屋企團年，一早book左枱，當時仲未有其他人book，問清楚個經理我book 7點半ok 唔ok，佢話冇問題先落簿。當晚準時7點15分到攞枱，點知話要等，仲要有其他人到仲俾左人先！問個知客，佢話人哋好早6點嚟訂，好早。我話我訂枱當日問過7點半得唔得先訂，邊個早？當時個簿仲未有人訂枱！後來另一個等候嘅客（明顯係熟客）話因為啲菜上得遲，所以交唔切枱。當時有一張枱準備交枱。我同屋企人好快揀左菜，那等候嘅客又正與知客揀菜單，還未決定，我就同個知客講落呢個菜單，個熟客問佢那張快走嘅枱係咪佢嘅，知客知吾爾對。明顯個知客就是按熟客交枱，根本早訂枱都冇用！

第一次幫襯，全要想講吓佢哋個餐牌同態度。媽子話想食豬手，比點心紙嘅時候同個部長講要多份豬手，見佢心不在焉，突登再大聲講多次。結果，半個鐘後未到就發現佢冇落單。埋單時，問部長點解豬手收$78 一份，唔係$68, 佢話餐牌寫咗$68 係外賣。 我話佢個餐牌只係寫"歡迎外賣", 而亦都冇寫外賣堂食兩個價，咁樣 d客會誤會(同時我簽緊張單，唔係想佢退錢) ，個部長一味死話餐牌冇問題，仲話寫到明叫我唔使拗，堅持佢個餐牌係寫明for 外賣。 試問外賣嘅價目擺喺堂食嘅枱上面，唔係想陰 d客，仲有咩原因？ 最過份係個部長堅持自己冇問題仲鬧返個客轉頭。

星期天，留在小區覓食，又想食點心，疫情後比較少到金明苑，因為跟同區海王漁港和同一集團的新明苑比較，環境較細，枱與枱之間空間較狹窄，不過，有幾款點心質素都唔錯，也是我再到來的原因。週日下午茶時間，已經二時多，還是要等幾個籌號，而且選擇再等候較久的不用搭枱座位，約等了十分鐘，接待員就安排了一張較入位置的四人枱給我侍應有效率地開了鐵觀音茶$10/位茶，水滾茶靚，茶味不錯，餐具是膠做的，黑色條狀紋理，相片比實物特別，餐具清潔衛生度合格假日的下午茶點心紙有孖寶提供，價日每款食物加上$2-$3不等，價錢尚算相宜也有粉麵配搭小炒餐點了兩個下午茶孖寶和蝦餃: 孖寶:$26.8+$3~ 七彩炒米粉賣相說不上七彩，有火腿絲、蘿蔔絲，西芹，材料不算多，勝在炒得夠乾身，味道合格上湯鮮竹卷不是一般蠔油做法，是用上湯做底味的鮮竹卷，個人頗喜歡這款較健康的做法，腐皮就有點過火，有一件會散開，豬肉饀料實在，鮮味也足想不到底部原來有百合，雖然百合較硬，鮮竹卷說不上味道絶佳，但看得出廚師製作有誠意另一套孖寶$31.8+$3北菰綿花雞孖寶可點綿花雞，份量足，益街坊價 綿花軟腍，冬菰爽口，雞有醃味，不過肉質有點小"鞋"不夠滑