金禾茶餐廳 (Moved) New Location

當然要食飽早餐先上班啦，今日來到金禾茶餐廳嚐嚐佢既早田。地點離地鐵站約5min，相當方便。店內長方左邊有幾張6人枱，右面有2張圓枱，今日人唔算好多，6人枱都只需坐4人。茶餐廳早餐都離不開火腿通，豬扒、肉丁、雞翼等等...沙嗲牛肉太陽蛋麵 - $34來到的時候，覺得平平無奇，包都無得跟（通常會有埋多士）？食落才發現，點解唔係咁抵食（正常價錢）都仲有咁多人入內光顧早餐。原來係因為食物質素好，沙嗲牛肉非常入味且腍身，而沙嗲汁慢慢與湯麵聚合，味道突然提升了。啡走 - 跟餐咖啡味濃，略嫌不算太滑。

在灣仔區來講，金禾確實是一間會納入選擇名單內的茶記。但是如果想食得舒服，最好的食用時間在中午12點前或2:30後，因為12點過後實在有好多人等位。食物唔錯，最好味是雞飯及常餐，星洲炒米。老闆娘好好人，好友善。這間餐廳是即下單即煮，所以好好味。下次見

講起金禾 其實佢好多野都好正 尤其是炒飯 但我每次去到都只會食鹽焗雞飯因為佢係我係香港食過最好食最滑最入味既鹽焗雞 仲要雞胸位都咁滑 另外佢既咖哩炒飯都好夠火喉好大碟 不過六十幾蚊一個炒飯就唔夠扺

每款餐都好吸引, 見到樣樣都想食。。我食過#招牌鹽焗雞飯# 土魷肉餅蒸飯# 臘腸排骨蒸飯# 燒鴨瀨拼魚旦豬皮# 一人盤菜 # 款款都好味, 那比起我住的附近餐廳好味得多, 我一星期必黎一兩次, 下雨天必去, 因為好近公司。今日食的常餐(沙爹牛肉米配紅腸蛋), 還有我最愛吃又好味的脆多士但坐位會逼少少, 尤其是3人坐埋1邊卡位。不過現在大多數的茶餐廳都是這樣! 繁忙時間嘛..已成習慣喔！員工服務都ok, 最好是出餐快, 不用等太耐。

第一日番工呀2018年食餐好既lunch先去左金禾食佢個招牌一人盤菜（又稱毒L盤菜）真係好豐富架！有新鮮炸起既零魚球（好熱）、雞、燒鴨、豬皮、燒肉、蘿蔔、尤魚、白菜佢跟餐係白飯，但因為試過幾次啲飯都太濕太林，我轉左要碗米粉

金禾最出名係一人盤菜同鹽局雞因為好近公司 所以一星期會食一次今次冇食到 食左下午茶餐 雪菜米！平時食開佢個鴛鴦常餐食物同飲品水準好穩定 燒味同鹽局雞都好好食最衰佢唔做晚市啦！

喺灣仔返工要食到好食嘅早餐一啲都唔容易，一係大排長龍，一係水準以下，一係只得連鎖式快餐店，但估唔到今日搵到驚喜。呢個茶餐廳看似細細並無好多吸引嘅外觀，但係平時經過幾次都好想入去試吓，今次有機會就過咗去時見到門口寫住最出名有招牌嘅早餐係煎蛋菜心豬扒公仔麵。咁就把心一橫試吓。煎蛋有水準，菜心好爽爽的又不太硬，豬扒炸得好香口，陪埋公仔麵食感覺好正。再飲埋杯凍奶茶，雖然奶味重左啲不過都還可以。食完個靚早餐就充滿力量返工囉！

路經此地，又想食鹽焗雞，見佢地有得食，重要係招牌菜式，於是抱著期待既心情入內一試。點了金牌鹽焗雞飯及凍奶茶，好快就有得食，賣相還可以，但食落就好普通，奶茶一樣唔得，無咩茶味。旁邊食客對其他食物亦顯得不什滿意，確實，此處的食物只能幫你充饑，而不會令你食得滿足。唯一符合預期既係佢擠迫既環境。每個座位都被安排妥當，絕不浪費任何空間，香港目前租金貴絕全球，如此安排亦無可厚非，食客們亦十分配合。但它和對面的金鳳一樣，錯過了亦絕非壞事，試過你只會想知點解咁既食物質素，仲有人再去迫？

今天寶寶來灣仔找我吃午飯，超掋錫 😘 下午一時，四處也開位等位了，便隨便去了間茶餐廳。首創一人盆菜？！真有趣～是日快餐也不錯，$48 包括熱飲。寶寶要了籠仔豉汁蒸排骨+金針蒸雞飯，説好的籠仔呢？但食物質素高，寶寶還大讚好吃。有排骨又有雞，很豐富噢。我嘗了一口雞，嫩滑入味，真的不錯。我的籠仔蝦乾蒸肉餅飯也變成碟上，有點失方。蝦乾配肉餅真好吃，而肉餅裡的沙葛很爽口，令整體的口感提升。太多飯我吃不完，全部也給寶寶清掉～

魷魚系列嘅餸菜一直都很得小女子嘅歡心😍例如椒鹽鮮魷、蝦醬炒鮮魷等，今日見到有在下嘅兒時最愛土魷蒸肉餅緊係唔能夠放過😋😋😋-----------------------籠仔荷葉臘腸土魷蒸肉餅飯🐖（$48）冇諗過茶記嘅是日快餐會有呢啲選擇，尤其上台一刻，係感覺到有誠意既😌😌仲要白飯係分開上，誇張到比隔離同事集郵🙈🙈～ 味道方面，雖然係荷葉蒸飯卻無荷葉香味😂不過呢樣在所難免'' 食得出頗多魷魚粒👍🏻，但應該因爲調味太淡，導致肉餅只有肉香而無魷魚味，呢樣係有d失敗既😵😵不過整體性格比仍然抵讚～🙈除左白飯其他係一概比在下掃清既好味指數😋：7/10翻啅指數🙆🏻：6.5/10人均消費💰：10-99------------------------------

話說今日係光棍節，所以我就同左幾個都係單身嘅同事一齊食lunch。係灣仔行左一陣，竟然係春園街個邊發現左尼間茶餐廳，吸引住我嘅，係「1人盆菜」四個字。無諗到食盆菜都可以1個人咁毒。我就叫左1個盆菜。friend子們因為怕肥，就叫左1個臘腸蒸飯同煎雞飯。我覺得1人份量嘅盆菜比想像中豐富，有3塊雞，幾塊燒肉，豬皮之類。整體黎講算唔錯，不過佢畀我啲雞全部都有好多骨，所以我都唔係點食到肉。好彩其他野食，例如彈牙豬皮真係唔錯!

記得以前讀書好鍾意食金禾，難得過嚟灣仔做嘢，決定去懷緬一下叫咗兩個下午茶，雞脾薯條以前係必選item，可惜雞髀比以前細隻，亦都冇以前腌得咁好味，炸薯條可能啲油唔夠熱，亦都感覺好油膩好多油由於太肚餓，再叫左一個熱狗沙律，熱狗居然唔係用傳統熱狗包而係用漢堡包黎做，入面有沙律醬再加一條香腸切開兩半，完全失望.. 另外沙律可能放咗一段時間所以有D出水, 而且因為只係用罐頭沙律所以只有甜味... 懷念總是美好的，感情上希望金禾可以保持以前嘅水準，一直係灣仔區唔會被淘汰

Lunch 黎黎去都係食個幾間. 29.2.16 跟另一班同事去食飯, 比佢地帶左我黎呢度. 係灣仔十多年居然第一次幫襯... 望下門口的Menu, 居然有一人盆菜, 究竟係咩黎架呢? 為怕食到雷品, 所以都係叫個籠仔排骨臘腸魚肚滑雞飯. 同事就叫左個一人盆菜... 名如其物. 個名有咩裡面就有咩. 一眼望晒. $45連飯同熱飲. 還不錯. 0岩晒肉食的朋友. 啖啖都係肉, 一條菜都無.  魚肚就係眼見個塊. 超薄. 臘腸有半條. 比想像中多 排骨同雞都係一般. 算係不過不失..相反我比同事的一人盆菜吸引.所以過左兩日就拉左原先一齊食飯的同事黎呢度. 今次叫個盆菜嘆下. 反而跟我第一次黎的同事聽到又係唔敢食一定要介紹下呢個盆菜有幾抵. $45有飯包熱飲或湯. 有三舊燒肉, 三舊雞(重要係鹽焗雞), 三舊燒鴨. 兩舊新鮮炸的鯪魚球, 蘿蔔, 小棠菜, 紹菜同尤魚... 齋聽個份量已經覺得齋食餸都唔駛食飯, 所以細食的朋友想試呢個可以叫人家少飯. 唔好浪費. 燒肉, 燒鴨同出面食燒味的鋪頭差不多, 但個雞真係好驚喜, 因為同早兩日食個個滑雞飯係唔同的. 呢個係鹽焗雞. 感覺抵過食齋鹽焗雞飯

網上時常出現的文章/遊戲，是獨/毒的 level 測試，什麼一個人去睇戲，一個人去迪迪尼等等。最新，多謝 J 師兄的報料，讓我發現了獨/毒 的 level plus，就是一個人食盆菜。此一該你會問，盆菜咁大個，一個人點食得晒? 所以，我在收到風之後，立即找出這一人盆菜的所在地，一於要試試看看這一人盆菜，是什麼玩意。這一個盆菜，出於灣仔春園街的一間小型茶仔，名字叫《金禾茶餐廳》，這是一間平凡無奇的打工仔快食茶仔，完全沒有想過這兒會有一個既特別又獨/毒 level up 的食品。在門口等位時，已經看見這一個大 poster，大大隻字地寫著 "一人盆菜"，就從 poster 上的介紹，有菜、有豬紅、有蘿蔔、有豬皮、有鹽焗雞、有燒鴨、有燒肉、有鯪魚球，看見有這麼多的配搭，未見真身，已感覺到此物將會是盆滿砵滿，好兆頭。一坐下，我不理三七二十一就點下這一個盆菜，他們說是即叫即做，要等十分鐘，$45，配一大碗白飯，有湯或飲品，當盆菜上檯時，美麗的燒肉同鯪魚球，已經讓我知道，這是一個大滿足。盆菜，的確是盆滿砵滿，因為一人份量盆菜，是用砵盛載的，其美妙美滿的燒肉，既香又皮脆，而且我沒有想過，鯪魚球竟然是

 今日趁周末沒事做, 漫步灣仔途中,給我在春園街遇上這間在收銀處掛著一張由公開大學發出的「食物衛生經理課程證書」的茶餐廳, 覺得信心大增, 至少不會食物中毒掛, 便姑且一試。入鋪頭見到有「豆腐火腩飯」供應, 二話不說落order試下, 可能是周末的關係, 很快就有得食, 大家看看附圖便能發現這碟「豆腐火腩飯」用的是炸豆腐, 感覺挺香口的, 再試那舊燒腩, 皮依然很脆, 好像是直接從燒臘店斬下來放上碟那種, 跟坊間一些鋪頭那種把燒肉跟豆腐和芡汁落鑊煮一次感覺不同。最後要講下碗例湯, 這碗紅蘿蔔粟米湯煲得幾清甜, 至少不會令人失望。男人的浪漫有時都要睇緣份, 個人幾滿意今次這個「浪漫」的經驗, 希望大家也會喜歡。