強記美食 (Moved) New Location

佢既豬骨粥夠料夠火候，好有舊香港風味，糯米飯一粒粒唔黐，好有口感。食物唔錯，唔介意貴少少，坐位較簡陋，有時要坐後巷。間唔中會休息唔開檔，睇你好唔好彩啦。

再加上早排係個頭住，路過見咁多人排大隊買，d飯又整得咁鬼香梗係又排埋一份試下有幾掂。btw，初初見炒麵週街都有又唔係平於是就無試過，既然kc兄係度推介呢個combo，咁就一於搵日落去灣仔個陣試下先!

其實除左糯米飯加腐竹糖水外，有另外一個combo都可以試試的，就係炒麵加豬皮蘿蔔。炒麵係炒定的，叫時再兜一兜至上碟，所以熱辣辣，加埋甜醬辣醬，好有掃街feel；淨要豬皮蘿蔔但唔要魚旦，因覺得魚旦只一般，但豬皮同蘿蔔都煮到好入味，尤其係蘿蔔，非常淋又甜，所以每次都要兩份蘿蔔和一份豬皮至夠皮。話時話，就算大熱天時都會坐低食，打包風味就差D lor！當然天時冷會去食多D啦！估唔到呢間痞兜小店都有朋友留意的。

我由佢地擺街邊食到開舖頭, 我覺得佢d糯米飯係最好食!! 而腐x糖水好滑好好味!! 如果熑坐係冷"行"可以買返屋企食, 但係真係要試下!!

呢度既糯米飯真係特別好食特別香兼特別多料，雖然價錢稍貴但係我都覺得值。我早排係呢頭住冬天個陣差不多個個禮拜都有黎買糯米飯咁滯，正!!不過而家行過呢度都可以買到糯米飯，唔駛等到冬天先有，但唔知係咪心理作用呢，我都係覺得冬天整既香d好食d。腸粉我覺得貴左d，成10蚊份只得幾條，加上平日飲茶都可以食到我就不太recommend；喳咋真係幾足料，不過我都仲係嫌佢唔多夠香，個人口味唔同吧，我就鍾意佢地既腐竹糖水多d~~呢度d人都幾nice，買到同呢度d人都熟熟地，間唔中都專登俾多d料落我碗糯米飯，嘻嘻。不過而家搬左出灣仔唔知幾時可以再落去買了......

由新同樂門口街邊檔開始食到而家，少說都有十幾廿年。其實呢度選擇唔多，個人推介糯米飯、煎腸粉同喳咋。糯米飯只在天氣涼時供應，夠油份配料又足，加條潤腸就非常正。煎腸粉可以煎到舊舊有少少焦，加埋豉油麻醬辣醬香脆又好味。喳咋煲得夠香，唔係太甜又落齊料，好多人就咁食碗大的都會飽飽地。環境一般，無冷氣之餘可能仲會坐後巷渠邊，來得要有心理準備。價錢唔太平，以上三款食齊要成四十蚊，絕對不是街邊野價錢。但都其門如市好多擁躉，食唔食得過就自己決定，本人就間唔中都會去整碗喳咋同糯米飯至安樂。