李錦基越南餐廳 (Closed)

89雞翼見過沒？我覺得有小小過份，lunch都一定要叫8隻，同埋個湯河真係得4片牛肉，全部係面同湯，咁都敢叫價咁貴真係有小小過份，小食一叫就要叫50-60蚊，坐地起價有d伏

下午叫咗個牛肉濱海, 個濱海係用米粉整而吾係用脆蝦片整, 有驚喜, 牛肉雖然係用炸但係又唔係好鞋口。 個豬肉蝦米紙， 米紙夠薄, 但佢有兩枝九層塔D味道有D濃，隻蝦算大隻。 蒜蓉青口望落去好乾, 但食落都有汁都幾好。 杯椰汁紅豆涼粉冰不過不失。

餐廳位置雖然唔算方便，但食物味道、品質唔錯。係衆多越南餐廳中，lee間都算正宗。服務還可以。價錢唔算平，但值得一試 。今次試食咗雞絲湯河 - 河粉薄又滑，但湯底唔夠濃郁，有待改進。牛奶蒜香雞翼 - 一拎出嚟，香到想即刻食，食落雞翼夠香脆，還有肉汁。越南春卷 - 炸得香脆，包埋生菜、薄荷葉， 沾魚露，好食。肝醬豬肉法包 - 唔係間間越南菜館都有得食，法包夠脆，但餡料比較少，如果多返d餡會更加好食。蝦肉粉卷 - 包得夠實，材料新鮮，味道唔錯。

其實經過幾次。早幾日終於的起心肝去試試嗌左咖哩雞煲配包$88個汁可以。雞肉鞋到爆。麵包夠熱同脆煎豬扒撈檬$55~65【如果冇記錯】大碗。檬粉同配料正常。豬扒又係鞋到爆呢個價錢。算吧啦【安慰自己中】牛油雞翼8隻$88【呢個最精彩】88蚊8隻牛油雞翼。呢個價位呢個份量未計加一都成11蚊1隻架咪。滿心期待。泥到。E。個樣咁既。食落去係冇蒜味。亦冇牛油味。但竟然有茶餐廳既炸雞翼味道。真親切同驚喜。總括泥講最好食係個法包。完。

環境有點舊式的越南餐廳, 平日很少經過晚上見有位就入去試試我喜歡食越南撈檬, 喜歡它的甜甜酸酸醬汁, 除此之外, 還附上青檸, 魚露等醬汁, 配合本身無味的凍檬就最好不過!份量都偏大碗, 燒豬頸肉的份量也不少, 一個女仔有點難才吃得完豬頸肉油脂平衡分怖, 也燒得不會乾淨淨, 有點肉汁, 簡單的一餐就是這樣

今晚我們去咗何文田窩打老道嘅「李錦基越南餐廳」食晚飯！我們叫咗生牛肉湯河、扎肉湯河、香茅煎豬扒湯河、燒香茅牛肉撈檬、燒香茅鷄肉撈檬同越式炒檬！生牛肉湯河嘅牛肉肉質好嫩滑！扎肉湯河嘅扎肉好爽口彈牙！香茅煎豬扒湯河嘅豬扒煎得都幾香脆，肉質都幾鬆化，河粉嘅麵質好軟滑！燒香茅牛肉撈檬嘅牛肉肉質燒得好軟滑，香茅嘅味道好惹味！燒香茅鷄肉撈檬嘅鷄肉肉質都幾鬆軟嫩滑，檬粉嘅麵質都幾彈牙！越式炒檬炒得好乾身，而且鑊氣十足，材料亦幾豐富！

舊同學約聚會，可以到一定到。預計最後應該都會半醉回家，所以都係先打個底為上策。於是大家約好在這餐廳先來個越南河粉再開戰。本來，越南河粉絕對不會是首選，始終，大家都知到 "食過溫哥華越南牛肉河，永遠唔會係香港食。食過愛民頓越南牛肉河，再唔會係溫哥華食"呢個說法。不過始終人在香港，細佬又極力推介，咁就試一次啦。準時六點九到達，店內人氣未旺，無需等位。地方算很乾淨清潔，樓底高，座位闊落，以街坊店來說十分不錯。目的只為食啲野落肚，每人只點了一碗越南粉。清一式生牛河。唔敢批評是否正宗，只可以講既係，雖然無可能比得上越南或者加拿大既出品，不過總算湯甜粉滑，牛肉份量感覺比較少，但品質不錯。只奇怪為何沒有芽菜伴碟上，有點為憾。最值得一提的是服務方面，到我們吃完時，已經全場爆滿，有十多人在門外等侯，但店員完全沒有做過任何動作明示暗示我們離開。最後我們多聊了十分鐘左右就自動自覺埋單走人去下場。總括來說，餐牌食物飲品選擇很多，如果住在附近的人，經常幫襯都應該唔會食到悶。地方坐得舒服沒壓逼感，適合一班朋友進餐，吵一點也可以接受。情侶拍拖就唔好了。香港越南餐廳來說，可以一試。

係某電視台成日見到李錦基既廣告，今日經過附近，入去試下。呢間野大大間，價錢都唔平。我地今日點左兩款食物，第一款是豬頸肉撈檬。豬頸肉的口感好爽，而且一啲都唔肥膩，好少肥豬肉係入面。檬粉亦好爽口，配上生菜和花生，絕對俾到人好fresh既感覺。唯一不足的地方是檬粉的份量比較少，大食的朋友未必夠食。

這日陪朋友去銀行，就順便於附近的這店食LUNCH了。以湯河而言，全部的菜式也不平。最後點了順化牛腩豬手辣湯檬 $60看起來賣相還不錯吧，但實質有待改善。豬手不夠香濃，質素口感也一般。牛腩合格厚厚地有嚼勁，但檬粉份量較少，感覺偷工減料，食完都未好夠飽。

今晚雖然落雨, 都照去幫襯, 係因為間餐廳近期有廣告宣傳。價錢貴預咗, 食物質素有待改善, 雞絲湯河嘅河粉碎又少, 雞絲無味; 粉卷乾又極少料; 木瓜扎肉蝦沙律, 太多魚露浸淋哂木瓜絲, 抑或木瓜絲份量太少?!呢個味道還可以。重點係呢度嘅服務...無叫埋單, 竟然有伙計遞上賬單趕客, 話有人等位(呢個係強逼即刻埋單嘅理由咩), 由落單7:40pm到強逼埋單8:30pm, 一個鐘頭都無, 問第二個伙計是否有入座時間限制, 佢話無就走咗去, 再問第三個佢話要體諒???  有客一坐就幾個鐘, 重要話你以後咪唔好嚟! 第一次遇到咁經典嘅服務態度, 亦唔會有第二次。。。。。。

頭蝦膏少得可憐,蝦肉鬆散 以前d蝦膏係可以一羹羹咁食!大不如前!生牛河 牛肉無肉味! 湯底本來係靈魂,完全只有咸味!無鮮味!法式肝醬包, 有烘熱,都脆,免強食得下.無下次!

去完培正，在附近找餐廳食Lunch，想食濕濕地的食物，便去了食越南菜， 等了10分鐘便入座。看了餐牌，點了香茅煎豬扒湯檬。 香茅煎豬扒唔夠香茅味，豬扒煎得太乾，份量算多，湯底較多味精，檬粉份量較少，如可加多些芽菜會健康D。

一年前為呢間餐廳寫過食評 亦成為左呢間餐廳首個食評對於已經寫過食評o既餐廳 其實之後再黎都未必會再寫所以當食物上場o既時候只係影左少少相純粹記錄自己行程但係食完之後覺得真係唔寫唔得免得其他人睇完之前o既食評以為呢間野唔錯然後食完覺得睇食評都係廢 因為難食o既野都會有人讚(唔係指因為各人口味唔同嗰種)兩個人叫左兩碗河粉 我自己食茄汁牛腩湯河($60) 我媽食生牛肉柏葉湯河($60)因為河粉可轉檬粉或辣湯 我就問茄汁牛腩湯河可唔可以加辣侍應話做唔到 不如俾辣椒粒我自己加落去於是就出現左上圖呢碟野其實佢簡簡單單俾碟辣椒我咪幾好唔駛俾我發現佢個青檸乾到我出盡一陽指o既力都渣唔出一滴......接住戲肉黎喇一上場發現個茄汁牛腩湯河改錯名邊忽係茄汁同湯河 擺明係茄醬牛腩河杰到阿媽坐正係對面都唔認得應該落左勁多茄膏 乜家下茄膏好平咩?阿媽試左一啖就唔想再食我無計咱有照食 拎佢嗰碗D湯盡量溝稀同埋用D辣椒粒整辣個湯食落無咁漏D粉又成pat野咁漿埋一齊牛腩鞋到硬 咩事啊?隻牛係咪死前失戀謝哂搞到無哂彈性?之後速講下我媽嗰碗生牛肉柏葉湯河我只係食過佢一塊牛肉同D湯牛肉一定又係嗰隻失戀o既牛黎 因為一樣咁鞋

行完寵物街幫狗狗添置生活用品之後就入左呢間餐廳食個午飯，真心覺得雖然幾好味，但好唔抵食。叫左個燒香茅牛肉撈檬，牛肉炭燒味好濃好香，但係檬粉好少，下面仲有一堆生菜同青瓜墊底，只係僅僅夠我一個女仔食。

今日下午我們去咗何文田嘅「李錦基越南餐廳」食下午茶！我們叫咗燒香茅牛肉撈檬、生牛肉湯河同咸檸七喜！燒香茅牛肉撈檬嘅牛肉燒得非常香，牛肉味相當濃郁，將「冧汁」加落去撈檬，令到撈檬嘅鮮味更加提升，所以撈檬加「冧汁」一齊食，簡直係絕配！生牛肉湯河嘅牛肉鮮味十足，湯底熱辣辣，味道好鮮甜！他們嘅咸檸七喜係與眾不同，他們將咸檸打碎，令到咸檸嘅味道出晒嚟，味道非常好飲！