緣味小聚 (金百利廣場) (Closed)

一年一度舊同學聚會，問食咩大家都唔應機，咁即係逼我做leader，唔出聲就當佢地無意見，既然我揀，咁就實係揀自己想食嘅嘢啦。我就搵咗呢間海鮮蒸鍋。我個人真係幾中意食蒸鍋，因為無咁重口味之餘又無咁熱氣。我地叫咗豪華龍蝦SET，先嚟一個燉湯，接著有八款海鮮，再嚟有牛肉，最後仲有八寶飯。我見呢間餐廳細細間，都無期待到呢間蒸鍋啲服務，點知都幾出乎意料，啲店員會幫手蒸海鮮，唔洗自己蒸咁手忙腳亂。海鮮唔洗講啦，睇樣就知。食落鮮甜又爽口。不過覺得一直食海鮮有啲厭，食下八寶飯轉換下口味，八寶飯我地一人一細碗就啱啱好夠食，八款材料之後淋啲甜豉油食，係幾正架。

食物很一般，價錢含糊，仲會炸傻比少D海鮮，問個較年長嘅男服務員，明明係比少咗仲要死拗，太度又差，講多兩講又話自己唔清楚，最後求其比返一隻蟶及兩粒蚌打發我哋，兩個人食佢店內雞乸咁大隻字寫住嘅$218及$288套餐各一份，星期五、六、日每位加$20,再加兩罐汽水$12x2，埋單$631,個老闆話兩個餐原價係$388&$488，再加$40星期五附加費及$24汽水，合共$940,再加一，即加$94, 再打個唔知咩五七折，根本就係一間絕對唔老實的餐廳,請我都唔會再去😤

因為呢我份人呢就唔中意同人迫嘅，所以少出街食之餘，但凡出街食都會避開人流高峰時段，於是我們就大概三點幾去食，心唸都無咩人會下午茶去食蒸鍋噶啦，果然去到個場又幾靜下。首先有點心食，四款點心各樣一件（蝦餃、粉果、馬拉糕、棗糕），仲有六款海鮮，包括鮑魚，聖子，海蝦，花蛤等。之後仲可以揀一份主食，我地就揀咗龍躉件蒸飯。有點心，海鮮加飯，埋單都係人均百零蚊到。食得咁豐富，性價比唔錯。食物質素嚟講都OK，食落都感覺到係新鮮嘅，起碼唔會有雪味先啦。食厭咗西式嘅甜品式下午茶，都可以食下港式蒸鍋，價錢都係差唔多。

好友返工做到成肚氣，call我即刻出嚟呻下喎。咁忽然間都唔知食乜好，見到呢間做特價蒸鍋，計分返價錢又唔係好貴，又無限時可以慢慢坐，就決定食海鮮啦。叫咗有龍蝦個set，除咗龍蝦之外，好似仲有5-6款海鮮。食蒸汽鍋之前有一碗燉湯，清清地無乜油，又有唔少湯料，所以好足味。蒸龍蝦，1人半隻，算幾大舊肉，海鮮味就唔太突出，不過對得住呢個價錢啦。牛肉好嫩滑，不過總係覺得蒸牛肉怪怪咁，可能唔夠香口卦。鮑魚，大隻，口感好，有咬口，點少少豉油已經襯托出鮮甜味道。龍躉就一般啦，帶骨嘅魚我一向唔多歡喜食，所以都無乜可以講。其他海鮮貝類正正常常咁啦，都算係中上。好友一嚟到就係咁講係咁呻啦，佢話而家做嘢好攰，咁而家嘅環境辛苦就梗架啦，家家都有自己嘅困難。掛住講都無乜點影相，整體大致都係食得過，海鮮係新鮮嘅，以後想食蒸氣鍋都可以再返嚟食。

人生第一次寫食評，就係嬲住來寫，呢個野係好伏。見佢d廣告寫到咁吸引，見HKTVMALL又有coupon ，Eatigo仲要有50%，一於去試下 。一入到去已經問清楚價錢，個類似經理個人話就$218半價 7:30pm埋數前仲可以減-$50（用呢個優惠就吾可coupon) ，好啦 咁我地就食啦 。野食方面，海鮮種類少 食完啲海鮮仲要好似冇食過嘢咁，海鮮個感覺唔新鮮，完全唔知食咗啲咩落口。到最尾個八寶飯先有飽肚既感覺，餐廳本身想營造好溫馨嘅服務 不過啲樓面阿姐真係不知所謂，啲菜跌咗落枱都照樣俾我哋食，仲要係我面前😅到最後，賣單嘅時候發覺原來冇半價，只係做到$218減$50 再加一 。如果做吾到半價我就一早用coupon依家搞到下次要再用埋d coupon 無人想再幫襯，不知所謂，垃圾個經理係同我講係$218半價我地先食好伏，吾建議大家去食，千其吾好買coupon 食到咁，寧願俾貴d去食海鮮打邊爐🤬🤬🤬

同事last day，farewell dinner就點都要食嘅，話晒一齊工作2年，一齊捱真係點滴在心頭呀。問同事想食乜，佢揀咗食海鮮，於是就搵番間近公司嘅食啦。上網做research發現呢間海鮮蒸鍋評價唔錯，就決定去試試。揀咗$218個餐，有多種不同海鮮，未食時見到都已經覺得好新鮮，帶子，聖子，鮑魚，花甲等等。蒸熟咗鮮味十足，唔點豉油只係食海鮮本身嘅原味，咁就可以食出甜味。鮑魚聖子牛肉 結尾係餐廳嘅特式八寶飯，可以自選配料，揀晒自己鍾意食嘅就唔怕要挑返唔食嘅配料出黎啦。個蒸飯好多料同埋份量好足，2個人都食唔晒。真係要捧住個肚走。又走多一個好同事，以後就更加難捱，不過你有新世界，都會戥你高興嘅。以後要keep住見面，keep住食食食呀！

今日帶屋企人嚟到緣味小聚食蒸氣火鍋當生日飯, 有龍蝦、大鮑魚等等8種海鮮都係每位$288 (加一就另計)確實又幾抵喎~仲要有燉湯、手切牛頸脊同八寶蒸飯餐廳仲有另一個套餐係$218，個分別就係$218無龍蝦同牛頸脊，話明係生日飯就當然食豪啲啦個燉湯有蟲草花、雞腳同豬展，又煲得幾入味，最緊要係無味精，唔會越飲越頸渴至於海鮮，個八款海鮮包括有生猛龍蝦半隻、鮑魚、蟶子皇、元貝皇、帶子、龍躉件、大海蝦、大花蛤。送上枱時見到啲海鮮嘅色水都知道係新鮮貨，即刻流哂口水急不及待即刻拎海鮮去蒸啦!! 咪住，呢度蒸海鮮係唔洗自己落手落腳架，呢度有侍應幫你處理，咁就可以慢慢繼續嘆靚湯等食啦八種海鮮真係全部都一百分！蟶子厚肉多汁又鮮甜、鮑魚新鮮彈牙唔會難咬、龍蝦肉質爽口配上蒜蓉真係好惹味！其他海鮮例如帶子、花蛤一粒沙都無，花蛤隻隻都開哂口，無死海鮮味牛頸脊都好高質，入口有甘香油脂味，口感鬆軟！八寶飯都好足料，蒸好之後將所有材料撈埋一齊食真係好正！

今晚途經銅鑼灣金百利廣場，見到樓下有傳單廣告，發現呢間餐廳有個好吸引嘅海鮮餐做緊特價，就一於膽粗粗上來試下～套餐包括一盅燉湯、八款海鮮、仲有八寶飯，睇落好豐富！八寶飯仲可以自選材料點好菜之後店員先送上每人一盅燉湯，材料都幾豐富，湯味濃郁。開始吃海鮮了～打響頭炮嘅係每人半隻龍蝦！龍蝦肉質彈牙，味道鮮甜，食得出都幾新鮮，唔係雪藏貨。北海道元貝皇超級大隻！深海龍躉件嫩滑爽口，手切牛頸脊肉味濃郁海蝦亦新鮮、爽口彈牙，不過缺點係廚房沒有處理好條蝦腸到最後食嘅八寶飯～八樣餸菜材料超豐富，配合起來都幾好食，不過份量勁多，兩個人食真係冇乜可能食得晒

即興吃飯，喺app 見到呢間。叫左個龍蝦🦞套餐。首先係個湯，料多，幾濃，咸味可以少返啲。一開始係蒸龍蝦🦞，一人半隻，肉都算大舊，味唔太突出。鮑魚，大隻，但死左，所以冇鮮味，但依然好好咬口，仲好貼心幫我地處理左啲唔吃得嘅部分。貝類，洗唔乾淨，見到有條黑邊，我自己扯走左..魚塊，蒸得耐左，太老，同埋冇乜味蝦🦐，唔算大隻，開邊易食，味道口感唔係十分新鮮。蟶子皇，漏左，我依家睇返佢個menu 先知🙄八寶飯，選擇好多，蒸出黎好香，份量都好多，但有點太油，想少油啲嘅話唔好揀肉餅。另外叫左椒鹽魷魚so, 凍的，即係擺左好耐，同埋大部分都係炸粉，成碟都好細碎，以餸頭餸尾。服務，感覺佢地好混亂，好似打仗咁⋯⋯環境，煲比較大，所以兩個人坐四人位先剛好夠位，食嘅時候小心你個頭撞到個煲....我自己喺屋企會整鮑魚貝殼類同埋蝦，所以邊啲係污糟野好易睇得出，出面啲大排檔反處理得比較乾淨..

出咗銅鑼灣去睇戲《掃毒2》友人話係睇古天樂，咁我就係睇劉華啦《掃毒2》的成功，難免同《掃毒1》有所比較，不過古天樂劉華加上毒品，更加令人想起當年的《門徒》當然當年的《門徒》古天樂只是配角，今天已經成為主角，不過在發揮上，相對當年實在有點遜色整體上動作場面戲碼都十足，算可以睇嘅睇完戲去食lunch幾個人都無乜主意，提議去食車仔麵點知去到已經變咗做蒸鍋見佢都有點心食，咁就費事行去第間，坐低咗啦叫咗好多點心叉燒包 - 皮夠鬆軟，入面蠔油加蜜汁啱口味，好食鳳爪 - 唔係泰國無骨，係中式醬汁，不過我無食奶皇包 - ok，有流沙包就更好燒賣 - 正常蝦餃 - 皮稍為厚，不過入面D蝦算係足料，ok春卷 - 炸得有D燶，少少過火，不過蒜香味道唔錯滑雞蒸飯 - 大大份，雞肉嘅份量夠，唔會淨係得飯到肚，抵食仲叫咗幾貼點心，不過唔記得咗係乜啦新開張環境都唔錯，以酒樓計唔算好嘈，下次嚟開銅鑼灣都可以再去食飽就趕下場，去citysuper掃貨

侍應態度差劣訂座前就話係咁計，好平，好平，點樣好食好抵，問佢地係咪咁計，侍應一句話係。食完餐後發覺計法不符，於是問侍應計法，侍應對答時態度囂張，仲話叫經理過黎計比我地睇，點知我地問係咪咁計同時，佢竟然一句話我地呢個計法仲計少左架啦，我心唸，之前訂座前已問侍應係咪咁計，佢地一句話係，飯後比錢就話另一個計法，仲話咁樣平左比你，結果埋單當然貴左少少啦，當然錢唔係問題，我大把，但食飯受佢地氣就一文不值。 比錢食飯要受佢地態度，下次不會再來。

緣味小聚主打食蒸海鮮，有2款蒸海鮮套餐，另外有海鮮小炒。雖然座位唔太大，但有食物架擺放，所以食個時唔會感覺太迫促。6小時燉原盅無味精燉湯即?奉上，有雞腳、虫草花&肉粒，湯好入味，好清甜，完全不含味精。蒸海鮮方面，有8款海鮮，有鮑魚、魚、蟶子、蜆等，每款海鮮都好鮮甜。有店員幫忙蒸每款海鮮，令海鮮熟程度剛好，辛苦曬佢地。蒸到最后有手切牛排，好juicy!八寶蒸飯唔知系咪因為有臘腸，俄整道飯香味被提升，2個人食都食唔哂個飯，打包返家食。

上網見到銅鑼灣有間唔錯嘅蒸海鮮餐廳，於是心癮起即晚約朋友去試試佢！餐廳位置好方便，地鐵站轉彎就到。我地好早就上到去，因為驚晏左要等好耐，所以一到就有位我地叫左個海鮮套餐，佢先上左每人一碗無味精燉湯，燉湯超級足料，好清甜，飲得出燉左好耐海鮮用推車送到，感覺好豐盛，海鮮應有盡有餐廳職員好好，會定時過黎幫我地計時，仲教我地應該點蒸同蒸幾耐，又有得蒸下又有得食佢好特別嘅地方係每一道海鮮都會有不同嘅蔬菜配埋一齊食，感覺好清新最後仲有個好大份嘅八寶飯，8款材料比我地任揀，用8樣自己鍾意嘅材料去整嘅飯真係好正，好香，值得推介

最近蒸氣海鮮鍋熱潮未停過, 今日同朋友係CWB 食, 價錢好親民點菜很迅速～裏面環境也是比較接地氣！人氣很旺先飲個燉湯, 大大隻雞腳, 非常之多骨膠原, 口感豐富, 湯頭好清甜 蒸上幾分鐘，立馬大開吃戒鮑魚因為新鮮，肉質都很q彈，就算不沾醬料也很鮮美蝦很新鮮，彈牙, 滿嘴鮮味蟶子蒸得很嫩，開鍋即食。其實吃海鮮不需要很重口味的醬料，搞點海鮮醬油就夠了，保持原汁原味是最好的壓軸就有一個八寶飯自己點選百種材料 非常之爽 蒸大概十三分鐘內食得, 香噴噴嘅飯, 再加埋足料嘅配菜, 真係大滿足了

今日約朋友去銅鑼灣行街，唸唔到食咩，於是在街上來回走動視察。最後我地就揀咗呢間蒸氣鍋，因為其實都幾耐無食過海鮮啦。點知係呢度見到中學同學，哈哈，又會咁巧嘅。由於唔係特別熟，所以都無行前去打招呼。我地專注返啲嘢食，蒸鍋有兩個SET揀，我地揀咗龍蝦蒸氣鍋套餐，每人有一碗燉湯，8款海鮮，包括龍蝦，大鮑魚，聖子，元貝，帶子，龍躉，海蝦，花蛤。 最後仲有八寶飯食。燉湯好鮮甜，材料都好豐富，有雞，豬肉，花旗參，瑤柱等食材。海鮮都款款新鮮，大隻。我最欣賞就係佢有多款自製醬料，最適合我呢啲食慣重口味嘅人。我就中意配搭啲醬汁嚟食，但朋友中意食原汁原味，所以佢都無點過汁。最後八寶飯係自己揀八款材料蒸飯，分量都好多。整個set食完真係幾滿足！呢個價錢可以食到真係抵，一定要趁佢未加價前再食多次！