意粉廚房

Open Now

Now Closed

今日係加連威老道買到成手野,又要等時間,決定入意粉廚房試下. 以前成日係條樓梯望間酒店,感覺普普通通,但知道價錢唔貴,試下無妨.坐低叫左個三文魚意粉,一杯凍齋啡,一向覺得酒店D啡不及茶記,但呢間都算唔錯, 係可以"炭"下的級數,碟意粉個買相和味道都好,而且唔係酒店扮晒野,好睇多個好食. 雖然未致於回味無窮,但環境靜靜地,以整體性價比來計,唔趕時間在尖沙咀應係唔錯的選擇.

今日同家人去完歷史博物館後, 過左去天橋對面果間Best Western 地庫酒店食Tea. 間餐廳係新開的, 見佢價錢望落唔貴, 個menu 都幾吸引就去試下.由於今日下大雨, 裏面都坐滿6/7成客, 可能八月免費開放博物館同科學館掛..........好快就被安排入座。我地叫左客high tea 同散叫多左個拿破崙雜椒意粉, 因為我媽咪係素食者> 意粉就軟硬適中，味道酸酸甜甜，十分開胃。而High Tea 就用左個三層架裝住多款小食，有芝士腿治, 春卷, 焦糖燉蛋, 迷你漢堡包, 咖喱角, 雞亦, 薯條。。。。樣樣有d, 的的骰骰, 感覺好似食緊自助餐咁, 連同餐茶都係$88加一.依間餐廳可以值得再試, 靜靜地坐著吹下水都係一個談天嘅好地方, 下次有機會可再試下晚市套餐^^

前日约朋友去尖沙咀行街，突然落好大雨，剛剛係加连威老道，避雨時候見對面街間餐廰個名幾得意叫意粉厨房，有啲攰又有啲肚饿，就同朋友去咗试吓，原来係酒店地庫嘅餐厅，落到去，同個名一样，主打意粉嚟嘅，我叫咗个波菜带子面，我朋友就叫咗烟肉宽条面，我對烟肉冇乜兴趣，我果碟味道都可以，带子都算大粒，面都算多，但係硬咗小小，但够飽。都算抵食，每人六十元有找，大热天时揾地方透透气，都可以嘅

今晚約左兩個朋友食晚飯, 其中一個堤意食意粉, 我反對但他們贊成, 無得選擇激死, 原來條友一早已想試下位於尖沙咀最佳盛品酒店的餐廳, 他之前經過見到好平想試。去到見到間餐廳好細, 但好彩唔使等位, 見到個餐牌, 嘩真係好平, 我叫碟蛋汁煙肉磨菇意粉和凍奶茶, 都只是$5x。先來杯凍奶茶, 太淡喇, 到意粉來到, 賣相都OK,份量也適中, 試真D真係有蛋汁味, 真攪鬼嘻嘻, 果然有料到,5X元總算有得著, 下次試碟貴D, 香煎大蝦意粉7X元, 又睇下得唔得, 嘻嘻

放工經過尖沙咀某大品牌酒店，見到新開餐廳專食意粉，所以同朋友入去試一試，估唔到有意外驚喜！ 我地叫左個Carbonara 同埋大蝦意粉！ 個Carbonara 既蛋汁十分之香又充滿煙肉既味道，對我依啲鐘意食carbonara 既人黎講算唔錯！ 而朋友食個一個大蝦意粉亦好香橄欖油味！ 仲有想講係個餐湯係免費任飲，而今晚飲嘅係磨菇湯，味道亦都唔錯！員工既服務亦都好nice，所以下次都會再約朋友黎試

今晚同屋企人行街，喺尖沙咀行到咁上下個仔嗌肚餓，話要食意粉，見到呢間外牆吸引喎，而且價錢合理仲包埋任飲茶啡同餐湯，就決定落去TRY TRY。我就叫左紅酒燴牛肋排意粉，牛肋排炆得又入味又腍，意粉咬彈牙口有口感，個汁就偏甜，但仔仔就好鍾意；而老婆叫左拿破崙芝士火腿意粉，芝士受熱溶溶地，垂涎三尺，有汁得黎又唔會過多，GOOD。阿仔就叫左蛋汁煙肉磨菇意粉，故意叫炒得乾身D，而個咸度又啱啱好~NICE而餐湯係甘荀忌廉湯，即使免費添飲，都唔係用罐頭湯同唔淡口，味道唔錯。聽D員工講開左幾個月，午市多人D，晚市就比較清淨，餐廳好新淨而且又坐得舒服，自己喺附近返工，下次約埋同事黎食先。

今晚同班同事夜左d收工，又鬼死咁肚餓，大家就約埋一齊食餐簡單晚飯。最近加連威老道一間酒店地庫開左間新餐廳，menu 主打係食意粉，還有我最愛risotto .....價錢ok wow, 係依區黎講都算合理同抵食，而且價錢仲包埋任飲咖啡茶同餐湯，仲有個軟熟餐包仔送。同事叫係紅酒煨牛肋肉意粉。。。。。爽口彈牙，牛肋肉炆得又入味又腍，意粉咬落有口感;而我嗌三文魚意粉。。。。口感煙煙韌韌。。，垂涎三尺。而且餐湯即使免費添飲，也不會做得馬馬虎虎，當日我試的是蘑菇忌廉湯，估計應該是用機打成茸去煮的，充滿蘑菇香氣，並非一般餐廳用麵粉開成糊仔湯。總括黎講，有機會我會再黎食過，環境新淨坐得都幾舒適，尤其是大熱天時，有強勁冷氣，約埋三五知己，豬朋狗友吹下水食下飯都係不錯選擇。

是日夜收工，又今大雨，經過尖沙咀加連威老道，半邊身濕，在華美達最佳盛品酒店備雨，原來這酒店已改名，真是很大雨，又餓，看到他們有間新開食意大利粉的地庫餐廳，時間大慨7:30. 沒太多人, 清清靜靜幾好, 侍應幾好禮貌問我食咩, 要熱水定凍水先, 看看餐牌, 全部都是意大利粉, 無飯? 最後要了香草三文魚忌簾汁意粉, 包湯, 包茶咖啡, 還可添飲. 蘑菇湯普通, 有點過咸,意粉上枱, 賣相仗, 重簾汁味,I Love It. 三文魚有少少過火, 生生地才好吃, 意粉真的可以, 好味, 醬汁夠入味, 又Creamy整體ok.可惜為什麼沒有沙律或沙律吧, 這樣就好, 這晚人客不多, 可安靜吃東西, 又有免費wifi, 地方不錯, 消費大慨$100晚餐, 尖沙咀來說是平, 可再試.

落雨既晚上，晚上七點左右，晌尖沙咀街頭被佢既鋪外圍板吸引，一百蚊內有一個意粉餐包飲品，似乎食得過。入到去要落一層樓梯，感覺似一般商業大廈既環境。但餐廳入面既環境算唔錯，靜靜地唔多人。食物方面，冇影到相，叫左個黑松露油帶子菠菜麵同蕃茄海鮮意粉。落單後店員奉上餐包，然後同我地講餐湯同餐飲要自己出去拎，自助形式但唔可以refill。餐湯係磨菇湯，有磨菇味但偏咸。兩個麵都比想像中細碟。菠菜麵個汁原來係芝士汁，成個名都冇提過，帶子係okay的，但加埋蒜片就怪怪地，因為個芝士汁偏甜，就算加左辣椒仔都甜，唔太match。蕃茄海鮮意粉都係好甜，呢隻甜食得出唔係來自蕃茄本身，應該落左糖，啲料就有青口、魷魚、蝦、魚同埋又有蒜片。兩個意粉餐埋單二百頭，唔算太貴但唔太值，因為味道麻麻地，同埋雖然個侍應好好禮貌，但其實要個客自己出去斟野飲拎湯但又唔係可以refill真係有啲怪。