麵屋豚豚拍子 x 辛味屋 (Closed)

今日去咗將軍澳搵朋友行街，行到咁上下都有啲餓，就搵咗最就近嘅「豚豚拍子」食啦！打開餐牌都好多食物選擇啊！有唔同款拉麵 飯 連壽喜燒都有，可以滿足唔同人喜好，兩個人、一家人、甚至一大班人都適合，而且仲有晚市自選拉麵套餐，跟set 有埋小食每人都係$100鬆啲！！勁抵食！我哋分別叫咗黑豚拉麵同海老拉麵，我叫嘅係黑豚拉麵，黑蒜油味香濃；仲偷偷食咗朋友個湯底一啖，比我食嘅清，但好香豚骨味，仲有極多櫻花蝦喺上面。外脆內軟嘅炸豆腐自家製餃子🥟餃子好夠肉，煎得好香好豐富好夠飽，食咁多嘢都係$250咋！抵食！

今日跟男友在新都城街街，夜晚見到呢間麵屋豚豚拍子，就入去試一試。呢間餐廳有分豚豚拍子同辛味屋兩間（相信同一集團），今次我地係食豚豚拍子。我地2個人，叫左一個二人套餐，佢二人套餐分兩種一種2種主食加3種小食、另一種2個主食加4種小食仲有野飲。但由於我本身食量唔大，就叫左前者，但係都夠哂食！主食之一叉燒炒飯，味道夠濃，加上炒上黎唔會比人感覺好油～推薦！小食之一餃子，餃子共有六隻，同埋配有餃子汁，每隻煎得啱啱好，外皮脆得黎唔會有焦味。小食之一炸雞肉，大大塊炸雞，估唔到咁大塊，啱啱炸好，夠脆，雞肉好食！另外有沙律醬可以點～非常推薦！最後男友叫左一支波支汽水，絕對係童年回憶！

今日黎左呢食日本野既餐廳，嗌左個二人餐，佢仲包兩款拉麵/飯，再加三種小食！真係相當豐富！最後我地嗌左一碗黑豚肉拉麵，佢要+15蚊，不過絕對係抵食！因為佢個豚肉超軟身，而且口感好正，個湯又好濃郁，相當好味！然後嗌左個叉燒飯，佢d叉燒係日式叉燒,而且份量好大碟，絕對夠食！之後就到小食啦！我地嗌左魷魚，超好咬口，而且份量多！同埋魷魚好新鮮。之後到呢個餃子，勁多勁多餡之餘個皮好薄。最後到雞球啦！好大舊而且兩人份量我地都食唔哂！再點埋個沙律醬簡直絕配！

其實都唔係第一次嚟食，之前黎食不過不失好過冇， 因為亞女鍾意食拉麵配餃子， 所以有時都會嚟依家。 今日叫咗個燒肉定食， 吉列豬扒拼鰻魚定食同拉麵餃子， 吉列豬扒炸得太耐好硬個鰻魚又好乾都算， 最大鍋就係我個燒肉定食啲燒肉同食湯渣冇分別。 跟住同個侍應講好韌完全難咬， 佢再搵過所謂經理好似姓林， 佢竟然答我話啲豬係瘦冇肥肉所以啲肉係咁😰， 我話同食湯渣冇分別，佢堅持同我講話啲豬係瘦所以唔會有肥肉所以係咁。 我問佢可唔可以換過第二款， 佢話只可以換返同款都係答我啲豬都係瘦， 咁唯有算數啦! 其實啲豬點瘦都應該會好似食湯渣咁㗎! 擺明係煮得太耐或者煮完再煮啦!

夏日炎炎，做人母親，提起煮飯，就怕怕。煮餐飯，大汗淋漓，煮完都唔想食，何況還要煮什麼餸菜，都頭痛。平時，我地都喜樂食湯麵的。個仔，唔想我太辛苦，提議到附近的商場，看有咩嘢好食？來來去去，我地始終都是喜愛食粉麵。走進拉麵餐廳，有個二人套餐，正正是好適合我地了。坐下，即點了一個二人套餐，兩個主食、三個小食，份量剛好。自家製餃子：皮薄餡料正，外皮煎得香脆，脹卜卜，美味可口。吉列魷魚圈：即叫即炸，外脆內嫩，配上菜絲一同食，清甜中帶著香脆，一點都唔油膩。炸雞快：酥炸香口，外脆肉嫩，肉質鮮甜，肉汁多，不乾身，可口美味。豬軟骨拉麵：湯底香濃，夠稠，湯頭掛滿每條拉麵，豬軟骨夠稔，豬軟骨的份量比拉麵還要多，拉麵軟硬適中，麵中帶著濃郁的湯，入口滑滑。

今日嚟到這間位於將軍澳新都城中心2期2樓的《麵屋豚豚拍子 x 辛味屋》食午飯。餐廳裝修簡約，大量座位，地方寬敞，坐得舒適。我點了午市自選拉麵套餐黑豚拉麵 + 自家製餃子 + 凍咖啡，合共盛惠$98。黑豚拉麵一上枱已經聞到好香嘅麻油味，湯底濃郁，又有好香嘅豬骨湯和黑蒜味，配料亦相當豐富，麵身硬度適中，爽口彈牙。自家製餃子煎得脆卜卜好香口，肉質juicy。凍咖啡咖啡味香唔太甜總結，有拉麵、有小食、又有嘢飲，$100有抄，都算抵食。

今日同友人係將軍澳睇戲睇戲前就搵地方食飯行到新都城二期2樓聞到好香壽喜燒味所以我哋就決定試吓鋪頭位置算多夜晚都唔使等位我同友人都試左人氣壽喜牛肉壽喜燒😀可以配烏冬或者飯另外如果唔夠飽可以再追加但係我哋都覺得其實份量都差唔多烏冬算有驚喜起碼唔係一煮就會淋收起燒會跟一隻生蛋料有牛肉金菇 菜有小小小份量但價錢72蚊作為晚餐已經算好抵食嘅壽喜燒（要加一架)係睇戲前食到一餐算OK嘅壽起燒都系好開心的一餐😀😀

咁岩黎新都城睇戲，睇戲之前梗係要醫左個肚先。經過依間日本餐廳，似乎係兩間餐廳聯乘，就咁睇餐牌食物種類都幾多，所以膽粗粗決定一試！最後嗌左個壽喜燒牛肉鍋，侍應好快就上左個爐，配料比想像中少，幾片牛肉、白菜、紅蘿蔔片、大蔥、金菇、豆腐、雞蛋同烏冬。依間壽喜燒既湯頭屬偏甜口味，牛肉質地比一般厚身，肥瘦適中，但食落無咩牛味，味道一般，其他配料份量好少，令到成個鍋物都比較單調！唯一可取係佢既烏冬，餐廳預先整熟左，望落好腍身，但係食落算係煙韌彈牙，整體水準真係好一般。

新都城行街街，又到食飯時間，決定食個簡單些既晚餐。辛味屋有多款食物選擇，有拉麵，丼飯，咖喱飯，小食等等，令到我的選擇困難症發作。好吧！就來個拉麵套餐，可揀一碗拉麵和一款小食，$79起。我的豬軟骨拉麵要另加$5,而小食，我 揀咗芝士年糕 ，由於睇唔到要另$10,結果成個餐要90幾元， 抵唔抵就見仁見智啦。食物質素方面， 都可以接受啦 。即係唔算好有日本風味，但亦都唔會覺得好難食。朋友嘅漢堡咖哩飯 ，咖哩汁同埋主菜 ，亦都係可以接受啦。對比起一些賣日本咖哩飯嘅專門店， 係爭咗啲嘅。

今日去寶琳新都城行街，阿囡話呢間 豚豚拍子 未食過，咁就一於去試下啦！Order咗2碗拉麵，一個廣島蠔咖喱飯，燒牛舌同燒魷魚筒，埋單300幾，價錢就吾評論啦，但出品就眞係不敢恭維。拉麵湯底好稀，麵質吾掂，咬落好似食緊上海麵咁。紙咁薄嘅9片燒牛舌，煙韌彈牙，重點係——凍嘅！燒魷魚筒係先烚熟，再求其燒一下，成只白雪雪，一d味都無！咖喱飯有三只吉列蠔，炸粉好厚，裡面只蠔得粒紅棗咁大！食完，阿囡都話中無下次！

呢間鋪頭開左以黎，我都係去過一次，第一次食覺得都唔錯，加上去既時間唔早，人數唔多。星期五晚收工由於時間亦都唔係太早，所以就同老婆去左呢間鋪頭食晚飯。一去到好快就決定叫二人餐，蟹棒拉麵黎到，蟹棒係凍既，根本係係雪櫃啱啱拎出黎放上去個面到，有種冰既感覺。於是就叫店員埋黎講，結果佢話好正常呀，啲叉燒同蟹棒呀好多店鋪都係咁做，係雪櫃攞出黎放上去等啲湯浸熱佢架啦。我地當堂冇聲出，我地食慾大減，食完真係背脊骨落。本來冇寫開食評，齋睇既我都忍唔住要開個account出post, 真係以後都唔會幫襯啦！

星期天，一家人通常都會外出吃飯，見這家沒有試過，於是就來試試。門面已經很有日本風。燒牛肉蓋飯：父親大人就點了這個牛肉飯，看起來跟吉野家差不多，他說沒有太多汁，覺得一般！吉列豬扒奄列咖喱飯：我弟就點了這個咖喱飯，他說還好，不過不失我跟母親大人都是點了拉麵套餐（一個拉麵配一個小食）白豚拉麵：母親大人就點了這個人氣之選配自家製餃子。叉燒肉質鮮嫩，除了叉燒外，還有木耳絲、蔥、筍，十分豐富，但她覺得拉麵太少 🤣自家製餃子：不會太油膩，但是不太熱！豚軟骨拉麵：因為這隻糖心蛋，所以我點了這個 🤣 湯底是特濃豚骨湯底，我挺喜歡這個湯底，因為大多數日本拉麵湯底都很鹹，這個都鹹，但不會太重味。豚軟骨很「林」。至於我就不覺得拉麵太少了，可能我比她多兩個餸，就是豚軟骨跟糖心蛋了 🤣枝豆：因為想吃點蔬菜。這個枝豆是熱的，平時吃的多數是冷的。相比之下我喜歡冷的，因為熱的比較「林」總括來說沒有什麼特別，價錢都算正常，平時落樓下吃都算可以！

上次試過下午茶 50蚊內有個定食幾抵上次同家姐黎食就叫左金菇牛肉卷定食味道👍🏻 亦都唔洗等位 比我印象都算幾好好啦去翻正題 晚餐煩惱食咩 就諗住食呢間大概六點黎到 位置都未坐滿 唔洗等位入得我叫左個蒲燒鰻魚定食 88蚊加一總共97蚊有碗湯加沙律 味道唔錯 但鰻魚整得有d偏鹹要同飯一齊食 飲多幾啖湯 銀包都幾肉赤下😭覺得都係金菇牛肉卷最好食 有啲後悔叫左鰻魚晚餐價錢偏貴 份量都一樣 下次黎都係食下午茶亦都建議大家黎呢度唔好叫鰻魚 真係都幾鹹下☹️

晚飯時間食左個2人份既套餐 240幾蚊 選2項主食 另加3個小食 一個滑蛋豬扒飯 一個面 另加雞串各2串 餃子 同南瓜餅⋯一枝細可樂。甘就249蚊 你地覺得點～主食仲可 小吃除左炸南瓜餅 真心覺得其他無咩特別好食

見仲有coupon 就去依間食,之前食都好正常,但今次食,真係啞左!!!啲咖哩汁,仲稀過啲湯!1:99咁樣溝起佢!同職員講返,佢話係咁,喂大佬,咩料呀?張相係有埋紅蘿蔔,薯仔果啲,連openrice啲相都有,依家剩係得返啲汁咁??好明顯一係廚房偷懶,一係換左個人!!連我朋友果碟都係咁,我覺得要改名叫做咖喱吉列豬扒***泡***飯囉!如果以出面啲咖喱屋係10分依餐我會比果1分,果一分係樓面同同事有笑容only請不要玩食物!!!!