翠華餐廳 (H21商場) (Closed)

同屋企人食飯係最快樂不過嘅事啦！一於去去食茶餐廳中嘅高級餐廳—翠華啦！講真翠華真係我食咁多間茶餐廳入面最貴嘅。入面環境幾好嘅，頭頂有啲鐵吊燈仔、又有舊式嘅藍色木窗框，大大個果啲。好有舊港式風味！一人一個餐～～～一個叫法式黑椒牛柳餐配飯，牛柳就7成熟嘅。果然牛只要7成熟就足夠好食了。另外就係是日晚餐，有炸魚柳、薯仔、腸仔、菜，跟餐仲有紅湯同牛油豬仔。仲有個就叫板燒羊仔扒餐配燒汁，熱檸茶。羊扒有啲羶啦，不過都仲接受到嘅，如果受不了少少羶味嘅人就不太推薦了。

我有朋友你到香港之後， 我問佢想食啲咩。 佢竟然話我最想食係翠華。 我都覺得有少少出奇。 唔知係唔係向內地翠華好出名。 內地人黎到都想一試。 翠華餐廳無論係裝修， 擺設都十分特别。 不過我同其他茶餐廳相比， 好似少咗一份香港味道， 反而好似攞咗一啲嘅高大浮。 食物亦會較貴。 好似佢哋有一啲特定嘅客源， 我都係鍾意食返香港人嘅茶餐廳。

阿女明天就考試喇，今日全力陪佢溫書溫咗大半日，就帶佢去食下午茶輕鬆下先，本來想去大快活但係太多人，唯有去隔離嘅翠華餐廳食，呢間鋪地方都幾大座位都坐得幾舒服。坐低後我點咗個下午茶餐B，香辣瑤柱炸醬撈麵配酥炸魚皮再加熱奶茶，啲撈麵辣辣地甜甜地又煙煙韌韌都幾好食。阿女就要個A餐，至潮魚蛋片頭河，不過佢改咗米線，再加一杯熱檸茶，佢話啲米線好滑，魚蛋好彈牙好好味。

話時話都已經都好耐冇食佢，好耐之前在某間分店(銅鑼灣)食個時味道都可以既，今日夜晚又落雨，在筲箕灣附近又有一間咪打算買黎食，點知今晚買左個外賣黑椒牛柳絲炒意，一打開包裝見到係幾靚的，而且外賣餐具也相當別緻，但味道就令我失望大跌眼鏡啦，第一啖食落去，兩個字形容，係「油」同「咸」已經包含哂向裹面，我食第一啖已經感覺到好多油，再接住吃第二至三啖既時候，個嘴脣已經滿是「油」的，總括而言:貌相2分，味道0分，包裝4分，包裝容量係幾好既，經過呢一次之後都心中有數。。。

今日Lunch食翠華，叫左佢地出名既瑞士雞翼，仲有白芍芥蘭同埋青紅蘿蔔湯~佢地既芥蘭有小小薑汁同壕油味，d菜好爽好有口感~至於碗湯，初時見到碗青紅蘿蔔湯，覺得碗湯面頭咁多油既，但飲落又幾清甜，下次都可用紙巾印印d油先飲~瑞士雞翼好入味，d瑞士汁又唔會過甜，味道剛剛好，正呀

今日來了位於筲箕灣的翠華餐廳吃午餐，點了炸醬撈麵及紅豆冰。炸醬撈麵很美味，特別是個湯，湯味很濃，一喝便知拗左好耐，加埋韮黃，啖啖好爽口，還有三粒雲吞在內，而紅豆冰奶味很濃，正！

色香味美俱不全，鐵板炒即食麵啲麵淋到一個點，湯麵都冇佢淋到咁，同埋一堆時蔬炒埋一碟大兜亂，賣相已經冇， 味道淡，一啲都唔香口，一啲鑊氣都冇，仲要收$69，伏中之伏！

冇去一排又加價lar!加左價,野食好左?質素好左?管理好左?我又唔覺喎。係另一門口排隊等位,情況混亂,都唔知邊個打邊個。早餐款式越黎越多,價錢亦越黎越貴。早餐B,沙嗲醬好淡,牛唔夠濃味,炒蛋都香,包放凍左,唔脆過左氣。咖啡冇事。早餐C,湯唔濃,雪菜都可以,肉唔新鮮,杯檸水出事呀,竟有6片檸檬,我心諗都死死地呀!真係.....苦到入唔到口.....

今朝落筲箕灣食早餐，見到翠華，原來唸住好貴就幫襯隔離大快活，點知原來$35就有，即刻入去食。入到去，接近全場爆滿，好好生意！叫咗B餐沙嗲牛肉麵，普普通通，但杯華田好夠味好好飲。D餐五香肉丁麵，成個餐都普通無特別，連涷奶茶都係。應該唔會再食

下午諗唔到食,又唔想去東大街迫去左十年都唔去的翠華叫左蛋白杏仁茶同京川蝦球炒雙麵超出預期水準蛋白杏仁茶好重杏仁味, 飲落幾潤喉，若蛋白可以散點更好，但杯野幾大件，要留肚飲京川蝦球炒雙麵蝦球都叫彈牙, 蝦子味不太重, 個湯叫左走蔥但最後走d唔走d, 且帶腥味, 好在XO醬夠味唔靠湯只靠xo醬配都很好, 微辣配以杏仁茶我覺得一絕。杏仁茶幫到手解辣，同埋xo醬味道都好出色，只是伴麵的送湯味道有點怪，我又唔食蔥，弄得只用左xo醬撈麵。

在居住的區域，算係最企理，最得體的茶餐廰了！但很可惜，食品水準不斷下降，惟有價錢不斷上升...無論是炒蛋，抑或太陽蛋，都是溫吞吞的，或甚至冷的；通粉上枱時，䁔䁔的；湯也是微暖的； 茶也是䁔和的....味道很一般，沒有什麼期望，亦已經習慣了最氣人是招呼： 差，差，差，待應互相大聲疾呼，呼叫聲此起彼落，無論落單，或安排人客入座...令到食客很受騷擾，無法在安靜環境下用餐！怕怕！ 其他分店好似沒有如此情況

今日行過筲箕灣，將近兩點，過咗最多人的食飯時間，肚餓又想試吓邊頭有特價美食，過馬路見到翠華餐廳，上咗市擴充營業，應該唔會差得去邊。所以叫咗碗魚蛋麵因為抵食$35一碗！仲好試下特色意粉（蕃茄精選），例如西西里式海鮮意。其實炸醬麵都好似好正，因為另外送迷你湯雲吞！今日午餐套餐有香茅豬扒及薑葱豆豉雞，附送茶或咖啡，都係$60左右。佢都有做邊歐陸早餐，中西合璧，同埋特色茶餐，最搞笑的是有溏心風暴効應，下午茶溏心餐2:30-6pm時段, 供應麻辣魚腐魚皮米線，仲送糖不甩或士多啤梨冰。

今日去行山前就去筲箕灣分店食個早餐先，未夠11點都坐無虛席，不過都係等咗5分鐘就有位。叫咗2個餐，B同D餐～＄35 B餐： 沙嗲牛肉麵配炒蛋連牛油豬仔包＄38 D餐： 五香肉丁麵配菠菜炒蛋連牛油豬仔包翠華早餐一向我至LIKE 個炒蛋，因為個蛋真係幾嫩滑～但圖片所見個炒蛋好似少咗一部分咁，分量與平時黃埔分店比較亦相對地少。味道方面，都仍然咁嫩滑～菠菜炒蛋只見到有菠菜絲但小妹實在唔太食到個菠菜，炒蛋都基本上炒到無咩蛋汁，有點失望 牛油豬仔包，上枱時仲熱的而且牛油比例剛剛好，熱辣辣既包的確加唔少分數！2款麵都是公仔麵，不過上枱時都仲有D硬所以要浸多少少，味道還好。

翠華係筲箕灣生意一般始終價位係地區中偏貴但食既野同茶餐廳無異尤其奶油豬永遠都無餐午餐只有中西各一選擇中午叫個西式午餐$61跟一個紅或白湯和餐飲叫左一個菠菜湯好大碗味道偏淡較杰會好飽肚主餐係豬扒配欖油意粉唔要意粉可要飯或焗薯豬扒有兩大塊其實好多意粉都多其實可分兩餐最欣賞係個豬扒好香脆味道和份量已值回票價另外椰菜係底用蒜蓉炒最可惜既係花左錢裝修但坐中央冷氣嚴重唔夠更莫講坐係窗邊有太陽我已經係個唔怕熱既人但食到流曬汗要早點走要等凍點先可以再來食

今日去筲箕灣探朋友隻狗仔，約埋狗仔去行山。為左有氣有力行山，一早就去食個飽肚早餐。出地鐵站行到朋友樓下就有間翠華，見人唔多就入去食早餐喇。雖然好耐無幫襯但個餐牌一直都無變，好有親切感。奶茶依舊茶味香濃，保持到水準。太陽蛋煎得好靚，我習慣用蛋黃汁用來沾豬仔包食。噢…個麪唔夠熱，好似攤左一陣先出餐，已經唔香了😔有點失望。翠華早餐價格相對其他茶餐廳算合理，份量又足夠，如果質量保持到水準就好了。食完呢份早餐已經好飽，行完山都未餓。