好好運快餐店 (Closed)

平時係荔枝角返工，今日去咗半島大廈樓下間好好運快餐店買外賣食，鋪頭店員態度服務好，會幫你預時間整定，令食物保持溫度。今次叫咗主打沙嗲牛肉米粉同一杯奶茶，沙嗲湯底好正食得出有落足花生醬，好濃味。牛肉好多鋪滿碗粉，絕對夠哂飽肚，奶茶嘅茶底又夠濃，正！ 另外又叫咗吉烈豬扒清湯米線同奶茶，呢個湯底係普通味精味道，肉質一般但勝在件吉烈豬食落熱辣辣又大大份有兩塊，成隻手掌咁大塊，米線岩岩好熟唔會淋哂，湯粉貼心分開盒裝，但價錢小貴以快餐店嚟講，兩個餐夾埋食咗$93。總結以言，下次都會再去食嘅。

好好運快餐店唔使我介紹啦，鐘意食沙嗲牛麵都會聽過佢個朵，獲得香港沙爹牛肉麵關注組狂讚，今日我終於有機會去朝聖啦！今日下就一點左右過去，排左10分鐘左右，終於入左去啦。去到好好運唔洗諗梗係食沙嗲牛麵啦，2餸沙嗲牛麵48蚊，我叫左煎蛋炒蛋補充蛋白質，貪心既我仲加左多份雞扒(HKD$13)，減肥係聽日既事，食埋今餐先減肥啦。1️⃣沙嗲牛麵+煎蛋+炒蛋+雞扒+熱奶茶 (HKD$48+13)老實講佢既份量比我想像中大份，雖然煎蛋炒蛋遮住左沙嗲牛，實際上沙嗲牛份量都唔少，我最後食到好飽，嚴重飯氣攻心。味道黎講湯底真係好重沙嗲味，牛肉食落甜甜地，第一啖食落去真心正既，不過食多幾啖開始覺得有小小咸。有個不足之處係價值13蚊既雞扒上到黎，竟然係凍既，真係令我好傷心。總結而言，不過不失啦，如果你比較重口味，鐘意食沙嗲牛可以去食一次。服務質素 : 無咩特別

沙嗲牛肉麵關注組 推介嘅沙嗲牛肉麵今次跟關注組推介專登去試食😆超級抵！$48 一碗沙嗲牛…. 都仲可以自選2 樣配料（腸蛋腿etc）…. 仲再包埋嘢飲！🉐沙嗲味幾香濃，有花生香，味道幾有層次。另外大光麵煮得剛剛好，仲彈牙唔會腍哂😌當日星期六早上11點左右到，好好彩唔洗排隊就食得。食完12 點左右已經有人龍了。如果怕好長龍，建議可以早小小到，避開午巿人潮🙂唔知係咪全港最好沙嗲牛，但一定係性價比高，味道不錯嘅沙嗲牛😋 值得一試🥰

今日去完荔枝角買生果之後，抱住撞彩心態，睇下要吾要排隊先食到沙牛麵餐。點知第一次去幫襯吾使排隊就可以直入坐低叫野食。當然叫沙嗲牛肉麵餐喇，我配餐肉煙肉。一上枱無諗過有2塊餐肉2塊煙肉，啲餸多過啲麵，但系佢既沙嗲牛肉味道並吾系我杯茶，吾重沙嗲味，加上牛肉有筋。所以我會系第一次去食，亦都會系最後一次去幫襯。

終於去左試沙牛group大推的好好運🤩之前舊舖多人到好變態，見搬左新舖好似少啲人，就去試！小妹晨咁早平日7點幾去到，唔洗等直入！早餐自選3款餸配湯粉#沙爹牛肉紅腸反蛋米通 🐂個日唔想食公仔麵，所以叫左米通😝份量好大碗，沙爹味真係濃，帶甜味，唔辣，似落左啲乾蔥頭，沙爹牛撈左落湯度都仲係濃，唔係死鹹味，沙爹湯加埋煙韌米通好正😍。紅腸超厚切，比較硬，小妹鐘意切薄啲。反蛋都做到蛋黃流心，冇蛋腥味不過蛋香欠奉。可能因為揀米通所以有三色豆係度，小妹見大家介紹係有蔥花的，可能公仔麵先有，介意三色豆既朋友仔要注意喇。店入面有一箱箱大光麵，有機會下次試下麵底先～HKD37#熱檸水小妹鐘意清新檸檬配濃味食物，感覺冇咁漏🤗#好好運#荔枝角

搬鋪前去過一次，搬鋪後係第一次去，鋪頭有d難搵，因為藏咗喺大廈入面地下樓層，門口唔喺馬路邊。新鋪比起舊鋪大咗唔少，座位多咗好多，裝修格局同其他茶餐廳好相似，不過我就覺得少咗一份親切感😜，同埋d座位都坐得幾逼😦食晏時間去，排咗一陣隊，點咗腸仔炒蛋沙爹牛肉麵餐 HK$48，蛋炒得好滑，沙爹牛味道同以前一樣咁正，份量亦唔少，加埋唔少蔥落去一齊食超正，唯一係如果俾多少少沙爹汁落個湯度就更好啦😝😉好多人話個酸辣豬扒都好得，下次一定去試😋

呢間沙嗲牛肉麵名店都食咗兩三年，由以前喺荔枝角工廈街舖食到而家青山道半島大廈舖位。近幾個月突然吹起一陣沙牛風，突然將呢樣香港茶記早餐名物推返上神枱，搞到有一段時間要排隊先有得食到好好運，實在太誇張。有網民仲話排隊排幾粒鐘都要食到佢，個人覺得呢個麵雖然好高質素，但係食個早餐排咁長時間真係唔值得。　我通常都係早餐時段去，佢哋嘅「百搭早餐」套餐，三十幾蚊可以揀三樣配料，仲有一杯餐飲。話到明係全港最好食嘅沙嗲牛肉麵，穩膽當然係沙嗲牛肉，另外兩款配料揀咗炒蛋同埋餐肉，其他枱食客好多都會揀紅腸，我都食過幾次，質素係唔錯。重點講一講湯底，呢到沙嗲汁好濃好香，有好明顯花生香味，湯底另外帶少少甜，所以好有層次，相信湯底係佢優勝於其他早餐嘅原因。講開又講，話就話沙嗲牛肉麵係香港地道茶記名物，但要整得好食卻係一啲都唔簡單，好好運應該係最好示範。牛肉質地夠嫩滑，鬆肉粉唔會太狼死，當然冇得同高級牛肉比啦，但以早餐牛肉質素來講算係相當唔錯，對得住佢價錢。麵底亦要用上大光麵，夠晒掛湯，同沙嗲牛肉係絕配。

兜兜轉轉。都係荔枝角返工。又再搵食啦喂一個人午餐。唔駛等位。唔駛就人食咩。自己話事。即場轉場亦得！首選祥仔！ 不過都係偏高價位（但絕對值！俾番同等價值或以上食物質素你）有米通！靚女一定揀啦！紅腸。炒蛋。茶走正常熱飲size (不是奶茶杯）茶底夠哂濃。但飲到底有啲酸。絕對中我口味全相厚切紅腸。一片頂出面，2、3 片個牛濃味。帶甜。微辣。肉質淋食到尾都仲有牛牛。加分蛋蛋好滑。有蛋汁。再加分team lunch又要同同$50 有找叔叔話凍熱飲都係+$8大家識揀啦事食。不了。做到朋友就另計。lunch is recharge

朋友新公司開張，走去慶賀，聽他介紹有一間很好味的沙嗲牛肉麵，位於荔枝角站步行几分鐘就到，門口只有直拉架。不太顯眼，好容易走漏眼。拉門入去大大個招牌“好好運”，其實，地方有些迫，枱和枱之間很近。當然點了出名“沙嗲牛肉麵”，可以配多兩個餸，選了雪菜肉絲和煎蛋，友人選了香腸，飲熱奶茶。牛肉份量很多，很重花生醬和沙茶醬味，又略帶甜味，牛肉算嫩滑，公仔麵煮得剛好，絲袜奶茶冲得很濃很滑，很好飲。冷氣可以，接待員下單和上餐都很快，餐具似宜家買的金屬系列。整體算是好食，由一間小舖做到中小型餐廳，主打一道菜，一定花了不少功夫，要支持。

今日喺附近做嘢，緊係把握機會試下好好運嘅沙嗲牛麵啦😋今次真係好好彩，唔洗排隊～餐廳好犀利，不停有人入嚟食～ 我嚟嘅時間係九點幾～百搭早餐$37可以任選三款配菜我揀左 沙爹牛肉，炒蛋，紅腸牛肉份量好多，紅腸有兩件～沙爹牛湯底略嫌鹹左啲，牛肉質地唔會好鞋～紅腸係厚砌，煎得幾香～炒蛋都滑嘅～ 食完都幾飽下雖然唔知係咪全香港number one但相對出面好多沙嗲牛麵，依間的而且確係好食嘅如果唔使排都可以再去食下

好好運應該大家聽過，沙嗲牛好出名，今次試下另一款豬潤米豬潤係大大件厚切，豬潤好爽口，同有豬潤味，米唔會好易碎，浸耐左都係咁有咬口。湯底有濃濃嘅豬潤味但唔會好腥之前食過，但唔洗3個月就加左價，要$4x 先有沙嗲牛麵，加野飲就要加$2x ,其實都幾貴，不過一次半次唔緊要

好好運佢搬遷嘅時候，猛車邊排到去入去食，但係已經冇晒牛肉，就唯有沙嗲汁都照殺！今次嚟到新店，喺商場嘅停車場地舖，雖然有少少隱蔽，不過都無礙一大班人排隊，齊齊食個正lunch! 📍沙嗲牛紅腸太陽蛋米通沙嗲牛唔使講，一定係傳統茶餐廳嘅味道，夠濃夠沙嗲味！紅腸都係另一個好好嘅選擇因為佢都幾厚身，絕不欺場！而太陽蛋就好成功煎到脆邊！不過男孩子可能會唔夠飽，因為少咗塊多士。兩個人嚟嘅話，可以嗌多份油多烘底share食👍🏻一定要試佢嘅米通！佢好似通粉嘅長版、意粉嘅粗版，但係通窿嘅！呢款應該係以前細個阿爸阿媽先鐘意食嘅粉面，唔係度度有㗎，所以記得試吓！📍紅豆冰 (+$8)一場嚟到天氣又咁熱，嗌得凍飲嚟，不如加多幾蚊要杯紅豆冰！呢度啲紅豆唔算多，不過就算起到沙！略嫌隻匙羹細咗少少好難"不" 😂😂已經好滿足啦！今日係星期五都等咗成10幾分鐘，可能lunchtime真係太多人！

今日去好好運快餐食沙牛麵，真是名不虛傳。叫左碗沙牛餐肉紅腸麵，好多牛肉、兩塊厚切餐肉同三分一條紅腸。沙牛好濃嘅沙嗲味，麵亦好爽。如果經過荔枝角，不妨到此試下。希望大家支持一下。

呢間位於荔枝角出名食沙嗲牛嘅茶餐廳應該冇乜人冇聽過🤤如果係沙嗲牛肉麵關注組嘅成員就肯定識😁佢哋比網民捧得咁勁 所以今次肥妹仔都特登去朝聖下先🤤 沙嗲牛肉湯麵🐮+兩餸 $48 *圖中係浄沙嗲牛肉麵 老實講 價錢黎講唔算平 中上價錢🤔不過質素真係唔差😋沙嗲牛好濃好多 幾乎每條面都掛到汁☺️仲要牛肉份量好多 食極都仲有咁😂牛肉幾淋 唔會好韌👍其他鎹我就比較推薦煎蛋同炒蛋🥚煎蛋就流心蛋黃 一啖咬落去勁滿足😌炒蛋好滑 係半熟狀態😆如果大家鍾意食鹹嘢嘅話 都有洗腎之選榨菜肉絲🐷榨菜比出面嘅鹹 好夠味😝不過加埋沙嗲牛 成碗野就有啲太濃味😅佢哋仲有其他粉面選擇 例如出邊比較少見嘅米通都有🤤我哋今次就揀咗麵黎試下 不過可能人太多啲單好趕 啲麵真係硬咗少少😅不過食到後面浸咗陣就正常返 整體來講都係好好食🥰不枉長期係關注組討論度TOP3 仲要係有讚冇彈👍🏻 茶餐廳嘅位置就格攝咗少少 係喺大廈停車場入面🤔lunchtime時間長期都排曬隊😋係值得大家山長水遠去食一次㗎👍🏻

新開嘅好好運係荔枝角開咗一排💖今日終於走左去食🤣分量大大碗🔥份量超級多基本上一啖面一啖肉🤣🤣沙嗲牛肉堅好味🤟🏻味道香濃💃🏻不過食多咗嘅時候就會覺得有少少鹹但係呢重重口味🤣就係沙嗲牛肉吸引之處 💖跟餐叫咗杯雜果賓治嫲嫲地糖水味🤣跟住唔係好覺飽叫咗個吉列豬扒❤️唔算醃得好勁肉質彈性唔痴牙🤟🏻