鏞記酒家

Open Now

Now Closed

通常去鏞記食晚餐居多，今次就試下晏晝食飯，點心種類唔算多，不過貴精不貴多，相信樣樣都有一定既質素。原來鏞記既點心全日都會供應，夜晚都可以飲杯靚茶，嘆下一盅兩件！😉🥢蜂巢鬆化炸芋角不嬲都唔好炸野，但呢個芋角炸得金黃酥脆，都忍唔住食曬一舊。芋頭味好濃，一啲油溢味都無，面頭炸到好似蜂巢咁亂中有序，裡面就係綿綿既芋頭！☺️🥢咖喱荔芋金錢肚芋頭蒸得綿密，入口即化，金錢肚都洗得好乾淨，無牛騷味，經過長時間既醃製，每舊牛肚都被咖喱醬包住。咖喱醬絕非一般貨色，香料味突出，辣中帶甜，好食😍🐥四寶淮山鮮雞紮四寶姐係新鮮雞件，魚肚，豬肚同冬菇，再用淮山條紮住佢哋🫔！雞肉滑嫩，不過有骨，要小心食。餐廳選用真既魚肚，蒸至入味。每樣食材都係真材實料🫶🏻，食得出原汁原味！🐖炭燒蔥油叉燒包賣相雖然唔係好靚仔，但味道搭夠🥰！叉燒醬甜而不膩，肥瘦適中，蔥油中和左口腔既甜度，高水準之作。🫶🏻🐄陳皮淮山牛肉球一上檯就傳黎陣陣陳皮甘香味，牛肉球充滿肉味，用上新鮮既牛肉，爽脆既淮山增加左口感，減輕肉肉帶黎既負擔。😋🥢XO醬臘味蘿蔔糕蘿蔔糕好足料，有臘肉，冬茹，乾瑤柱同蘿蔔絲。用XO醬炒好惹味，連埋洋蔥絲同翠綠既青蔥一齊炒，滋味爆燈