兄妹越南粉

Open Now

Now Closed

食完《兄妹越南粉》、終於體會到喺香港經營越南菜嘅人性化之道。以前食越南粉絕大多數係啲連鎖店、一種越南街頭庶民美食嚟到香港可以賣到好貴。但《兄妹》係首次見到越南菜餐廳中最感動嘅價錢、而佢嘅價錢平、並唔係唔好食。小店經營人氣高、一支公嚟應該搭硬抬。佢呢度啲pho好似冇出面咁多花臣又生熟牛或火車頭之類、Lunch Menu比主餐牌優惠又有想食嘅pho 當然係叫lunch。【越南生牛河】上菜時生牛肉浸熟位程度約五成、出面叫碗生牛河、遞嚟都浸熟到七、八成。個湯第一感覺係清淡、所講嘅清淡唔係淡而無味、係清甜唔會好濃厚嗰隻、飲完唔覺頸渴咁就明白係咩一回事喇啩？個青檸比較出味、好明顯帶出酸味（已經冇用手摙）值得一讚啲「青」料好多、啱哂我最鍾意食粉麵多蔥、有香葉、洋蔥、少量芽菜。唔覺意啪到粒辣椒都幾辣嘅。另外河粉極充裕、啱哂上班族唔怕食唔飽、出面真係好多都份量偏少。就算只講Quantity、呢下都拉高咗CP值。【香茅雞扒湯粉】不過不失、個人喜好越南粉一定牛河好食啲、雖然聽聞越南當地雞河正啲、呢碗勝在真係唔油膩、見過其他店成碗湯係雞油。呢個椰菜絲雞絲沙律真係超值、跟餐只+$8一定要加、汁又好開胃、有驚喜。