深井陳記燒鵝 (民泰街) (Closed)

【九龍城區】【深井陳記燒鵝】呢排唔知點解鬼咁興食燒鵝，搞到我的燒鵝癮都起晒。不過聽講坊間嘅燒鵝店好多都質素參差，我又未夠膽北上食燒鵝。因為聞說深圳河以北嘅食肆有機會會用一啲化學藥劑去令到食物嘅表皮變得香脆，而嗰種脆可能係維持到好耐嘅，諗起都提唔起興趣。所以都係決定幫襯返香港嘅老字號，而香港嘅老字號都不外乎嗰幾間，我今次就幫襯一間開得比較多分店嘅「深井陳記燒鵝」。近年聽過唔少講法，話呢啲老字號嘅質素都每況愈下，但係我覺得爛船始終點都有三斤釘，點都會係比求其揀一間更加可靠。我去咗佢哋嘅黃埔分店，叫咗個 $145 嘅「原隻陳記燒鵝髀飯」嚟食，鵝髀梗係「唔斬」原隻咬先過癮。食落果然唔錯，唔算勁好食，但算係有水準。配埋碗生麵，再加 $8 要杯「凍奶茶」少甜少冰多奶，成件事夾埋 $153，算係香港人嘅一種享受嚟。。。（地址：紅磡民泰街26號地下E1號舖）