鏞記酒家

Open Now

Now Closed

好耐無同屋企人嚟鏞記食飯，今次我地要求坐地廳，睇吓個新裝修，好好彩有卡位比我地，阿爸阿媽仲響度話當年，話佢地以前拍拖都成日嚟坐卡位。 一坐低梗係要食酸薑皮蛋啦，呢度啲皮蛋隻隻溏心，食完即時胃口大增。 再嚟係炭燒燒鵝拼叉燒，叉燒夠juicy，燒鵝皮香肉嫩，充滿炭燒香味，同出面食嘅好唔同！ 其實坊間都好多羊腩煲，價錢差距都幾大，今次即管試吓鏞記個古法蝴蝶羊腩煲，睇下佢有幾巴閉！蝴蝶腩果然比普通羊腩肥美嫩滑，加埋啲入晒味嘅枝竹、冬菇同馬蹄等配菜，絕對係大滿足！ 我最鍾意食脆口嘢，於是叫咗個椒鹽吊片，吊片炸得幾香口，食落又唔會太油立立，正! 羊腩煲已經好補，所以我地打消咗叫蛇羹嘅念頭，叫咗個沙參玉竹燉大斑濃湯，個湯用料十足，非常鮮甜，我地連湯料都食得乾乾淨淨。 呢碟生炒糯米飯，除咗臘味香濃，啲糯米仲炒到粒粒分明，口感同味道都好like。 最後只係叫咗一碗紅豆沙同芝麻糊share，因為實在太飽了。紅豆沙同芝麻糊嘅水準唔錯，而家已經好少地方食到咁靚嘅中式甜品。  成餐飯最開心嘅竟然係阿爸阿媽，因為佢地一邊食飯一邊回味「那些年」。