PappaRich Malaysian Delights (Closed)

馬來亞嘅食物我唔係食過好多，但係呢一間真係食咗之後我都好難去忘記佢。 呢碗蝦麵真係好好味， 淨係見佢碗入面有兩隻大蝦，已經好吸引。爸爸話食蝦麵一定要飲佢啖湯，湯嘅味道好蝦，飲落去辣辣地。 除咗蝦之外，蝦麵嘅餸仲有菜有雞肉有蛋，夾住拉麵嚟食真係好夾好惹味。 呢度嘅串燒好有濃香嘅燒烤味道，點嘅沙爹醬雖然係有花生但係 係甜甜地又唔會辣，串燒點咗係好香，食完串燒仲可以食埋側邊嘅青瓜、洋葱嗰啲配餸，食完唔熱氣。 食完蝦仲可以食埋胡椒炒蟹，如我所知胡椒炒蟹係星加坡嘅熱門菜式，無諗過呢度都有得食。一送上枱胡椒味香到個個都大讚，枱上準備咗食蟹工具，有較剪、有夾，仲可以用手套唔洗怕污糟，蟹就係好大隻，啲殼都幾硬，我都要用好多力先可以剝開殻，但係食到入面啲蟹肉，好甜好甜好鮮甜，點辛苦剝殻都抵！ 酥餅夾香蕉，好似好新穎，我真係未食過，塊酥餅又熱又香又脆，夾埋香蕉嚟食，香蕉溶溶地又有香甜嘅香蕉味道，原來可以好夾！