玖捌 (Closed)

上次嚟九龍城食飯已經留意到玖捌呢間特色飲品店，呢日同同事收工落九龍城買嘢諗住順便入去買杯野飲，先發現原來裏面仲有鹹食同甜食提供！見有bagel又有甜品，賣相精美好吸引，我地索性喺度坐低食埋野先走。☀️百子奶茶(左)同一般奶茶唔同，百子奶茶原來用咗椰子奶，唔怪得入口有陣陣嘅椰子清香，質感非常順滑，甜度適中，同時茶底夠濃，茶香十足，而且冇苦澀味。椰子奶同茶底比例完美，兩者味道平衡得出色。☀️玄米茶杏霜(右)同事嘅玄米茶杏霜，我都試咗啖，自問本身唔係特別喜歡杏霜嘅味道，但都覺得呢個杏霜味道好清新，味道天然，同時又有玄米茶嘅香氣，甜而不膩，幾有驚喜！☀️十穀貝果+黑松露點點醬店員好細心，問我地個bagel鐘意食脆啲定唔洗咁脆，我哋兩個都揀咗要脆身。Bagel果然烘得香脆，內裡保持煙韌，食落仲有陣陣嘅天然穀味。不得不提係店家自製嘅黑松露點點醬，一打開個醬盒，黑松露香味已經四散，非常足料，質感香濃軟滑，同bagel簡直係絕配！☀️Poppy Seed Bagel+龍蝦點點醬外表香脆，poppy seed食落亦係脆卜卜，內裡綿密，有陣淡淡嘅甜味。自家製嘅龍蝦點點醬同樣出色，十分鮮味！同埋真係食到龍蝦嘅味道！