Amaroni's New York Italian Restaurant & Café (又一城)

Open Now

Now Closed

我同老公今晚返城大上完堂之後行又一城，途經一間意大利餐廳，俾佢既時尚格調擺設吸引，加上燈光柔和氣氛浪漫，就入去試吓。坐低之後，侍應捧上熱辣辣香噴噴麵包籃，蘸黑醋橄欖油，食落好香。點了個季節限定的意式釀花菇做頭盤，餡料應該用了菠菜、蒜蓉加麵包糠做釀料，上面脆，下面冬菇軟淋，加上有啲蕃茄沙沙夾埋一齊食，幾好味，一共6個都唔少。再點了個海鮮意大利飯同麻辣雞肉薄餅2個share 食。海鮮意大利飯海鮮有蝦、魚、帶子、青口，都係正常類別，不過份量多。每口飯都係有海鮮加上大量新鮮蕃茄肉，幾難得。個汁調教恰當，食落唔太酸，我哋都滿意。麻辣雞肉薄餅呢個同樣係季節限定，有8件，感覺份量超大。味道方面，麻辣味好有四川既感覺，食落嘴唇係麻既，d麻辣同雞肉好夾，加上芝士同洋蔥，食落好香口，難得唔油，絕對推介。個薄餅底外脆內煙韌，有嚼勁。士多啤梨芝士餅雖然好飽，但都要食甜品。美式嘅食物果然份量超大。雖然已經點了細份的，同樣好大件，比出面一般既餐廳大起碼半件有多。香濃軟滑芝士加埋香脆可口合桃碎餅底，加上甜酸士多啤梨醬，真係幾飽都要食。