大宅

Open Now

Now Closed

今日帶屋企人去咗銅鑼灣Mira Moon酒店入面嘅中菜廳「大宅」，餐廳環境幾有格調，好有中式風格，坐得舒服又夠靜，啱晒慢慢嘆茶食飯。 頭盤江西豆腐同金沙白飯魚已經有驚喜！豆腐外面香脆入面質感滑溜到似燉蛋，豆香好出；白飯魚炸得酥脆，蛋白鹹香重頭戲大宅佛跳牆果然名不虛傳，湯底濃郁到起膠，花膠、鮑魚、瑤柱燉到入味，飲完成個喉嚨都黏住啲精華，真材實料。 蟹黃銀針配玉帶，蟹黃醬鮮味濃到好似海鮮精華液，加埋厚肉帶子，口感同味道都好有層次花雕蛋蒸虎蝦球亦係高水準，虎蝦大隻爽彈，蒸蛋吸晒花雕酒香但又唔會好濃酒精味，連平時唔鍾意酒味嘅細佬都清晒！ 拔絲咕嚕肉玩味十足，外皮脆到有聲，咬落酸甜平衡，拉絲效果仲可以玩到成枱糖絲 香煎一夜鮮麒麟魚火候掌握得啱啱好，魚皮煎到金黃脆口，魚肉依然嫩滑。蝦子花膠濃雞湯手工拉麵，湯底夠濃麵質彈牙，不過對比起啲花膠冇佛跳牆嗰啲咁入味，反而濃啲雞味。甜品芋茸燉鮮奶好有心思，芋頭茸打得好幼細，燉奶滑到似食緊慕絲，甜度剛剛好唔膩。