築間酸菜魚

喺網上見到有人介紹呢間全港首家台式酸菜魚，一直都俾佢嘅環境設計風格吸引，佢哋係用漫畫做主題，好有創意好特別，今日終於有機會去試吓！我哋嗌咗細嘅嘉義砂鍋魚，雖然佢寫1-2人份量，但我覺得份量超大，真係要兩個人先食得晒，而且十分足料，除咗魚，仲有好多唔同嘅配菜，例如白菜、金菇、雲耳、芋頭同埋粉面，食晒嘅話真係超級飽肚！魚非常嫩滑，好好食，就算份量好多我都清晒！更加值得一提嘅係佢嘅湯底，非常濃郁，好有鮮味，配埋魚肉一流！另外我哋叫咗雞軟骨同埋小酥肉，兩碟都係即叫即整，熱辣辣，我特別鍾意小酥肉嘅味道，椒麻口味，有少少麻香，稱唔上辣，但成個口味好夾好正！飲品我哋嗌咗可樂同埋冬瓜檸檬茶，冬瓜檸檬茶絕對值得一試！只係貴可樂$3，就可以飲到好似去咗台灣夜市先飲到嘅飲品，非常地道，而且好清爽！最後甜品我哋分別嗌咗個紅豆仙草同埋冬瓜黑糖奶凍，作為結尾非常滿足！