麵屋一燈 (Closed)

尖沙咀間麵屋一燈已經想試好耐, 有日襯住喺尖沙咀附近, 就突登行過去海港城試下。夜晚7點幾, 門口已經有一條人龍, 大概有十幾人左右, 等咗廿分鐘左右就入得。一燈嘅環境唔錯, 枱與枱之間有距離, 有一定嘅私隱性, 唔會講乜都俾隔離枱聽到。佢嘅menu其實唔算多款式, 我就叫咗佢主打嘅濃厚魚介沾面。同其他拉面店唔同, 一燈係無得自行選擇面嘅粗幼同配料嘅份量, 所以喺點餐紙tick咗想食嘅野後就交俾店員。等咗大概廿分鐘, 終於都上菜, 算等得幾耐。個餐有碗魚介濃湯同埋一碗沾面, 除咗沾面之外, 仲有兩片肉同埋一隻切開兩半嘅溏心蛋。一燈沾面嘅屬於粗面, 所以掛湯能力比較好。魚介湯非常濃味, 未食已經聞到一大陣魚乾味, 由於沾面本身無味, 所以混合咗魚介湯一齊食, 可以淡化魚介嘅咸味, 味道啱啱好。湯入面仲有兩粒豬肉丸, 有意外嘅驚喜。雖然138蚊碗沾面有啲貴, 但間唔中食一兩之都ok.