麺匠 真武咲弥 (Moved) New Location

成日一個人食飯都怕尷尷尬尬，所以我比較鍾意食拉麵，因為唔使同人面對面，以免尷尬癌發作。收工之後行去灣仔地鐵站，成日都經過呢一間拉麵店，今日終於可以一試。佢嘅裝修走比較平實嘅路線，冇誇張招牌，亦無鋪張嘅宣傳。佢嘅湯底只有三款，炙り味噌、炙り辛味噌同炙り醬油，仲有兩款小食， 選擇唔多。今次叫咗炙り味噌拉麵加大，其實唔使嗌加大份量已經好多，見到師傅用鐵鑊大火大炒個湯底再上碗，第一啖飲落去個湯係熱辣辣，難怪叫炙り。味道比較濃郁，似返日本北海道嘅口味，比較鹹，我個人比較重口味，所以我都幾鍾意。面條屬於粗身，能夠做到掛湯嘅效果，而且麵條煮得剛剛好唔會過分淋，口感層次唔錯。佢嘅配料加上薑蓉同白蔥，香港拉麵店比較少選用呢兩種配料，但配上叉燒，味蕾上的層次更加豐富，仲有有少少解油膩嘅作用。只可惜叉燒比較普通，而且厚度不夠，亦唔夠juicy，如果用火炙燒可能會更加好。整體來講，呢一間拉麵嘅質素絕對唔差，不過附近好食嘅拉麵比比皆是，呢一間真係會比下去，見到佢有一個下午茶餐好抵食，有機會再嚟試試下午茶。