蘇浙滙

Open Now

Now Closed

蘇浙匯雖然貴為米芝蓮一星食肆，價錢亦只屬中價，但週末午市客人竟唔算多，可能位置太偏僻吧。 呢碟佢叫黑叉燒嘅菜，其實類似黑豉油煮紅燒肉，入口甘香無肥膩感覺，份量唔多但以肥豬肉嚟講份量剛剛好。 麵筋時蔬，咪以為素菜就好健康，嗰幾舊麵筋簡直係罪惡之源，索晒所有汁，冇切到碎晒大大舊原舊食，所有索咗嘅汁鎖晒喺舊麵筋入面，食落有麵筋口感又有油香，正!不過可能仲肥過豬腩肉!哈! 蘇浙湯包，唔知係咪特登唔叫小籠包，因為而家啲小籠包好似鬥皮薄，呢度湯包嘅皮就偏厚。不過印象中呢啲先至係以前食小籠包嘅風味，皮厚厚哋先有麵粉味，先似食緊包嘛... 炸春卷就普通，略嫌過火。 甜品方面，湯圓正常水準，湯入面有桂花但飲落無桂花味，只係煮完湯圓嘅水一碗。綠豆糕味道冇乜驚喜，口感就不俗，冇散開亦唔黏口。 總括嚟講，呢度比起坊間賣類似食品又級數近似嘅連鎖餐廳一啲都唔輸蝕，不妨行多幾步一試。