HABITŪ table (Closed)

媽媽最近鍾意咗用某e app訂枱，今次見到灣仔habitu晚餐有半價就的咗我出去食晚餐。叫咗一份Luxury All Day Breakfast，入面有toast、啡菇、煙三文魚、腸、煙肉、車里茄、茄汁豆同炒蛋，真係好豐富。炒蛋熟得剛剛好，仲保持到水份，亦都好有蛋香。多士配有玫瑰草莓果醬，個醬真係好香！平時好怕啲玫瑰味會好假好藥水味，但佢完全唔會有果種感覺，而果醬入面都見到草莓肉同玫瑰花。接住係Gilled Chicken Quesadillas，入面有菠菜、芝士同雞肉，另外配上三款醬，味道一般都唔太多講。越精彩緊係要放喺後面，黎habitu緊係要食下佢嘅cake。媽媽叫咗玫瑰芝士蛋糕，賣相超吸引！玫瑰味亦都係好香濃，但係自然嘅玫瑰味，連本身麻麻地鍾意玫瑰味嘅我都食多咗幾啖～我就叫咗開心果千層蛋糕，個蛋糕每一層都做得好平均，而且cream同皮嘅比例係1:1，唔會好似外面一啲千層咁cream厚過皮好多。面頭嘅開心果同杏仁碎都加咗焦糖整到佢脆脆地，帶點香甜感覺唔會淨係食cream咁溜。下次一定要再黎食佢地嘅cake!