君綽軒

Open Now

Now Closed

北角海逸酒店的中菜廳 傳統中式裝潢有海景午市有點心亦可以散叫其他菜式點心頗有特色而且高質 樣樣新鮮熱辣必點推介《和牛燒餅》酥餅皮好出色鬆化，完全唔油膩好難得，和牛餡料超濃黑椒味勁香。《潮州粉果石榴球》粉紅皮夠哂吸晴，裡面有齊芹菜花生肉碎配搭自家辣醬無得彈。《鮑魚燒賣》有原粒爽彈鮑魚仔，燒賣亦做得出色。另一特色點心有《黑糯米櫻花蝦帶子腸粉》大量帶子，面頭撒滿櫻花蝦提味，個黑糯米腸粉就食唔出太大分別。《海皇冬瓜盅》一盅二人份量啱哂人數少的時候，雖則係迷你，但裡面的海鮮勁足料，可能真係太重料，味道偏濃，如果清啲會更好。《胡椒大花蝦》用上大量香蔥爆胡椒，惹味帶胡椒辣勁。《醬香碌鵝》是甚少中廚有繼續做的一道傳統工夫菜，鵝肉出奇地嫩滑 一點都不老不鞋，醬汁鹹鹹甜甜好特別 比滷汁更夾。聽說這道菜很考工夫，難怪咁少見，舌頭又長知識了。《北海道鮮准山百合銀杏炒蘭度》充滿口感養生菜，鮮准山百合真係唔同啲，無敵爽脆。《XO松露櫻花蝦蟹肉炒飯》出色的炒飯真係越來越難得，飯粒分明仲要有脆香櫻花蝦，XO松露超香惹味。《生磨鴛鴦露》就相對失色 合桃同腰果味都很淡有點稀。