金金日式燒肉店

Open Now

Now Closed

今晚同中學同學黎食日式燒肉，最驚喜係原來冇限時，任坐唔嬲，最岩傾計。有個二人套餐，我地五位冇叫到，揀左散叫。芝麻阿波雞軟骨好食，脆卜卜，新鮮熱辣炸起。熊本A5和牛肉眼我麻麻，我唔係甘鍾意甘肥，油花甘重既肉。24cm澳洲M9和牛壺漬真係幾長，我覺得好食過A5和牛，唔韌唔鞋又有肉汁。嚴選厚切鹽燒牛舌雖然都唔係好厚，但味道唔錯。西班牙黑豚腩肉(梅子味噌)我覺得麻麻，我唔鍾意食豬腩肉。網燒雞腿肉(意大利香草汁)唔錯，雞肉嫩滑。生菜盛盒得六片生菜，完全唔夠食。柚子讚岐冷烏冬好食，但個汁唔重柚子味。溫泉蛋紫菜冬丼幾好食，甜甜地，用作飽肚之用。香蒜酒煮蜆湯冇乜特別，清清地。