源峰 (Closed)

源峰都食過好多次，晚餐午餐都成日會去，今次要再讚嘅係佢嘅熱食，今個晚餐完全冇食壽司刺身，只係不停叫咗啲鍋物及已煮熟嘅肉食，除咗刺身壽司，要讚多次佢哋嘅熱食質素，令我個胃暖笠笠，非常滿足。先嚟一個牛舌，佢嘅煮法令我喜出望外，啲配料夾埋一齊食令牛舌嘅味道提昇，佢哋煮牛舌同平時我喺其他日本餐廳食開嘅燒牛舌好唔同，個牛舌冇燒至全熟，令整塊牛舌更軟熟入口，非常好味。呢個係牛扒，塊肉都好新鮮。呢個係和牛鍋配飯，啲湯差啲俾我哋飲哂，如果唔係叫咗其他嘢食，可以再加多一份嚟食。呢張相點解咁濛，因為個煲蓋一打開就出哂煙，香噴噴，啲吉列豬肉好嫩滑，唔熱氣。佢個底有滑蛋及香菇，送飯真係一流！叫咗咁多嘢食，兩個人共$1,200。