船渦

Open Now

Now Closed

冬天當然要繼續打邊爐啦，今次就同朋友嚟咗銅鑼灣呢間主打一人一蒸氣鍋餐廳 — 船渦。餐廳座位非常寬敞，我就鐘意靠窗嘅高枱，可以同朋友、另一半拍住坐傾計都方便啲！呢度有多款套餐選擇，每款名稱都非常特別，我哋今次就揀咗九品芝麻（$218）同八府巡按（$388），已包咗前菜、炸物、海鮮、肉類、丸類、蔬菜同甜品。前菜係三款刺身，有北寄貝、甘蝦同帆立貝，雖然唔算好大件，但食得出幾新鮮。炸物就分別有章魚燒、芝麻雞翼同雞軟骨餃子，比較鐘意芝麻雞翼，炸到香脆可口。主菜當然係海鮮啦，呢度有自家水缸所以全部海鮮都係睇得到嘅新鮮！等個蒸爐夠熱，就可以放上去蒸，而枱面上貼住每款海鮮建議蒸煮時間，跟住做就無問題！其中龍蝦肉質細膩彈牙，味道鮮美，鮑魚肉厚軟腍，蟶子皇好大隻又爽口！肉類就以澳州M5和牛最正，牛味超香濃，雞腿肉都超軟腍！丸類就有牛骨濃汁牛丸、薑汁皮蛋貢丸、招牌墨魚丸，個人超推薦墨魚丸扎實彈牙又香！食埋蔬菜拼盤就可以煮海鮮粥，店員會過嚟加入粥底，並將已經煮林嘅南瓜同埋芋頭整碎拌匀，食落軟綿又鮮甜，每啖都非常滿足！最後甜品就係雪米糍，食完熱辣辣邊爐再食雪糕真係好爽！