釜山商會

呢輪睇完黑白大廚，就想瘋狂食韓國嘢，睇戲前同friend揀咗呢間特別啲，有香港少見既釜山豬肉飯嘅餐廳試吓。仲有一個鐘就開場，快手揀左釜山豬肉湯飯、釜山豬肉湯麵，同埋醬油蝦意粉。店員放低左一盤韓式前菜，種類都幾豐富，除左常見既泡菜類，仲有炒粉絲、甜蕃薯等。好快就上菜，釜山豬肉湯湯底奶白色，當中有韭菜、娃娃菜、豬肉等。飲落鮮甜得黎幾清，豬肉片有口感，整體有種屋企feel，有別於一般韓國菜又辣又重味既印象。另一款釜山豬肉湯麵，麵質類似上海麵，較軟身，湯底相比起湯飯較淡，個人比較喜歡湯飯。餐牌上最特別係醬油蝦意粉，好奇醬油蝦點樣結合意粉。味道又幾香，食落係醬油咸香加左cream既奶感，意粉質地彈牙。呢個組合創新得黎又幾夾，值得一試。食完就夠鐘睇戲啦，下次去尖沙咀都會想encore湯飯。