麺匠 真武咲弥 (Moved) New Location

週五晚家人各有各開P，小肥唯有食自己，收咗工喺附近兜，結果就行咗入去春園街一家連名都唔係幾識讀o既「麺匠 真武咲弥」食咗碗拉麵醫肚。拉麵店門外貼滿彩圖餐牌。XO仔被吸引入店係因為門外位妹妹實在落力又好客，加上透過玻璃窗又咁啱見到帶哂手套同帽o既師傅喺度表演，或許這就是緣份吧。小店為搭枱制，枱號可於牆上找到，嘻嘻，當日好好彩地有三號枱坐。餐桌上有齊凍水、水杯、紙巾、筷子、調味料，明顯全為自助式。四周牆身都有海報及紙條推介套餐及可追加項目，而且清楚標明只收現金。桌上亦有擺出彩圖過膠餐牌。點菜紙簡單易填。炙熱醬油拉麵（$80）：大大碗拉麵不單夠熱，份量亦十分強勁。黃色o既麵條煙韌有彈性，醬油湯底香濃而不膩。整碗拉麵o既精髓就係頂面嗰塊靚叉燒，其肉質軟腍嫩滑，個人覺得係自己食過咁多間拉麵舖中最正o既一塊叉燒，實屬「一番」（Ichiban）！最意想不到就係湯入面嗰啲豬肉粒都一樣咁軟熟可口，絕對值得推介！「ごちそうさまでした！」