Rustico

Open Now

Now Closed

爸爸訂咗枱中午12:00，仲坐窗邊位置！感覺舒服。是日午餐我揀咗頭盆係烤牛仔肉薄片配吞拿魚沙律醬伴西西里水瓜柳！頭盆一人份嚟講算唔錯，吞拿魚醬好香濃，但係都冇掩蓋牛仔肉片嘅牛肉香，一粒粒好可愛嘅粒粒水瓜柳，其實係pickle，酸度啱啱好，開胃！主菜我就揀馬鈴薯麵團配四款芝士汁，麵團波波煙煙靭靭得嚟軟軟糯糯，配上超級香濃芝士汁醬，上面仲有大量芝士刨絲，完全滿足晒我呢啲芝士控。不得不提上餐前嘅餐包，麵包暖暖好香，多士香脆到不得了，沾埋黑醋同橄欖油，兩件麵包完全俾我KO。最後甜品我選擇咗雪糕，落單時冇問咩口味，嚟到係一個朱古力雪糕球，下面有啲好脆、香甜嘅餅乾脆墊底，面頭有香古力醬，雪糕濃滑而唔太甜，加上餅乾脆卜卜，口感非常滿足。跟一杯餐茶，凍檸茶要消消飽肚感！服務尚算可以，會喺你食完個頭盆先上主菜。我相信會再去幫襯試吓晚餐。