姚姚酸菜魚 (青衣城1)

Open Now

Now Closed

前日（10-2-2024 Sat）大年初一傍晚， 同老公睇完戲後就食個早晚飯，之前我都已經search過青衣城有咩嘢食，見到有我想食嘅酸菜魚，問問老公，老公話ok。咁我哋就走過嚟啦，由於時間尚早，所以冇乜客，就俾咗一張四人枱我哋坐。坐低後睇menu 見到我想食嘅酸菜魚拼北京烤鴨，二人套餐係$338.00，諗住掃QR code就落單，點知話售罄，咁問問店員，佢哋話係冇呢個餐，要就食龍年開運套餐。睇睇，搵到有呢兩樣嘢嘅套餐，要$538.00， 咁就要呢個啦，落單嘅時候都有好多選項可以揀，我哋就揀咗酸菜魚要微辣，少油;飲品就只係要兩個罐裝飲品，我哋見唔到如果叫另外嘢飲加嘅價錢係幾多。落完單後好快 ， 泡椒鳳爪就到嚟， 睇見好驚佢會好辣 ，鳳爪係白色嘅，食落，鳳爪冇味，啱我，而佢哋係去晒骨嘅，下面有蓮藕片，心諗真好，有蔬菜食，但竟然有渣，真係第一次食有渣嘅蓮藕。之後大大盤酸菜魚到嚟，食吓先， 魚肉滑，酸菜偏酸，魚頭都有兩個，有炸過幾香口，如果爸爸仍健在，佢一定好鍾意食，而微辣係啱我。3.5分之後姚姚脆奶，即係炸鮮奶到嚟，甜品咁快到嚟？睇見顏色炸深色咗，食落外脆裏面嘅牛奶嫩，不過冇乜奶味少少甜。