金香茅泰國菜館 (Closed)

原本與友人想去深水埗區食小菜，但等車等了半個鐘都冇車到。 之後諗住轉往九龍城區食泰菜，點知... 等車等了十分鐘左右，友人開始覺得有點不適，為求盡快搵個地方坐低休息及醫肚關係，所以友人便選擇到金香茅。其實是次為本人第二次到訪，不過今次嘅食物就差咗少少喇！ 生蝦刺身︰新鮮、爽口，必吃。 冬蔭公 (細)︰椰香適中，味道很好。可惜材料未算豐富，一隻蝦開四份，湯內共用了一隻半蝦，略嫌唔夠大方。 泰式炒椰菜苗︰第一次食椰菜苗。椰菜苗口感似芥蘭，但就完全冇芥蘭果陣澀味。此餸有用豆板醬炒，不算辣。 海鮮炒粉絲︰賣相不錯，可惜味道不行。粉絲一啲就冇乜味，一啲就滿口老抽味。勁奇怪... 唔知係咪粉絲比較難炒，令到廚師加色及加味時好唔平均 (見圖)。下次再幫襯都唔會再叫呢個。 椰汁西米露︰呢個係送嘅。其實本人不嬲都唔鍾意食泰國甜品嘅，因為曾經食過一次有『甜到甩牙』感覺嘅泰國糖水之後，本人就對所有泰國甜品都敬而遠之。不過友人強調此糖水《唔會過甜，包你食到》下，本人半推半就試了一口。咦... 真Okay唔太甜喎，之後我就食哂成碗喇！哈哈...