翠華餐廳 (銅鑼灣商業大廈) (Closed)

應該講我係翠華擁擁躉，咁多年一直幫襯中環嗰間，時不時都會去，因為距離屋企公司都近，而且覺得佢啲嘢全部都幾好味！現在港島剩返銅鑼灣一間，唔就腳少咗幫襯，但時不時都會掛住佢嘅魚旦河，冬蔭功豬軟骨片頭米和咖喱牛腩飯！嗰日銅鑼灣行街就去食我掛住嘅魚旦河，被告知河粉賣晒轉左米粉，端上來已經出事，嗰個碗點解變咗樣了？一邊高一邊低，(之前都係一高一低，不過落差冇大得咁誇張），碗嘅變化造成容量明顯少咗，米粉得幾柱，片頭幾厚係好味嘅，魚旦都唔似以前比較軟身，變咗好彈牙好有咬勁嘅，味道都唔錯嘅，不過以米粉嘅量作為午餐，女仔都唔會飽，以前一定唔係咁少！跟住再外賣兩份咖喱牛腩飯返屋企作晚餐，夜晚叮熱發現牛肉少到兩份加埋得四舊，牛筋一條都冇，其餘全部薯仔湊數，咖哩味道冇變，但內容已經差得多了！都幾失望，香港本土一間好味嘅港式茶餐廳，現在可能受到經濟大環境嘅影響，退步咗咁多