孖寶車仔麵

Open Now

Now Closed

葵涌廣場除左掃街之外，其實仲有好多餐廳，今次就試左朋友推介嘅車仔麵。下午茶三餸麵套餐都幾抵食，配料選擇多，我揀左手打麵、豆卜釀豚肉、魚肉春卷、咖喱魷魚，配腩汁。手打麵貌似油渣麵嗰種麵，粗身但偏腍。第一次食豆卜釀豚肉，豆卜包住大大粒肉丸，吸曬湯汁好正！魚肉春卷煙煙韌韌，中間混入芋頭增加口感。咖喱魷魚爽口彈牙，咖喱汁香辣惹味。枱上仲有辣菜甫俾客人任加，可以提升湯底味道。本來想叫墨魚條碗仔翅，但伙計話墨魚條無貨，所以叫左魚肉。魚肉份量好多，入口彈牙無腥味，有驚喜。碗仔翅質感稠身，加入冬菇絲、木耳絲等配料，再倒少少紅醋，令味道更豐富。辣魚蛋用左陳皮魚蛋，質感比較結實，我覺得辣度可以再加強。