德記潮州菜館

Open Now

Now Closed

日期：7月7日人數：3人有時係週末，我會同朋友喺香港大學打羽毛球。打完羽毛球之後，會去附近嘅餐廳食晚飯。呢晚去咗西環寶翠園附近嘅德記食潮州嘢。呢間餐廳都有唔少捧場客，好多都有訂位，所以好似我哋呢啲walk in嘅客人，就要等一陣。題外話，喺等位期間我哋幫襯左門口嘅阿婆，買咗砵仔糕。個人覺得個砵仔糕有啲太粉同埋太軟，唔夠煙韌。等左大概20分鐘，我哋終於可以入去。因為我哋都比較肚餓，都點左唔少菜式。包括有胡椒豬肚湯、鵝肉拼鵝翼、煎蠔餅、清蒸帶子、同埋炒通菜。胡椒豬肚湯不愧為餐廳嘅招牌菜之一，本身湯好有胡椒味，豬肚亦都夠腍，配埋鹹菜，飲起身非常療癒，打完波飲非常正。身為潮州菜館，滷水鵝肉拼鵝翼都做得非常入味，回味無窮。蠔餅份量非常大，蠔仔本身亦都好新鮮。帶子本身好新鮮，配合蒜蓉粉絲同埋豉油，非常鮮美。炒通菜就正常水準。餐廳裝修係比較舊式粵菜館裝修，地方不大，座位有少少迫。由於係週末晚上關係，食客非常多，環境有少少嘈，但都可以接受。環境算乾淨衛生，服務好到位，價錢好合理。