Marco's Oyster Bar & Grill (Moved) New Location

佐敦一向都出名多嘢食，今次我哋就搵左呢一間成日都聽到佢個名嘅餐廳食lunch。雖然呢間餐廳出名食蠔，但係我哋遲咗起身，早餐都未食，唔想咁快食生冷野所以留返下次先試。我哋每人要左一份午市套餐，餐湯可以揀野菌忌廉湯或者雜菜湯。我同女朋友都要左前者。本身以為係白色嗰種忌廉湯，點知竟然係用菇新鮮打出嚟呈啡色嘅湯，飲落去仍然有一粒粒姑嘅口感，而且菇味十分香濃，亦好creamy，飲晒成碗都幾飽肚。餐包都好有誠意，侍應話係新鮮焗製嘅麵包，熱辣辣好軟熟，而且有濃濃香草味，加埋牛油食好正。主菜方面，自己要左一份黑椒牛柳跟薯菜。七成熟嘅牛柳外面煎到好香，入面就好嫩滑。本身牛柳嘅簡單調味已經好足夠，個人應為唔需要加汁都好食。黑椒汁反而可以伴厚切粗條薯條食。女朋友就要左佢最愛嘅香草蒜片蜆肉意粉。份量都幾大碟，蜆肉新鮮，海水味偏重，所以師傅都將意粉調味得比較淡，反而白酒味好香好出，夾埋一齊食就啱啱好。跟餐加$10就可以有一個甜品加一杯熱飲，要凍飲就再加多$3，相當抵食。我哋要左一杯凍檸茶同凍朱古力。甜品方面，我哋要咗一份焦糖燉蛋同一件紐約芝士蛋糕。焦糖燉蛋係凍嘅，蛋味濃而且好滑，面頭嘅焦糖好脆，甜度適中，好食。