翠林辣蟹舫

今日嚟尖沙咀食中菜，一直都想嚟呢間網紅蟹店「翠林辣蟹舫」食招牌蟹🦀餐廳位於食店林立嘅亞厘士道，環境乾淨舒適，除咗傳統嘅大圓枱，仲有卡位，空間寬敞，張枱都夠晒大。鎮店招牌蟹同龍蝦有5種煮法，仲有多款小菜有八折優惠，每月更新。入座後店員會問你飲咩茶，奉上花生🥜，花生香脆，亦會問你幾時上菜。黑白胡椒蟹🦀上碟已經好香胡椒味，大大隻，最重要係足秤多肉，好多時食蟹都會遇着蟹鉗殼好大但裏面啲肉好少，呢度係蟹鉗有幾大肉就有幾多🤩啖啖肉好juicy，而且新鮮鮮味，黑白胡椒味道濃郁，少少辣好惹味😋撈飯食真係一流👍🏻鹽燒牛脷👅用錫紙包住上碟，店員打開錫紙後熱辣辣出晒煙，份量好多，牛脷厚薄同肥瘦適中，肉味好香濃，牛脷加左洋蔥🧅同香蔥爆香好惹味。脆皮大腸豬大腸外面炸到好香脆，咬落爽口，油香滲出，再加上大量嘅花椒又香又辣，簡直係極度邪惡😂香辣土豆絲土豆絲刨得好幼，食落好爽口，開頭味道有少少酸，之後辣味後勁越嚟越勁，鍾意食辣嘅朋友一定唔可以錯過。整體來講，食物質素不錯，好惹味好有鑊氣，分量充足；環境舒適，座位寬敞；服務態度親切，會幫手開蟹鉗，提供手套和消毒濕紙巾，上菜後亦會介紹菜式。