星記海鮮飯店 (一號廣場)

Open Now

Now Closed

今日三個人訂好枱，嚟米芝連飯館食飯，1點幾外面落住毛毛雨，上到嚟見到有好多枱未有人坐，侍應安排我地坐偏一偏嘅位置，冷氣抽風不良，好焗呀。點咗午市套餐4+2，即係有4樣餸選兩樣，冇影菜牌。點咗蒸雞同臘腸炒芥蘭。另外兩樣係一個炒飯，一個菜。套餐包一碗例湯，涼瓜炆斑頭腩，生炒骨，糖水。講食物喇，例湯好有水準，但係得一碗仔真係對於我呢啲水怪係到喉唔到肺。接住好快上蒸雞，乜上得咁快啊，蒸定好架。雞好香好滑，配埋個汁撈飯真係好味道。再好快上生炒骨，暖嘅。酸酸甜甜骨肉分離好味道。之後到臘腸炒芥蘭，都有少少煙出嘅。芥蘭唔老臘腸夠香。斑頭腩好出色，濃濃嘅芡汁包住魚魚，骨頭都啜到乾乾淨淨，涼瓜爽脆。最後係紅豆沙，有陳皮嘅香，紅豆起沙，但係我唔鍾意食糖水，所以食咗少少。埋單走嘅時候返到出大廳，得番兩三台客，係咁點解要安排我地坐到去咁偏呢。