幸屋

Open Now

Now Closed

幸屋，係咪幸福既餐館既意思呢？印象中好似係第3次黎。今日係緣分既促使之下，係一個特別既日子黎到呢度食返餐。呢間拉麵舖位於灣仔一條街市街入面，入口唔係容易見到。入到拉麵舖入面，就發現裏面高樓底，裝修非常日式拉麵舖，感覺別有洞天！星期五午飯時間黎到，排左一陣隊。幸屋既菜單有幾款拉麵，3款沾麵，仲有幾款飯，同埋幾款小食，沙律等等。你可以揀拉麵既粗幼同硬度，湯既濃度，香油多少，辣度，連叉燒，葱同椰菜都有得揀。任何飯餐或拉麵餐加 $15就可以配細沙律或湯餃子及汽水。特濃味噌廣島蠔沾麵 $108呢個沾麵真係必叫。麵底可揀熱或凍，唔想個汁越食越凍，一定要好似我地咁揀熱麵底。個沾麵汁滾住咁上枱，唔知點解好香蠔味，濃淡適中，唔會過咸。麵條粗身，夠硬，我鍾意，而且好掛汁，沾一沾已經好夠味，份量足，食極都有。配料有3隻蠔，一大兩中，新鮮肉質實在；糖心蛋半隻，軟滑甜甜地超好味；菜量足，有不少新鮮椰菜，黑木耳絲，筍片同洋蔥絲；仲有香蔥碎，白芝麻粒同一塊紫菜加添香味；另加一塊檸檬自己加汁。個沾麵汁食完仲可以免費加一次湯飲埋。咖哩豚骨沾麵 $98一定要試下呢個二月限定既新口味沾麵。咖哩味沾麵真係未試過，即管試下先。