金西南米線

Open Now

Now Closed

【#思思賢美食推介】 銅鑼灣人氣金西南米線😋必試金獎腩肉酸辣米線！平日約朋友食lunch，作為米線愛好者，網上見到金西南米線重開，就去試試佢～Lunch time都幾多人排隊，不過等咗10分鐘左右就有位喇。酸辣小鍋米線一人餐($68)，有兩款餸、小食同埋嘢飲。可以自己揀餸、辣度、米線份量等等，幾好！我揀咗少米線、BB辣、多芽菜、多酸菜。一上枱，嘩！真係好大碗！金獎腩肉好多，食落好嫩滑，肥瘦啱啱好，真係好食！不過魚腐就真係得幾粒，如果多啲就好喇。個酸辣湯底好濃，入面有啲辣肉碎、韭菜、酸菜，酸酸辣辣咁，幾開胃。米線好彈牙，又唔會太粗太幼，吸晒啲湯汁，每一啖都好滿足。我叫咗個手拍青瓜做小食，清爽開胃，同個濃味嘅米線好夾。真心推介金獎腩肉，必點！份量十足，肉質鮮美！個酸辣湯底都好正，唔會太辣，啱晒我。 最正係可以自己揀餸、辣度、米線份量，好貼心！不過，雖然唔使搭枱，但座位有啲窄，好似背對背咁食飯。如果喺附近返工，買外賣返office食舒服啲。總括嚟講，呢間金西南米線裝修後，環境舒服咗，食物質素都keep到水準，CP值高！下次想試吓佢哋嘅涼拌米線！ #思思賢美食推介 #銅鑼灣美食 #金西南米線